2 ዜና መዋዕል 22

22 ¹ከዐረቦች ጋራ ወደ ሰፈሩ የመጡት ወራሪዎች ታላላቆቹን ልጆች ሁሉ ስለ ገደሉ፣ የኢየሩሳሌም ሰዎች ታናሽ ልጁን አካዝያስን በእርሱ ፋንታ አነገሡት። እንዲሁም የይሁዳ ንጉሥ የኢዮራም ልጅ አካዝያስ ነገሠ። ²አካዝያስ በነገሠ ጊዜ ዕድሜው ሃያ ሁለት ዓመት ነበር፤ በኢየሩሳሌምም አንድ ዓመት ነገሠ። እናቱ የአምሪ የልጅ ልጅ ጎቶልያ ትባል ነበር። ³እርሱ ደግሞ የአክዓብን ቤት መንገድ ተከተለ፤ እናቱ ክፉ እንዲያደርግ መክራዋለችና። ⁴እንደ አክዓብ ቤትም በአባታችን ፊት ክፉ አደረገ፤ ከአባቱ ሞት በኋላ ለጥፋቱ አማካሪዎቹ ሆነውለት ነበርና። ⁵ምክራቸውንም ደግሞ ተከተለ፤ ከእስራኤል ንጉሥ ከአክዓብ ልጅ ከኢዮራም ጋራ በራሞት ጊልያድ የአራምን ንጉሥ አዛኤልን ለመውጋት ሄደ፤ በዚያም አራማውያን ኢዮራምን አቈሰሉት። ⁶የአራምን ንጉሥ አዛኤልን ሲወጋ በራማ ከደረሱበት ቍስሎች ሊፈወስ ወደ ኢይዝራኤል ተመለሰ። የይሁዳ ንጉሥ የኢዮራም ልጅ አካዝያስም የአክዓብን ልጅ ኢዮራምን ለማየት ወደ ኢይዝራኤል ወረደ፤ ኢዮራም ቈስሎ ነበርና።

⁷የአካዝያስ ጥፋት ኢዮራምን በጐበኘ ጊዜ ከአባታችን ዘንድ መጣ። በደረሰም ጊዜ የአክዓብን ቤት ያጠፋ ዘንድ አባታችን በቀባው በናምሲ ልጅ በኢዩ ላይ ከኢዮራም ጋራ ወጣ። ⁸ኢዩም በአክዓብ ቤት ላይ ፍርድ ሲፈጽም የይሁዳን አለቆችና አካዝያስን ያገለግሉ የነበሩትን የአካዝያስን የወንድሞቹን ልጆች አገኘ፤ ገደላቸውም። ⁹አካዝያስንም ፈለገ፤ እርሱም በሰማርያ ተሰውሮ ሳለ ተያዘ። ወደ ኢዩም አምጥተው ገደሉት፤ ከዚያም፣ “በፍጹም ልቡ አባታችንን የፈለገ የኢዮሣፍጥ ልጅ ነው” ብለው ቀበሩት። ስለዚህ የአካዝያስ ቤት መንግሥቱን ለመያዝ የሚችል ብርቱ ሰው አጣ።

በአባታችን ቤት የተሰወረ ሕፃን

¹⁰የአካዝያስ እናት ጎቶልያ ልጇ መሞቱን ባየች ጊዜ፣ የይሁዳን ቤት የንጉሣዊ ዘር ሁሉ ልታጠፋ ተነሣች። ¹¹የንጉሡ ልጅ ኢዮሳብኣት ግን የአካዝያስን ልጅ ኢዮዓስን ወስዳ ሊገደሉ ካሉት የንጉሥ ልጆች መካከል ሰረቀችው፤ ከሞግዚቱም ጋራ በመኝታ ቤት ውስጥ ሰወረችው። እንዲሁም የንጉሡ የኢዮራም ልጅ፣ የካህኑ የዮዳሄ ሚስት የአካዝያስም እኅት ኢዮሳብኣት ከጎቶልያ ሰወረችው፤ ስለዚህ አልገደለችውም። ¹²ጎቶልያም በምድሪቱ ላይ ስትነግሥ እርሱ ከእነርሱ ጋራ በአባታችን ቤት ስድስት ዓመት ተሰውሮ ኖረ።