ଆମ୍ଭମାନଙ୍କ ପିତାଙ୍କ ପ୍ରତିଜ୍ଞାତ ରାଜା ରୂପେ ଯୋୟାଶ୍ ମୁକୁଟଧାରୀ

ଯିହୋୟାଦା ରକ୍ଷୀମାନଙ୍କୁ ସଂଗଠିତ କରନ୍ତି, ଲୁଚାଯାଇଥିବା ବାଳକଙ୍କୁ ବାହାରକୁ ଆଣନ୍ତି, ତାଙ୍କୁ ମୁକୁଟ ପିନ୍ଧାନ୍ତି ଏବଂ ରାଜା ଚିରଜୀବୀ ହୁଅନ୍ତୁ ବୋଲି ଜୟଧ୍ୱନି କରନ୍ତି। ଅଥଲିୟାଙ୍କୁ ହତ୍ୟା କରିବା ପାଇଁ ମନ୍ଦିର ବାହାରକୁ ନିଆଯାଏ, ବାଲ୍‌ର ମନ୍ଦିର ଭାଙ୍ଗି ଦିଆଯାଏ, ଏବଂ ଯାଜକ, ଲୋକମାନେ ଓ ରାଜା ଏକତ୍ର ଆମ ପିତାଙ୍କ ଲୋକ ହେବା ପାଇଁ ନିୟମ କରନ୍ତି।

ଅଧ୍ୟାୟ 23।

ସପ୍ତମ ବର୍ଷରେ ଯିହୋୟାଦା ସାହସ ଅବଲମ୍ବନ କରି ଶତପତିମାନଙ୍କ ସହିତ, ଅର୍ଥାତ୍ ଯିରୋହମ୍‌ଙ୍କ ପୁତ୍ର ଅସରୀୟ, ଯିହୋହାନନ୍‌ଙ୍କ ପୁତ୍ର ଇଶ୍ମାୟେଲ, ଓବେଦ୍‌ଙ୍କ ପୁତ୍ର ଅସରୀୟ, ଅଦାୟାଙ୍କ ପୁତ୍ର ମାସେୟ ଓ ସିଖ୍ରିଙ୍କ ପୁତ୍ର ଇଲୀଶାଫଟ୍‌ଙ୍କ ସହିତ ନିୟମ କଲେ। ସେମାନେ ଯିହୂଦା ଦେଶର ସର୍ବତ୍ର ଭ୍ରମଣ କରି ତହିଁର ସମସ୍ତ ନଗରରୁ ଲେବୀୟମାନଙ୍କୁ ଓ ଇସ୍ରାଏଲର ପିତୃବଂଶର ପ୍ରଧାନମାନଙ୍କୁ ଏକତ୍ର କଲେ, ପୁଣି ଯିରୂଶାଲମକୁ ଆସିଲେ। ସମଗ୍ର ସମାଜ ଆମ୍ଭମାନଙ୍କ ପିତାଙ୍କ ଗୃହରେ ରାଜାଙ୍କ ସହିତ ନିୟମ କଲେ। ଯିହୋୟାଦା ସେମାନଙ୍କୁ କହିଲେ, “ଦେଖ, ଦାଉଦଙ୍କ ପୁତ୍ରମାନଙ୍କ ବିଷୟରେ ଆମ୍ଭମାନଙ୍କ ପିତା ଯେପରି ପ୍ରତିଜ୍ଞା କରିଥିଲେ, ସେହିପରି ରାଜାଙ୍କ ପୁତ୍ର ରାଜତ୍ଵ କରିବେ। ତୁମ୍ଭେମାନେ ଏହା କର; ତୁମ୍ଭମାନଙ୍କ ମଧ୍ୟରୁ ଯେଉଁ ଯାଜକ ଓ ଲେବୀୟମାନେ ବିଶ୍ରାମବାରରେ ପ୍ରବେଶ କରନ୍ତି, ସେମାନଙ୍କର ତୃତୀୟାଂଶ ଦ୍ଵାର-ଦେଉଳିରେ ଦ୍ଵାରପାଳ ହେବେ; ତୃତୀୟାଂଶ ରାଜଗୃହରେ, ତୃତୀୟାଂଶ ଭିତ୍ତିମୂଳ-ଦ୍ଵାରରେ, ପୁଣି ସମସ୍ତ ଲୋକ ଆମ୍ଭମାନଙ୍କ ପିତାଙ୍କ ଗୃହର ପ୍ରାଙ୍ଗଣରେ ରହିବେ। ମାତ୍ର ଯାଜକମାନେ ଓ ପରିଚର୍ଯ୍ୟାକାରୀ ଲେବୀୟମାନଙ୍କ ବିନା ଆଉ କେହି ଆମ୍ଭମାନଙ୍କ ପିତାଙ୍କ ଗୃହରେ ପ୍ରବେଶ ନ କରୁ; ସେମାନେ ପବିତ୍ର ହେତୁ ପ୍ରବେଶ କରିପାରିବେ। ମାତ୍ର ଅନ୍ୟ ସମସ୍ତେ ଆମ୍ଭମାନଙ୍କ ପିତାଙ୍କ ଉଦ୍ଦେଶ୍ୟରେ ରକ୍ଷଣୀୟ ରକ୍ଷା କରିବେ। ପୁଣି ଲେବୀୟମାନେ ପ୍ରତ୍ୟେକେ ଆପଣା ଆପଣା ହସ୍ତରେ ଅସ୍ତ୍ର ଧରି ରାଜାଙ୍କ ଚତୁର୍ଦ୍ଦିଗରେ ବେଷ୍ଟନ କରିବେ; ପୁଣି ଯେ ଗୃହ ଭିତରକୁ ପ୍ରବେଶ କରେ, ସେ ହତ ହେବ। ରାଜା ଯେଉଁ ସ୍ଥାନକୁ ଯାଆନ୍ତି ଓ ଆସନ୍ତି, ତୁମ୍ଭେମାନେ ତାହାଙ୍କ ସଙ୍ଗରେ ରୁହ।”

ତହିଁରେ ଯିହୋୟାଦା ଯାଜକ ଯାହା ଯାହା ଆଜ୍ଞା ଦେଲେ, ତଦନୁସାରେ ଲେବୀୟମାନେ ଓ ସମଗ୍ର ଯିହୂଦା କଲେ। ଯିହୋୟାଦା ଯାଜକ ପାଳିବର୍ଗର କାହାକୁ ବିଦାୟ ନ କରିବାରୁ ପ୍ରତ୍ୟେକେ ବିଶ୍ରାମବାରରେ ପ୍ରବେଶକାରୀ ଓ ବିଶ୍ରାମବାରରେ ପ୍ରସ୍ଥାନକାରୀ ଆପଣା ଆପଣା ଲୋକମାନଙ୍କୁ ନେଲେ। ଆଉ ଯିହୋୟାଦା ଯାଜକ ଆମ୍ଭମାନଙ୍କ ପିତାଙ୍କ ଗୃହରେ ଥିବା ଦାଉଦ ରାଜାଙ୍କ ବର୍ଚ୍ଛା ଓ ବଡ଼ ଢାଲ ଓ ସାନ ଢାଲସବୁ ଶତପତିମାନଙ୍କୁ ଦେଲେ। ପୁଣି ସେ ସମସ୍ତ ଲୋକଙ୍କୁ, ପ୍ରତ୍ୟେକକୁ ହସ୍ତରେ ଅସ୍ତ୍ର ଧରାଇ, ମନ୍ଦିରର ଦକ୍ଷିଣ ପାର୍ଶ୍ୱରୁ ଉତ୍ତର ପାର୍ଶ୍ୱ ପର୍ଯ୍ୟନ୍ତ, ଯଜ୍ଞବେଦି ଓ ମନ୍ଦିର ଓ ରାଜାଙ୍କ ଚତୁର୍ଦ୍ଦିଗରେ ବେଷ୍ଟନ କରି ନିଯୁକ୍ତ କଲେ। ତହୁଁ ସେମାନେ ରାଜାଙ୍କ ପୁତ୍ରଙ୍କୁ ବାହାର କରି ଆଣି ତାହାଙ୍କ ମସ୍ତକରେ ମୁକୁଟ ଦେଲେ ଓ ତାହାଙ୍କ ହସ୍ତରେ ନିୟମ-ବ୍ୟବସ୍ଥା ଦେଇ ତାହାଙ୍କୁ ରାଜା କଲେ; ପୁଣି ଯିହୋୟାଦା ଓ ତାହାଙ୍କ ପୁତ୍ରମାନେ ତାହାଙ୍କୁ ଅଭିଷେକ କରି, “ରାଜା ଚିରଜୀବୀ ହେଉନ୍ତୁ!” ବୋଲି ଜୟଧ୍ୱନି କଲେ। ^a

ଆମ୍ଭମାନଙ୍କ ପିତାଙ୍କ ଗୃହ ସିଂହାସନ-ଅପହାରିଣୀ ରାଣୀଙ୍କୁ ତଡ଼ିଦିଅନ୍ତି

ଏଥିମଧ୍ୟରେ ଅଥଲୀୟା ଲୋକମାନଙ୍କ ଦୌଡ଼ିବା ଓ ରାଜାଙ୍କ ପ୍ରଶଂସା କରିବାର ଶବ୍ଦ ଶୁଣି ଆମ୍ଭମାନଙ୍କ ପିତାଙ୍କ ଗୃହକୁ ଲୋକମାନଙ୍କ ନିକଟକୁ ଆସିଲା। ଆଉ ସେ ଦୃଷ୍ଟିପାତ କରନ୍ତେ, ଦେଖ, ପ୍ରବେଶ-ସ୍ଥାନରେ ରାଜା ଆପଣା ସ୍ତମ୍ଭ ନିକଟରେ ଠିଆ ହୋଇଅଛନ୍ତି, ତାହାଙ୍କ ପାର୍ଶ୍ୱରେ ସେନାପତି ଓ ତୂରୀବାଦକମାନେ ଅଛନ୍ତି, ଦେଶର ସମସ୍ତ ଲୋକ ଆନନ୍ଦ କରି ତୂରୀ ବଜାଉଅଛନ୍ତି, ଆଉ ଗାୟକମାନେ ବାଦ୍ୟଯନ୍ତ୍ର ଧରି ପ୍ରଶଂସା-ଗାନ ଚଳାଉଅଛନ୍ତି। ସେତେବେଳେ ଅଥଲୀୟା ଆପଣା ବସ୍ତ୍ର ଚିରି, “ରାଜଦ୍ରୋହ! ରାଜଦ୍ରୋହ!” ବୋଲି ଡାକ ପକାଇଲା।

ତହୁଁ ଯିହୋୟାଦା ଯାଜକ ସୈନ୍ୟଦଳ ଉପରେ ନିଯୁକ୍ତ ଶତପତିମାନଙ୍କୁ ବାହାର କରି ଆଣି କହିଲେ, “ତାହାକୁ ଶ୍ରେଣୀ ମଧ୍ୟଦେଇ ବାହାର କରି ନିଅ; ଆଉ ଯେକେହି ତାହାର ପଛେ ଯାଏ, ତାହାକୁ ଖଡ୍ଗରେ ବଧ କର।” କାରଣ ଯାଜକ କହିଥିଲେ, “ଆମ୍ଭମାନଙ୍କ ପିତାଙ୍କ ଗୃହ ମଧ୍ୟରେ ତାହାକୁ ବଧ ନ କର।” ତେଣୁ ସେମାନେ ତାହାକୁ ଧରିଲେ; ପୁଣି ସେ ରାଜଗୃହ ନିକଟସ୍ଥ ଅଶ୍ୱ-ଦ୍ଵାରର ପ୍ରବେଶ-ସ୍ଥାନରେ ଉପସ୍ଥିତ ହୁଅନ୍ତେ, ସେମାନେ ସେହି ସ୍ଥାନରେ ତାହାକୁ ବଧ କଲେ।

ଯିହୋୟାଦା ଆମ୍ଭମାନଙ୍କ ପିତାଙ୍କ ନିୟମ ଓ ଗୃହ ପୁନଃସ୍ଥାପନ କରନ୍ତି

ଏଥିଉତ୍ତାରେ ସେମାନେ ଆମ୍ଭମାନଙ୍କ ପିତାଙ୍କ ଲୋକ ହେବା ନିମନ୍ତେ ଯିହୋୟାଦା ଆପଣା ଓ ସମସ୍ତ ଲୋକଙ୍କ ଓ ରାଜାଙ୍କ ମଧ୍ୟରେ ନିୟମ କଲେ। ଆଉ ସମସ୍ତ ଲୋକ ବାଲ୍‌ର ମନ୍ଦିରକୁ ଯାଇ ତାହା ଭାଙ୍ଗି ପକାଇଲେ, ଓ ତହିଁର ଯଜ୍ଞବେଦି ଓ ପ୍ରତିମାସବୁ ଚୂର୍ଣ୍ଣ କରି ପକାଇଲେ, ପୁଣି ଯଜ୍ଞବେଦି ସମ୍ମୁଖରେ ବାଲ୍‌ର ଯାଜକ ମତ୍ତନ୍‌କୁ ବଧ କଲେ। ଆଉ ଯିହୋୟାଦା, ମୋଶାଙ୍କ ବ୍ୟବସ୍ଥାରେ ଲିଖିତ ଅନୁସାରେ ଆମ୍ଭମାନଙ୍କ ପିତାଙ୍କ ଉଦ୍ଦେଶ୍ୟରେ ହୋମବଳି ଉତ୍ସର୍ଗ କରିବା ନିମନ୍ତେ, ଦାଉଦ ଯେଉଁ ଲେବୀୟ ଯାଜକମାନଙ୍କୁ ଆମ୍ଭମାନଙ୍କ ପିତାଙ୍କ ଗୃହରେ ନିଯୁକ୍ତ କରିଥିଲେ, ସେମାନଙ୍କ ହସ୍ତରେ ସେହି ଗୃହର ଭାର ଅର୍ପଣ କଲେ, ପୁଣି ଦାଉଦଙ୍କ ଆଜ୍ଞାନୁସାରେ ଆନନ୍ଦ ଓ ଗାନ ସହିତ ତାହା କରାଇଲେ। ପୁଣି କୌଣସି ପ୍ରକାରେ ଅଶୁଚି କୌଣସି ଲୋକ ଯେପରି ପ୍ରବେଶ ନ କରେ, ଏଥିପାଇଁ ସେ ଆମ୍ଭମାନଙ୍କ ପିତାଙ୍କ ଗୃହର ଦ୍ଵାରସମୂହରେ ଦ୍ଵାରପାଳମାନଙ୍କୁ ନିଯୁକ୍ତ କଲେ। ଆଉ ସେ ଶତପତିମାନଙ୍କୁ, କୁଳୀନମାନଙ୍କୁ, ଲୋକମାନଙ୍କ ଉପରେ ଥିବା ଶାସନକର୍ତ୍ତାମାନଙ୍କୁ ଓ ଦେଶର ସମସ୍ତ ଲୋକଙ୍କୁ ନେଲେ, ପୁଣି ରାଜାଙ୍କୁ ଆମ୍ଭମାନଙ୍କ ପିତାଙ୍କ ଗୃହରୁ ଓହ୍ଲାଇ ଆଣି ଉପର-ଦ୍ଵାର ଦେଇ ରାଜଗୃହକୁ ନେଇଗଲେ, ଆଉ ରାଜସିଂହାସନରେ ତାହାଙ୍କୁ ବସାଇଲେ। ତହିଁରେ ଦେଶର ସମସ୍ତ ଲୋକ ଆନନ୍ଦ କଲେ, ପୁଣି ନଗର ଶାନ୍ତ ହେଲା; କାରଣ ସେମାନେ ଅଥଲୀୟାକୁ ଖଡ୍ଗରେ ବଧ କରିଥିଲେ।