Joashna Ithumwui Avāwui Shim Hanmiluishit
Jehoiada ringlakha, Joashna oko akha eina ithumwui Avāwui shim chipho, kala mibingna ringphāda chili tāzata. Pāngmon kathara thihaida awungana kathānabingwui tui khuisangmi, meoma̱ phā khavai ngahāna, kala Jehoiadawui naomayara Zechariahli yāngkhupli lunggui eina horthata — kala Aramwui raimi kateokhamāngna ali sāshimānhaowa.
24 1Joashna mungphok tharan a zingkum shini kāshunghairasai, kala Jerusalemli zingkum hangmati munga. Awui ava̱va̱ Zibiah chi Beer-shebawui einana. 2Joashna pāngmon Jehoiadawui mirin peida ithumwui Avāwui mangāli khamashung khangarong ot sai. 3Jehoiadana awui vang ngalā khani kapangkhui, kala Joashwui mayarnao kala naongalāva̱ leihaowa.
4Atam khaleilaga, Joashna ithumwui Avāwui shim chipho khavai amalung tā. 5Ana pāngmonbing eina Levinaobingli kazipkhuilaga athumli hānga, "Judahwui keinungbingli vāda, nathumwui Avāwui shim chipho khavai Israel saikorawui eina zingkum kachida pheisā khuilu; thākta sālu." Kha Levinaobingna thākta masāmana. 6Awungana pāngmon kharei Jehoiadali hokhuida hānga, "Khi sāda nana ithumwui Avāwui rao Moses eina yaruina ningkhami kachonshimwui vang Israelli tākahai khāshinā chi Judah eina Jerusalemwui eina khuirā khavai Levinaobingli mangahānmana?" a a v6 Ningkhami kachonshim chi Israelwui lamhāngli phungung phungvā sākhavai katharapam, tabernacle chi sai. 7Makhayā preiva̱ Athaliahwui naomayarabingna ithumwui Avāwui shimli zangda sāchipho, kala ithumwui Avāwui shimwui kathara otbing saikora chi Baalbing khokharumli sākhui.
8Awungawui kakaso eina, athumna oko akha sākhuida ithumwui Avāwui shim ngaveiwui ayarli tā. 9Athumna ithumwui Avāwui rao Mosesna lamhāngli Israelli tākahai khāshinā chi ithumwui Avāli khuirālu da Judah eina Jerusalemli hāngchithei. 10Kathānabing saikora kala mi saikora ringphāhaoda, athumwui lemmet khuirāda oko chi pemting eina tangda oko chilungli tāzata. 11Levinaobingna oko chi awungawui kathānabingli khuirāda pheisāna pemtinghai chi kathei tharan awungawui kapime kala pāngmon khareiwui otva̱na oko chi heisanghailaga apamli hanluishita. Thangkachida athumna pheisā tarākha khuiya. 12Awunga kala Jehoiadana chi ithumwui Avāwui shimwui ot kasābingli mi, athumna shim chi hanmiluishit khavai ngalung mistri eina thing mistri masākhui, kala ithumwui Avāwui shim chipho khavai mari eina pithrai ot kasābingla masākhui. 13Ot kasābingna ot sāda athumwui pāng eina shim chipho ot mataisanga. Athumna ithumwui Avāwui shim chi akhangachā athishurda hanmiluishitlaga pang ngasaka. 14Kupkahaiwui thili athumna pheisā ngalan chi awunga kala Jehoiadali khuirā, kala chiwui eina ithumwui Avāwui shimwui vang otram ngatha̱ khavai kala rikkatā kachigat khavai khorkhong, khongsai, kala sinā eina lupāsāwui khorkhong sākhui. Athumna Jehoiadawui mirin peida ithumwui Avāwui shimli rikkatā kachigat chigatchinga.
15Jehoiadana kasāngkha okpeida rarlak eina thihaowa; a thi tharan a zingkum shākha kala thumrā kāhairasai. 16Athumna ali Davidwui keinungli awungabingwui ngachaili chifa, kaja ana Israelli ithumwui Avā eina awui shimwui vang kaphā ot sai.
Jehoiada Thihaida Joashna Ithumwui Avā Nothā
17Jehoiada thihaida, Judahwui kathānabingna awungali kui mashunzangda khayākashi mi, kala ana athumwui tui khuisangmi. 18Athumna ithumwui Avā, athumwui avā ngarāwui Varewui shimli horhailaga, Asherim eina meoma̱li otram ngatha̱ya. Hi khayonkhamāngwui vang Judah eina Jerusalemli malungkhavāt shoka. 19Chithālala ithumwui Avāna athumli awuili latung khavai marānbing chihovā; athumna athumli hāngmachina, kha athumna makhuisangthuwa.
20Chieina pāngmon Jehoiadawui naomayara Zechariahli ithumwui Avāwui Manglā shoka. Ana mibingwui mangāli nganingda hānga, "Ithumwui Avāna hithāda hānga: Khisāda nathumna awui ningkhami mangānathukhala? Nathumna maungshungmara, kaja nathumna ali horhaikha eina anala nathumli horhaira."
21Athumna awuitungli ngathumda, awungawui kakaso eina ithumwui Avāwui shimwui yāngkhupli ali lunggui eina horthata. 22Awunga Joashna Zechariahwui avā Jehoiadana ali khayāshida kahai lukhamashan chi malaihaida awui naomayarali shaothathaowa. Zechariahna thida leilakha hānga, "Ithumwui Avāna theida tandi miranu."
Ithumwui Avāwui bichar shitkasang makhalei Joashli tāsera
23Kum ngalan tharan Aramwui raimibingna Joashli rai rākaida Judah eina Jerusalemli rai rātāda mibingwui kathānabing saikorali shaothata, kala athumwui ngaponkakhui saikora Damascuswui awungali chihovāhaowa. 24Aramwui raimibing mi kateokhamāng eina rālala, ithumwui Avāna hakkhamei raimibing athumwui pāngli horsangmi, khikhalajila Judahna ithumwui Avā, athumwui avā ngarāwui Vareli horhaowa. Chiwui vang eina Joashli bichar tāsera.
25Aramwui raimibingna ali marlak eina khamā za̱haida horhailaga thuikahai eina awui raobingna pāngmon Jehoiadawui naomayarawui asheewui vang ali ngathumda, awui petli ali sāthathaowa. A thihaida Davidwui keinungli chifahaowa, kha awungabingwui chikhurli machifamana. 26Awuitungli ngathum kahaibing chi hibingna: Ammonlā Shimeathwui naomayara Zabad, kala Moabpava̱ Shimrithwui naomayara Jehozabadna. 27Awui naomayarabing, awuitungli hāngkahai khamarān kachungkha, kala ithumwui Avāwui shim sākakā chi Awungabingwui Lairikwui thotchan lairikli kapiserhaida lei; anaomayara Amaziahna awui mahut thuishina.
