Avāli Phākahai Awunga Akha
Zechariahna ali tamchitheilakha Uzziahna ithumwui Avāli phāvai, kala mataisanghaowa: dolanbing, ra̱khongbing, lui, tamkahai raimibing, lunggui kajui thaivā khavai otbing. Chiwui thili awui pangshap langkaso sāhaowa. Nganamkaphā riktā khavai ana apāng eina ungsai, kala hanphutwui ngalemli awui khaveili phārrei kazāt pemhaowa.
26 1Chitharan Judahwui mi saikorana zingkum tharāda tharuk kāhai Uzziahli avāva̱ Amaziahwui pamli awunga sāmi. 2Awunga avāva̱ ngarāli ngasoda thikahai eina, ana Eloth sakāluishitlaga Judahli hanmi. 3Uzziah mungkaphok atamli zingkum tharāda tharuk kāshunghairasai, kala ana Jerusalemli zingkum hangphangāda khani munga. Ava̱va̱wui ming Jerusalemwui Jecoliah hoi. 4Avāva̱ Amaziahna kasāsāwui athishurda, ana ithumwui Avāwui mikyanli khamashung chi sai. 5Ithumwui Avāli ngachee khavai ali tamchithei kahai Zechariahwui atamli, Uzziahna ithumwui Avāli phāvai; kala ana ithumwui Avāli phā mamānlakha mataisanghaowa.
6Ana thānlaga Philistinenaobingli rai ngarara, kala Gath, Jabneh kala Ashdodwui phākho sakhaimi. Ashdod ngalemli kala Philistinenaobing kazangla keinung sakai. 7Ithumwui Avāna ali Philistinenaobing, Gur-baalli khalei Arabwui mibing, kala Meunbingli ngararda ngachonmi. 8Ammonnaobingna Uzziahli shai chigata, kala awui ming Egyptwui thari vāshungda ngayaovai; kaja ana pangmeikharhaira. 9Uzziahna Jerusalemli Achithek Ngaveili, Tampāk Ngaveili, kala Achikunli dolan sākhuilaga haihaida mangatha̱ khavai sai. a a v9 Achikun chi Jerusalem keinung phākhowui sākashok apam akhana, aming kapi kahai ngaveibingwui eina khangatei kahaina. 10Ana lamhāngli dolan sākhui kala ra̱khong kachungkha khonkhui, kaja angakoram kala tampākli awui sha̱kei kachungkha leisai. Kaphungramli kala ngalei katum luilungli lui khavābing kala drakhā yāmgui khamayonabing haisai, kaja ana luili leishida. 11Uzziahna raili shang-shang eina thānkhame, tamchithei kahai raimibingwui ashangva̱ leisai; athumli kapime Je-iel kala otva̱ Ma-aseiahna mishān khuiserlaga, awungawui kathānabing kaikhawui akha Hananiahwui azingli thāsera. 12Kapingabingwui tungli kathāna kahai, shimkhurwui akhokabing katonga ngarumlaga thing khani shātharukna. 13Athumwui pāngli, awungali awui rai kasābingli ngararda ngachon khavai, matakhak pangshap eina rai sā khavai tamchithei kahai raimibingwui ashangva̱ lakh kathum thing shini shāphangāna. 14Uzziahna raimibing katongawui vang chāngvei, kazei, kuihon, phahon, malā, kala kachak lunggui ngarānmisera. 15Jerusalemli ana them-kathema mibingna semkahai otbing sākhui, malā kāp khavai kala lunggui kajui thaivā khavai dolanbing kala achikunli haisera. Awui sākashap chānpao khamayāng tāda ngayaohaowa, kaja ana pangmeikharhai vāshungda ali ngakheikhang eina ngachonmi.
Uzziahwui Langkaso kala Awui Kashimān
16Kha Uzziah pangmeikhar tharan, awui ning langsohaoda, awui kashimānli thānvai. Ana ithumwui Avāli malaihaowa, nganam hanphuttungli nganam riktā khavai ithumwui Avāwui shimli ungsai. 17Pāngmon Azariahna ithumwui Avāwui pingmeikhame pāngmon hangchishatli ngasoda awui thili unghai. 18Athumna awunga Uzziahli ngasunda hānga, "Uzziah, ithumwui Avāwui mangāli nganamkaphā riktā khavai hi nawui vang maningmana, kha nganamkaphā riktā khavai tharchigatkahai pāngmonbing, Aaronwui naomayarabingwui vangna. Kathara shimwui eina shoklu; na shitkasang maleilakla sai, kala hi eina na ithumwui Avāwui eina maikhayā masamphangmara."
19Uzziah malungvātlakhaowa. Nganamkaphā riktā khavai apāngli thaokhong khuida, pāngmonbingli malungvātnahaida, ithumwui Avāwui shimli nganamkaphā hanphutwui ngalemli pāngmonbingwui mangāli awui khaveili phārrei kazāt pemhaowa. 20Pāngmon kharei Azariah kala pāngmon saikorana ali yangkhaung eina awui khaveili phārrei theilaga, ali ngasamzangda ayarli khuishoka, kala ana hengsāda shokthuia, kaja ithumwui Avāna ali sāhaowa. 21Awunga Uzziah mathiranglakha eina tangda phārrei kazāda leihaowa. Aruila phārrei kazāda leilakha ithumwui Avāwui shimwui eina katathaida, ana shim khangatei akhali chipamhai. Kala anaomayara Jothamna awungawui shimwui ot yangda ngalei chiwui mibingli yangmithathuia.
22Uzziahwui kasāsā katai, khare eina thuilaga khanao eina tangda, Amozwui nao marān Isaiahna kapiserhaida lei. 23Uzziah thikahai eina avāva̱ ngarāli ngasoda, athumwui ngalemli, awungabingwui chifa khavai luipam akhali chifahaowa, kaja athumna, "Ali phārrei kazāhaowa," da hānga. Kala anaomayara Jothamna awui mahut thuishina.
