Jothamei Bou thedanga jembü lamnyu tükdea jungeida
Jothamei Thükkabü Koukhün dangkei, shongh kaodak kümetkei, hoba Ammonbü thükan yaangbü namshau kukei. Shangabü kho taktei—haoei haoeibü jembü seneibü Bou thedanga tükdea paikei—hoba haobou tegü seneibü Bou chem to alot, lausikei mütshuongei aotokei amaiko kümbo kikei.
27 1Jotham ladang songdakla khangkei, hao po saoto ngao kikei, hoba haoei po anthüklak Jerusalema songdakkei. Haonyu nyen Zadokeibü shou Jerusa kikei. 2Haoei seneibü Bou thedanga ai janbü ki kho kümbei, haobou Uzia hima akiko; lausikei haoei seneibü Bou chema alotkei. Khei yingasikei mütshuongei amaiko kümbo kikei. 3Haoei seneibü Bou chemeibü thükkabü koukhüm dangkei, hoba Ofeleibü kümthanga aeibou kümetkei. a a v3 Ofel kho Bou chem shongh neicheme kibü kaangbüsekbü shongh che kikei, hoba kho Jerusalem sangnyu kümthangeibü phejan che yeikei. 4Haoei Jihudabü shongh kaodaka sangnyu shuong dangkei, hoba bunyu juong kibü kaodaka kaangbüsekbü chem hoba sungbü chem dangkei. 5Haoei Ammonbü Choba khulimbo wapyokei hoba haoen thükkei. Khübü poa Ammonbüei hao la chandinam seret hajar nyetto saongao ngao, hoba whet youshou taksi hajar saonyito anthük, hoba barli youshou hajar saonyito anthük kukei; nyiboubü si semboubü poa kho tegü kukei. 6Kheijinei Jotham hau kiko haukei, aishanga haoei jembü Bou thedanga tükdea paikei. 7Tou Jothameibü joubü kümsilei, hoba haoeibü wapyo pendou hoba kümsilei pendou, Israel si Jihudabü Choba shuong Leaa doan kia. 8Haoei khangjinei po ladang songdakla kikei, hoba Jerusalema po anthüklak songdakkei. 9Jotham haoeibü bousi shuong yoa yepbei, hoba Dawid sangnyua haoenei hao khünkei, hoba hao shou Ahazei hao jeila songdakkei.
