2 Thotrinchān 23

23 ¹Kashine kumli Jehoiadana malung pingda, shāshāwui raithānabing, Azariah Jerohamwui naomayara, Ishmael Jehohananwui naomayara, Azariah Obedwui naomayara, Ma-aseiah Adaiahwui naomayara, kala Elishaphat Zichriwui naomayara, athumli ngasoda tuingashit sai. ²Athumna Judah ngaleili vālaga, keinung saikora eina Levinaobing kala Israelwui shimkhur kathānabing chi kazipkhuilaga Jerusalemli rāsai. ³Rakakazip katongana ithumwui Avāwui shimli awungali ngasoda tuingashit sai. Jehoiadana athumli hānga, "Yanglu, ithumwui Avāna Davidwui naomayarabingwui pongli ngashit kahai athishurda, awungawui naomayarana mungra. ⁴Hithāda sālu: Sabbaththang kazang pāngmonbing kala Levinaobing nathumwui kathum tang akhana khāmongwui ngavei khamayona sāra. ⁵kathum tang akha awungawui shimli leira, kathum tang akha Shimphungawui Ngaveili leira, kala mi saikora ithumwui Avāwui shimwui yāngkhupli leira. ⁶Pāngmonbing kala otram ngatha̱ Levinaobing maningla, mi khipākha ithumwui Avāwui shimli mazangaranu; athum zangpaira, kaja athum kathara. Mi kateibing saikorana ithumwui Avāwui vang khamayon sāphalungra. ⁷Levinaobingna kachichāwui pāngli zeighai singda awungali kuinamra; shimli kazanga mi chi shaothatra. Awungana unglala ungriplu, vālala variplu."

⁸Levinaobing kala Judah saikorana pāngmon Jehoiadana kaso kahai tākam eina sai. Kachichāna Sabbaththang otsak kazangbing kala shokbing awui mibing khui, kaja pāngmon Jehoiadana ngavei khamayon otpam khangayar kaikha mangathānngasakmana. ⁹Pāngmon Jehoiadana ithumwui Avāwui shimli hai kahai Awunga Davidwui kazei kala chāngvei ra̱pheng chi shāshāwui raithānabingli miya. ¹⁰Ana mi saikorali kachichāwui pāngli zeighai singda khorumshimwui azingshong eina atungshong eina tangda, hanphut, khorumshim, kala awungali kuinamda chipama. ¹¹Athumna awungawui naomayarali khuishoklaga, awungawui sāman honmilaga, tuingashit ain miya, kala ali awunga sākhui. Jehoiada kala awui naomayarabingna ali neomihaowa kala "Awunga mashimānla ringpamranu!" da vaowa. ^a a v11 Kadhara ain chi ithumwui Avāwui kadhara ainwui kapisang akhana, awunga thangnaowui pāngli hai kahai, ana akhalattawui khare eina maningla, ithumwui Avāwui khare atungli mungkahai kaji machutna.

Ithumwui Avāwui shimna khare tukkakhui awungva̱li khuithuimiser

¹²Mibing kayuivā kala awungali masot kachikatwui akhon kashā tharan, Athaliahna ithumwui Avāwui shimli athumli rāsai. ¹³Ana akhayang tharan, yanglu, awungana zangkhavai khāmongli awui pākra̱ ngalemli nganinga, awunga ngalemli raithānabing kala talla̱ kakhongbing china leisāsera; kala chi ngaleiwui mi saikorana mathānda talla̱ khonga, laa kasābingna akap-akai singda masotlaa sai. Chitharan Athaliahna "Yomhaira! Yomhaira!" da vaoshotna awui kachon serkhaka.

¹⁴Pāngmon Jehoiadana raimibingtungli khalei shāshāwui raithānabing chi hokhuilaga hānga, "Ali rankha ngachai eina ngavaimiserlu; ali kashura mi khipākha raighai eina shaothatlu." Kaja pāngmona hāngkahaina, "Ali ithumwui Avāwui shimli mashaothatalu." ¹⁵Athumna ali tukkhuihaowa; awungawui shim ngalemli khalei Sigui Ngaveiwui zangkhavai khāmongli ana kāro tharan, athumna chili ali shaothathaowa.

Jehoiadana ithumwui Avāwui kadhara kala shim hankhuiluishit

¹⁶Chitharan Jehoiadana akhalatta, mi saikora kala awunga ngachaili athum ithumwui Avāwui mibing sāra khavai tuingashit sai. ¹⁷Mi saikora Baalwui shimli vālaga ashaokhaitai; chiwui hanphutbing kala meoma̱bing shaokathānkhaimiserhaowa, kala Baalwui pāngmon Mattanli hanphut mangāli shaothathaowa. ¹⁸Moseswui ainli kapi kahai athishurda, kala Davidna kaso kahai athishurda khamathān kala laa eina ithumwui Avāli rikkatā kachigat khavai, Jehoiadana Davidna chili chipam kahai Leviwui pāngmonbing chi ithumwui Avāwui shimli phāsanga. ¹⁹Makathar mi khipākha mazang khavai ana ithumwui Avāwui shimwui ngaveibingli ngavei khamayonabing chipama. ²⁰Ana shāshāwui raithānabing, khangambing, mibingwui khamungabing, kala ngalei chiwui mi saikora hokhuida, awungali ithumwui Avāwui shimwui eina thānshoklaga, atowui ngavei eina awungawui shim kāshungchaoda kachuiunga; kala ana ali wungpamkhongli pamngasaka. ²¹Ngalei chiwui mi saikorana mathāna; kala keinung chi chingrihaowa, kaja Athaliahli raighai eina sāthata.