Ithe witũ Araniina Wathani Mũũru wa Ahazia

Ahazia aathamaka mwaka ũmwe, agĩtaarwo nĩ nyina Athalia eeke ũũru, agĩkua ũragani-inĩ wa Jehu. Athalia agĩcooka akĩũraga nyũmba ya ũthamaki — othe tiga kaana kamwe, karĩa kaahithirwo nĩ mũtumia wa mũthĩnjĩri-ngai nyũmba-inĩ ya Ithe witũ mĩaka ĩtandatũ, nake agĩthamaka.

Gĩcunjĩ 22.

Nao andũ a Jerusalemu magĩtua Ahazia, mũriũ wake ũrĩa mũnini mũno, mũthamaki ithenya rĩake, tondũ atharĩkĩri arĩa ookire na Aarabu kambĩinĩ nĩmooragĩte aariũ ake othe arĩa akũrũ. Nĩ ũndũ ũcio Ahazia mũrũ wa Jehoramu mũthamaki wa Juda agĩtuĩka mũthamaki. Ahazia aarĩ na mĩaka mĩrongo ĩĩrĩ na ĩĩrĩ rĩrĩa aatuĩkire mũthamaki, na agĩthamaka mwaka ũmwe arĩ Jerusalemu. Nyina eetagwo Athalia, mwarĩ wa mũriũ wa Omuri. O nake agĩthiĩ na njĩra cia nyũmba ya Ahabu, tondũ nyina nĩamũtaaraga eeke ũũru. Nake agĩĩka ũũru maithoinĩ ma Ithe witũ, o ta nyũmba ya Ahabu, tondũ thuutha wa gĩkuũ kĩa ithe nĩo maarĩ ataari ake, naguo ũndũ ũcio ũgĩtuĩka mwanangĩko wake. O nake akĩrũmĩrĩra kĩrĩra kĩao, agĩthiĩ hamwe na Joramu mũrũ wa Ahabu, mũthamaki wa Isiraeli, kũrũa na Hazaeli mũthamaki wa Aramu kũu Ramothu-gileadi, kũrĩa Aaramu maatiihangirie Joramu. Nĩ ũndũ ũcio agĩcooka Jezireeli nĩguo ahone ironda iria aagurarĩtio kũu Rama rĩrĩa aarũaga na Hazaeli mũthamaki wa Aramu. Nake Ahazia mũrũ wa Jehoramu mũthamaki wa Juda agĩikũrũka Jezireeli nĩguo one Joramu mũrũ wa Ahabu, tondũ nĩatihĩtio.

Naguo mwanangĩko wa Ahazia woimire kwĩ Ithe witũ rĩrĩa aathiĩte gũceerera Joramu. Aakinya, akiumagara hamwe na Jehoramu magĩthiĩ gũũkĩrĩra Jehu mũrũ wa Nimushi, ũrĩa Ithe witũ aaitĩrĩirie maguta nĩguo aniine nyũmba ya Ahabu. Na rĩrĩa Jehu aaciirithagia nyũmba ya Ahabu, agĩkora anene a Juda na ihwa cia Ahazia iria ciatungatagĩra Ahazia, akĩmooraga. Agĩcaria Ahazia, nake akĩnyiitwo rĩrĩa eehithĩte Samaria. Makĩmũrehe kwĩ Jehu, makĩmũũraga, magĩcooka makĩmũthika, makiuga atĩrĩ, “Nĩ mũrũ wa Jehoshafatu, ũrĩa waacaragia Ithe witũ na ngoro yake yothe.” Nĩ ũndũ ũcio nyũmba ya Ahazia ndĩarĩ na mũndũ warĩ na hinya wa kũnyiita ũthamaki.

Mwana Mũhithe Thĩinĩ wa Nyũmba ya Ithe witũ

Na rĩrĩa Athalia, nyina wa Ahazia, oonire atĩ mũriũ nĩakuĩte, akĩambĩrĩria kũniina rũciaro ruothe rwa ũthamaki rwa nyũmba ya Juda. No Jehoshabeathu mwarĩ wa mũthamaki akĩoya Joashu mũrũ wa Ahazia, akĩmũiya kuuma gatagatĩinĩ ka ariũ a mũthamaki arĩa maarĩ hakuhĩ kũũragwo, akĩmũhitha hamwe na mũreri wake nyũmba ya gũkomwo. Nĩ ũndũ ũcio Jehoshabeathu, mwarĩ wa mũthamaki Jehoramu, mũtumia wa Jehoiada mũthĩnjĩri Ngai na mwarĩ wa nyina na Ahazia, akĩmũhitha kuuma kwĩ Athalia, nĩ ũndũ ũcio ndaigana kũmũũraga. Nake agĩikara ehithĩte hamwe nao thĩinĩ wa nyũmba ya Ithe witũ mĩaka ĩtandatũ rĩrĩa Athalia aathamakaga bũrũri ũcio.