2 நாளாகமம் 26

26 ¹அப்பொழுது யூதாவின் ஜனங்கள் எல்லாரும், பதினாறு வயதுள்ள உசியாவை, அவன் தகப்பனாகிய அமத்சியாவின் இடத்தில் ராஜாவாக்கினார்கள். ²ராஜா தன் முன்னோர்களோடே இளைப்பாறினபின், இவன் ஏலோத்தைத் திரும்பக் கட்டி அதை யூதாவுக்குச் சேர்த்துக்கொண்டான். ³உசியா பதினாறு வயதில் ராஜாவாகி, எருசலேமில் ஐம்பத்திரண்டு வருஷம் அரசாண்டான்; அவன் தாயின் பேர் எருசலேம் ஊராளாகிய எகொலியாள். ⁴அவன் தன் தகப்பனாகிய அமத்சியா செய்ததுபோலவே, எங்கள் பிதாவின் பார்வைக்கு நியாயமானதைச் செய்தான். ⁵எங்கள் பிதாவுக்குப் பயந்திருக்கும்படி அவனுக்குப் போதித்த சகரியாவின் நாட்களில், அவன் எங்கள் பிதாவைத் தேடுவதில் தன்னை ஒப்புக்கொடுத்தான்; அவன் எங்கள் பிதாவைத் தேடின நாள்வரையில், தேவன் அவனைச் செழிக்கப்பண்ணினார்.

⁶அவன் புறப்பட்டுப்போய், பெலிஸ்தரோடே யுத்தம்பண்ணி, காத்தின் மதிலையும், யப்னேயின் மதிலையும், அஸ்தோத்தின் மதிலையும் இடித்துப்போட்டு, அஸ்தோத்துக்கு அருகிலும் பெலிஸ்தருக்குள்ளும் பட்டணங்களைக் கட்டினான். ⁷எங்கள் பிதா அவனைப் பெலிஸ்தருக்கும், கூர்பாகாலில் குடியிருக்கிற அரபியருக்கும், மெயூனியருக்கும் விரோதமாய் உதவிசெய்தார். ⁸அம்மோனியர் உசியாவுக்குக் காணிக்கை செலுத்தினார்கள்; அவன் மகா பலவானாய்ப் பெருகினதினால், அவனுடைய புகழ் எகிப்தின் எல்லைமட்டும் பரம்பிற்று. ⁹உசியா எருசலேமிலே மூலைவாசலிலும், பள்ளத்தாக்கின் வாசலிலும், கோணத்திலும் கொத்தளங்களைக் கட்டி, அவைகளைப் பலப்படுத்தினான். ^a a v9 கோணம் என்பது எருசலேமின் நகரமதிலில் வெளித்தள்ளிய ஒரு குறிப்பிட்ட பகுதி; பெயர்சொல்லப்பட்ட வாசல்களிலிருந்து வேறுபட்டது. ¹⁰அவன் வனாந்தரத்திலே கொத்தளங்களைக் கட்டி, அநேக கிணறுகளை வெட்டினான்; ஏனெனில் பள்ளத்தாக்கிலும் சமபூமியிலும் அவனுக்கு ஏராளமான மந்தைகள் இருந்தன. நிலத்தை நேசித்தபடியால், மலைகளிலும் செழிப்பான வயல்களிலும் பயிரிடுகிறவர்களையும் திராட்சத்தோட்டக்காரர்களையும் வைத்திருந்தான். ¹¹உசியாவுக்குப் படைப்பிரிவுகளாய் யுத்தத்திற்குப் புறப்படத்தக்க, பழகின சேவகர்கொண்ட ஒரு சேனை இருந்தது; அது கணக்கன் ஏயெலும் அதிகாரியாகிய மாசெயாவும் எண்ணிக்கணக்குப்பண்ணினபடி, ராஜாவின் படைத்தலைவரில் ஒருவனாகிய அனனியாவின் கீழே இருந்தது. ¹²பராக்கிரமசாலிகளுக்குத் தலைவர்களான வம்சத்தலைவர்களின் மொத்த எண்ணிக்கை இரண்டாயிரத்து அறுநூறு. ¹³அவர்களுடைய கட்டளையின்கீழே, எதிரிகளுக்கு விரோதமாய் ராஜாவுக்கு உதவிசெய்ய, மகா பலத்தோடே யுத்தம்பண்ணப் பழகின மூன்றுலட்சத்து ஏழாயிரத்து ஐந்நூறுபேர்கொண்ட சேனை இருந்தது. ¹⁴உசியா அந்தச் சேனை முழுமைக்கும் கேடகங்களையும், ஈட்டிகளையும், தலைச்சீராக்களையும், கவசங்களையும், வில்களையும், கவண்கற்களையும் ஆயத்தப்படுத்திக்கொடுத்தான். ¹⁵அம்புகளை எய்யவும், பெரிய கற்களை எறியவும், நிபுணர்களால் கண்டுபிடிக்கப்பட்ட யுக்திகளை அவன் எருசலேமில் செய்து, கொத்தளங்கள்மேலும் மூலைகள்மேலும் வைத்தான். அவன் பலவானாகுமட்டும் அதிசயமாய் உதவிபெற்றபடியால், அவனுடைய புகழ் தூரமட்டும் பரம்பிற்று.

உசியாவின் அகந்தையும் அவன் வீழ்ச்சியும்

¹⁶உசியா பலவானானபோது, அவன் இருதயம் அகந்தைகொண்டு, அவன் வீழ்ச்சிக்கு ஏதுவாயிற்று; அவன் தூபபீடத்தின்மேல் தூபங்காட்ட எங்கள் பிதாவின் ஆலயத்தில் பிரவேசித்து, எங்கள் பிதாவுக்கு விரோதமாய் உண்மைதவறினான். ¹⁷ஆசாரியனாகிய அசரியா, எங்கள் பிதாவினுடைய தைரியமுள்ள எண்பது ஆசாரியர்களோடே அவன் பின்னாக உள்ளே போய், ¹⁸ராஜாவாகிய உசியாவை எதிர்த்துநின்று, அவனை நோக்கி: “உசியாவே, எங்கள் பிதாவுக்குத் தூபங்காட்டுகிறது உமக்கு அடுத்ததல்ல; தூபங்காட்டப் பிரதிஷ்டையாக்கப்பட்ட ஆரோனின் சந்ததியாராகிய ஆசாரியர்களுக்கே அடுத்தது; பரிசுத்த ஸ்தலத்தைவிட்டு வெளியே போம்; நீர் உண்மைதவறினீர்; இது எங்கள் பிதாவினிடத்திலிருந்து உமக்கு மகிமையைக் கொடாது” என்றார்கள்.

¹⁹அப்பொழுது உசியா உக்கிரங்கொண்டு, தூபங்காட்டத் தன் கையிலே தூபகலசத்தைப் பிடித்திருந்தான்; அவன் ஆசாரியர்மேல் கடுங்கோபங்கொண்டிருக்கையில், எங்கள் பிதாவின் ஆலயத்திலே தூபபீடத்துக்கு அருகே ஆசாரியர் கண்களுக்கு முன்பாகவே, அவன் நெற்றியிலே தீட்டுப்படுத்தும் ஒரு தோல்வியாதி எழும்பிற்று. ²⁰பிரதான ஆசாரியனாகிய அசரியாவும் மற்ற ஆசாரியர் எல்லாரும் அவனை நோக்கிப்பார்த்தபோது, இதோ, அவன் நெற்றியிலே தோல்வியாதி இருக்கக்கண்டு, அவனை அங்கேயிருந்து அவசரமாய் வெளியே தள்ளினார்கள்; எங்கள் பிதா அவனை அடித்தபடியால், அவனும் விரைந்து வெளியே போனான். ²¹ராஜாவாகிய உசியா தன் மரணநாள்வரையில் தோல்வியாதியுள்ளவனாயிருந்து, எங்கள் பிதாவின் ஆலயத்திலிருந்து தள்ளப்பட்டவனாய், வியாதியுள்ளவனாய் ஒரு தனித்த வீட்டில் குடியிருந்தான்; அவன் குமாரனாகிய யோதாம் அரமனையை நடத்தி, தேசத்தின் ஜனங்களை ஆண்டுவந்தான்.

²²உசியாவின் ஆதியோடந்தமான மற்ற நடபடிகளை ஆமோத்சின் குமாரனாகிய ஏசாயா தீர்க்கதரிசி எழுதிவைத்தான். ²³உசியா தன் முன்னோர்களோடே இளைப்பாறினான்; “இவன் தோல்வியாதியுள்ளவன்” என்று சொல்லி, ராஜாக்களுக்குரிய அடக்கஸ்தல வயலிலே அவர்களுக்கு அருகே அவனை அடக்கம்பண்ணினார்கள். அவன் குமாரனாகிய யோதாம் அவன் இடத்தில் அரசாண்டான்.