Bou Lambü Choba Che
Zekhariaei hao to leiluk kibü lita, Uziaei seneibü Bou lamla khangkei, hoba jembü kukei: laangchem shuong, deikhün shuong, kao, sepai takteibü, hoba sekmou shuong. Kheijinei sangle lili to yeitikei. Haoei jen juokla khüto maangpon loukei, hoba lemshang shenjanga haoeibü thenyeka masu longkei.
26 1Kheijinei Jihudabü mütshuong pendouei po anthüklak kibü Uzia haobou Amazia jeiko choba pienkei. 2Choba haoeibü bousi shuong yoa yepbü phaia, haoei Eloth kümetkei hoba kho Jihuda la lemshanga phokei. 3Uzia po anthüklak to choba yeikei, hoba Jerusalema po anjinsemto nyi songdakkei. Haonyu kho Jerusalembü Jekolia kikei. 4Haobou Amazia kümbü tegü, haoei Bou thenyeka tükdebü kümbei. 5Bou to souhatla hao to lenbü Zekharia chaloua, haoei Bou lamla jembü kukei; hoba haoei Bou lamjinei, hao la maibou apbei.
6Haoei koukei hoba Filistiabü to wapyokei, hoba Gat, Jabne hoba Ashdodbü kümthang kho leilutikei. Hoba haoei Ashdod napheinei hoba Filistiabü phanga sangnyu dangkei. 7Bouei Filistiabü, Gur-baala kibü Arabbü, hoba Meunbü khulimbo hao to thuikei. 8Ammonbüei Uzia la khüm kukei, hoba haoeibü nyenhaang Ijep leilang sühko haukei, aishanga haoei yaanga hau kikei. 9Uzia Jerusalema Chemnyek Bakhün, Pholi Bakhün, hoba Anglek to laangchem dangkei, hoba kho kaileptikei. a a v9 Anglek kho Jerusalembü kümthanga jetan longbü lepnyu che kikei, nyen phobü bakhün shuong ka lulu kibü ki. 10Haoei yama laangchem dangkei hoba deikhün juong thukei, aishanga angleka hoba kaonopa haoeibü masu si sanlon juong kikei. Haoei shongh hoba maibouthambü seka sekmoubü hoba semlüh lombü shuong phokei, aishanga haoei sekmou to sanoukei. 11Uzia la lason to tan tan thenko haubü leiyenbü sepai tan kikei; khübü kho Choba lajamleibou shuong yoka che Hanania thüka, dobou Jeiel hoba ikjaibü Maaseiaei weanchühkei. 12Lakjaibü mütshuong to khukabü chempen leiyeibü shuong lühbak pendouei hajar nyi hoba saongao lak kikei. 13Haoeneibü ik thüka, Choba to haoeibü dangbou shuong khulimbo thuila shanga, yaang hauko lason wapyola leiyenbü sepai tan hajar saongao semto nyet hoba saongao ngao kikei. 14Uzia sepai tan pendou la aih, aubu, khua khun, mangyuk, laujin, hoba kipbü laang shuong kukei. 15Jerusalema haoei songsido kibü müt shuongei kümbü peisilei kümbei, khübü kho laujin kipla hoba laang yaangbü thepetla shanga laangchem hoba chemnyek thüka phokei. Hoba haoeibü nyenhaang saabüa hoba nyangbüa ae aakei, aishanga haoei hau kila shongko maangpanglabü tegü thuikubü kikei.
Uziaeibü Lilibü hoba Tuongbü
16Ladang Uzia hau kikei, haoeibü maanga yonglam liliko apbei, hoba kho haoeibü tuongbü la yeikei. Haoei Bou khulimbo shabü shonkei, hoba ponlem lemshang thüka ponlem juokla shanga Bou chem to loukei. 17Ungshedbou Azaria hao phaia lotan loukei, Bou ungshedbou maangkaangbü saolei yoan. 18Haoenei Uzia Choba thükto louan laukei, “Uzia, Bou to jen juokbü kho nyi shangabü aying, lausikei jen juokla saüenbü ungshedbou shuong, Aron thensilen shangabü ki. Lemshang ka longashi; no shabü shonkei, hoba ho Bou danko nyi la nyenhang akulabü.”
19Uzia aeibou khauangkei. Jen juokla haoeibü ika wanphau jungan, haoei ungshedbou shuong khulimbo khauangko kijinei, Bou chema ungshedbou shuong thedanga, jen lemshang napheinei, haoeibü khüngjaa imbü mou longkei. 20Ladang ungshedbou thükkabou Azaria hoba ungshedbou shuong pendouei hao to sepeian haoeibü khüngjaa im hapjinei, haoenei hao tongde leiyenkei, hoba hao lolo tongde satkei, aishanga Bouei hao to ngümbei. 21Uzia Choba hailabü shongko imbü mou baukei. Haoei chem janyinbü che ka khünei kikei, im longbüei, Bou chemdang ka wapan apbei. Hao shou Jothamei Choba chem lomkei, hoba kaodak mütshuong songdakkei.
22Tou Uziaeibü lubü kümsilei, shaangla ka thonbü shongko, Amoz shou Isaia thuseibüei doan phokei. 23Uzia haoeibü bousi shuong yoa yepbei, hoba Choba shuong shangabü khünshang seka haoen nyangko khünkei, aishanga haoenei laukei, “Hao im baukei.” Hoba hao shou Jothamei hao jeiko songdakkei.
