ଦ୍ଵିତୀୟ ବଂଶାବଳୀ 22 FHB Father's Heart Bible™

22 ¹ଯିରୂଶାଲମ ନିବାସୀମାନେ ତାହାର କନିଷ୍ଠ ପୁତ୍ର ଅହସୀୟଙ୍କୁ ତାହାର ପଦରେ ରାଜା କଲେ, କାରଣ ଆରବୀୟମାନଙ୍କ ସହିତ ଛାଉଣିକୁ ଆସିଥିବା ଲୁଣ୍ଠନକାରୀମାନେ ତାହାର ବଡ଼ ପୁତ୍ରମାନଙ୍କୁ ବଧ କରିଥିଲେ। ଏଣୁ ଯିହୂଦାର ରାଜା ଯିହୋରାମଙ୍କ ପୁତ୍ର ଅହସୀୟ ରାଜା ହେଲେ। ²ଅହସୀୟ ବାଇଶି ବର୍ଷ ବୟସରେ ରାଜା ହୋଇ ଯିରୂଶାଲମରେ ଏକ ବର୍ଷ ରାଜ୍ୟ କଲେ। ତାହାଙ୍କ ମାତାଙ୍କ ନାମ ଅଥଲୀୟା, ସେ ଅମ୍ରିର ନାତୁଣୀ ଥିଲେ। ³ସେ ମଧ୍ୟ ଆହାବ ବଂଶର ପଥ ଅନୁସରଣ କଲେ, କାରଣ ତାହାଙ୍କ ମାତା ତାହାଙ୍କୁ ଦୁଷ୍କର୍ମ କରିବା ନିମନ୍ତେ ପରାମର୍ଶ ଦେଲେ। ⁴ଆହାବ ବଂଶ ସଦୃଶ ସେ ଆମ୍ଭମାନଙ୍କ ପିତାଙ୍କ ଦୃଷ୍ଟିରେ କୁକର୍ମ କଲେ, କାରଣ ତାହାଙ୍କ ପିତାଙ୍କ ମୃତ୍ୟୁ ପରେ ସେମାନେ ତାହାଙ୍କ ବିନାଶ ନିମନ୍ତେ ତାହାଙ୍କର ମନ୍ତ୍ରଣାଦାତା ହେଲେ। ⁵ସେ ସେମାନଙ୍କ ପରାମର୍ଶ ମଧ୍ୟ ଅନୁସରଣ କଲେ, ଆଉ ଅରାମର ରାଜା ହସାୟେଲ ବିରୁଦ୍ଧରେ ରାମୋତ୍-ଗିଲୀୟଦ୍‌ରେ ଯୁଦ୍ଧ କରିବା ନିମନ୍ତେ ଇସ୍ରାଏଲର ରାଜା ଆହାବଙ୍କ ପୁତ୍ର ଯୋରାମଙ୍କ ସହିତ ଗଲେ, ସେଠାରେ ଅରାମୀୟମାନେ ଯୋରାମଙ୍କୁ କ୍ଷତବିକ୍ଷତ କଲେ। ⁶ତେଣୁ ସେ ଅରାମର ରାଜା ହସାୟେଲ ବିରୁଦ୍ଧରେ ଯୁଦ୍ଧ କରିବା ସମୟରେ ରାମାଠାରେ ପ୍ରାପ୍ତ କ୍ଷତରୁ ସୁସ୍ଥ ହେବା ନିମନ୍ତେ ଯିଷ୍ରିୟେଲକୁ ଫେରିଗଲେ। ଆଉ ଯିହୂଦାର ରାଜା ଯିହୋରାମଙ୍କ ପୁତ୍ର ଅହସୀୟ ଆହାବଙ୍କ ପୁତ୍ର ଯୋରାମଙ୍କୁ ଦେଖିବା ନିମନ୍ତେ ଯିଷ୍ରିୟେଲକୁ ଗଲେ, କାରଣ ସେ କ୍ଷତବିକ୍ଷତ ହୋଇଥିଲେ।

⁷ଅହସୀୟ ଯୋରାମଙ୍କ ନିକଟକୁ ଯିବା ଦ୍ଵାରା ତାହାଙ୍କ ବିନାଶ ଆମ୍ଭମାନଙ୍କ ପିତାଙ୍କଠାରୁ ଘଟିଲା। କାରଣ ସେ ଆସି ଆହାବ ବଂଶକୁ ବିନାଶ କରିବା ନିମନ୍ତେ ଆମ୍ଭମାନଙ୍କ ପିତାଙ୍କ ଦ୍ଵାରା ଅଭିଷିକ୍ତ ନିମ୍‌ଶିର ପୁତ୍ର ଯେହୂ ବିରୁଦ୍ଧରେ ଯିହୋରାମଙ୍କ ସହିତ ବାହାରିଲେ। ⁸ଯେହୂ ଆହାବ ବଂଶ ଉପରେ ଦଣ୍ଡ ସାଧନ କରୁଥିବା ସମୟରେ ସେ ଯିହୂଦାର ଅଧିପତିମାନଙ୍କୁ ଓ ଅହସୀୟଙ୍କ ସେବାକାରୀ ଅହସୀୟଙ୍କ ଭ୍ରାତୃପୁତ୍ରମାନଙ୍କୁ ପାଇ ସେମାନଙ୍କୁ ବଧ କଲେ। ⁹ପୁଣି ସେ ଅହସୀୟଙ୍କୁ ଅନୁସନ୍ଧାନ କଲେ, ଆଉ ସେ ଶମରୀୟାରେ ଲୁଚିଥିବା ବେଳେ ଧରାଗଲେ। ସେମାନେ ତାହାଙ୍କୁ ଯେହୂ ନିକଟକୁ ଆଣି ବଧ କଲେ, ପୁଣି ତାହାଙ୍କୁ କବର ଦେଇ କହିଲେ, “ସେ ଯିହୋଶାଫଟଙ୍କ ପୁତ୍ର, ଯେ ସମସ୍ତ ଅନ୍ତଃକରଣ ସହିତ ଆମ୍ଭମାନଙ୍କ ପିତାଙ୍କର ଅନ୍ଵେଷଣ କରିଥିଲେ।” ଏଣୁ ଅହସୀୟଙ୍କ ବଂଶରେ ରାଜ୍ୟ ଧରି ରଖିବା ପାଇଁ ଯଥେଷ୍ଟ ବଳଵାନ କେହି ରହିଲା ନାହିଁ।

ଆମ୍ଭମାନଙ୍କ ପିତାଙ୍କ ଗୃହରେ ଲୁଚାଯାଇଥିବା ଏକ ଶିଶୁ

¹⁰ଅହସୀୟଙ୍କ ମାତା ଅଥଲୀୟା ଆପଣା ପୁତ୍ର ମୃତ ବୋଲି ଦେଖନ୍ତେ, ଯିହୂଦା ବଂଶର ସମସ୍ତ ରାଜବଂଶକୁ ବିନାଶ କରିବା ନିମନ୍ତେ ଉଦ୍ୟତ ହେଲେ। ¹¹କିନ୍ତୁ ରାଜକନ୍ୟା ଯିହୋଶାବୀୟତ୍ ଅହସୀୟଙ୍କ ପୁତ୍ର ଯୋୟାଶ୍‌ଙ୍କୁ ନେଇ ହତ ହେବାକୁ ଯାଉଥିବା ରାଜପୁତ୍ରମାନଙ୍କ ମଧ୍ୟରୁ ତାହାଙ୍କୁ ଚୋରାଇ ଆଣି ତାହାଙ୍କ ଧାତ୍ରୀ ସହିତ ଗୋଟିଏ ଶୟନକକ୍ଷରେ ଲୁଚାଇ ରଖିଲେ। ଏହିରୂପେ ରାଜା ଯିହୋରାମଙ୍କ କନ୍ୟା, ଯିହୋୟାଦା ଯାଜକଙ୍କ ଭାର୍ଯ୍ୟା ଓ ଅହସୀୟଙ୍କ ଭଗିନୀ ଯିହୋଶାବୀୟତ୍ ତାହାଙ୍କୁ ଅଥଲୀୟାଠାରୁ ଲୁଚାଇ ରଖିବାରୁ ସେ ତାହାଙ୍କୁ ବଧ କଲେ ନାହିଁ। ¹²ଅଥଲୀୟା ଦେଶ ଉପରେ ରାଜ୍ୟ କରୁଥିବା ସମୟରେ ସେ ଛଅ ବର୍ଷ ପର୍ଯ୍ୟନ୍ତ ସେମାନଙ୍କ ସହିତ ଆମ୍ଭମାନଙ୍କ ପିତାଙ୍କ ଗୃହରେ ଲୁଚି ରହିଲେ।