Maangpon Janyinbü Choba
Amaziaei seneibü Bou thenyeka maibü kümbei, lausikei maangpon khümboei akümbo. Hao to haüyojinei, haoei Israel ka munam kubü sepai shuong satkei, hoba Edombü thükkei—kheijinei Edombü bunyu shuong chem to leian kho shanga lembei. Ühai haüyojinei, haoei thuseibou chimtikei, Israel khulimbo wapyola lamleko, hoba Choba, sangnyu koukhüm si thanshang peisilei mautitikei.
25 1Amazia po 25 kian Choba la yeikei, hoba Jerusalema po 29 songdakkei. Haonyu kho Jerusalembü Jehoadan kikei. 2Haoei Bou thea maibü kümbei, lausikei maangpon khümboei akümbo. 3Ladang haoeibü sangle yaangko yaükei, haoei haobou Choba haitibü sambü shuong haitikei.
4Lausikei haoei haoeneibü shousi shuong ahaiti, Mosaeibü le Ngühkhüma dobü tegü, khüto Bouei sakkuko laukei, “Nyusibou shousi shanga ühaitijan, ayingsi shousi nyusibou shanga ühaitijan, mütpem weko jembü shedbü shanga hailabü.”
5Amaziaei Jihudabü takshattikei, hoba haoen chempen chempen weko, hajar thüka lajamleibou hoba saongao thüka lajamleibou phanga phokei, Jihuda hoba Benjamin pendou shanga. Haoei po saoche thüka shuong weanchühkei; aubu hoba aih lapbü, wapyola haula thükbü pienbü müt hajar saongao sem kikei. 6Haoei tokei Israel ka maang kaangbü lakjaibü hajar saongao che, chandinam seret 7,500 ka jekthetan phokei. 7Bou müt che hao jungto louan laukei, “O Choba, Israelbü lakjaibü no yoa haula tesakku, aishanga Bou Israelbü, ho Efraimbü pendou yoa aki. 8No maangkaangko wapyokei, Bouei no dangbou thedanga pekan aptilabü, aishanga Bou thuila ayingsi pekan apla hau ki.”
9Amaziaei Bou müt to phekei, “Lausikei ngei Israelbü lakjaibü la kubü chandinam seret 7,500 kho ai kümlabü?” Haoei jongaikei, “Bouei ho toje aei juong no la kula thükkei.”
10Kheijinei Amaziaei Efraim ka hao jungto loubü lakjaibü shuong chem to hautikei. Haoen Jihudabü khulimbo khauangkei, hoba aeibou angeko chem to ngaikei.
11Lausikei Amaziaei hau kingaikei, hoba jembü mütshuong Jem Pholi to leian haukei, hoba Seirbü müt hajar an haitikei. 12Jihudabüei tokei hajar an lang lapbei, hoba haoen shongh khu laobou to leian haukei, hoba phangaenei jaangan attikei, hoba haoen pendou netla yeiko apbukei. 13Tou Amaziaei chem to ngaitikulabü, lason to haula asakkubü lakjaibü shuongei Samaria ka Beth Horon sühko Jihuda sangnyu shuong shian apbei, hoba müt hajar sem haitikei, hoba soletbü aei juong lekei.
14Amaziaei Edombü thükan longeijinei, haoei Seirbü mühghaü shuong jungan loukei, hoba kho jembü mühghaü shuong la phokei, hoba haoen thedanga khüpetkei, hoba haoen shanga lembü juokkei. 15Kheijinei Bou Amazia khulimbo khauangkei, hoba haoei thuseibou che hautikei, aoei hao to phekei, “Aila nyi jembü müt no ik ka khümenla athükbü ho mütshuong mühghaü shuong lamda?”
16Haoei joyoko kitoua, Chobaei laukei, “Künei no Choba songsido kubou lela phokei lo? Nangashi! Aila no haitilabü?” Thuseibouei nangkei, lausikei laukei, “Ngei Bouei no mautila damsepakei dogo ngeda, aishanga nyi ho kümbei, hoba kü dambü ngüha ale.”
17Jihuda Choba Amaziaei jembü songsido kubou shuong yoa songsido lekei, kheijinei Israel Choba Jehu shou Jehoahaz, haoeibü shou Joash jungto ngühlang hautikei, “Louan, senei wapyoa liko thenyek chühtenshi.”
18Israelbü Choba Joashei Jihudabü Choba Amazia to jongaikei, “Lebanon kabü shishobü bunyuei Lebanon kabü cedar bu jungto hautiko laukei, ‘Kü shou shanga kaibü nouyangnyu yakla kuashi.’ Lausikei Lebanon kabü yamkabü meisiau cheei danjung hauan bunyu kho lintikei. 19Nyi laukei, ‘Chühashi, ngei Edom thükkei,’ hoba kaibü maangpon yonglam lilikei. Kaibü chema khüpashi. Nyi aila thushed lameiko, nyi si nyi yoa kibü Jihuda tuonglabü?”
20Lausikei Amaziaei ngüha ale; aishanga haoen Edombü mühghaü shuong chüheikei, khoei haoen to dangbou ika litila shanga, ho kho seneibü Bou danko loukei. 21Kheijinei Israelbü Choba Joashei angkei, hoba hao hoba Jihudabü Choba Amazia Jihudaa kibü Beth Shemesh ka thenyek weko weko hapbei. 22Jihudabü Israelbüei thükkei, hoba mütpem weko lulueibü chem to satkei.
23Israelbü Choba Joashei Jihudabü Choba, Joash shou, Jehoahaz shou, Amazia kho Beth Shemesh ka senetkei, hoba hao Jerusalem to leibakei, hoba Efraim Bakhün ka Chemnyek Bakhün sühko haoeibü kümthang leilutikukei, kho iknop saongao lak bang kikei. 24Haoei seneibü Bou chema Obededom ikjaia hapbü hon, chandinam hoba peisilei pendou, hoba Choba chema kibü nyaksinam hoba shian apbü müt shuong sunglangkei, hoba Samaria to ngaikei.
25Jihudabü Choba Joash shou Amazia, Israelbü Choba Jehoahaz shou Joash haibü phaia, po anthük ngao langkei. 26Amaziaeibü joubü kümsilei, shaangbü ka thonbü sühko, Jihuda si Israelbü Choba shuongeibü Lea doan aki lo? 27Amaziaei seneibü Bou phai sembü ka sepeibü phaia, Jerusalema haoenei hao khulimbo huon takkei, hoba hao Lakhish to satkei. Lausikei haoenei Lakhish to hao phaito müt hautikei hoba hao haitikei. 28Haoenei hao kolia leian ngaikei, hoba Jihuda sangnyua haoeibü bousi shuong yoa hao khünkei.
