seneibü Bouei Ahazia amaibü songdakbü lottida
Ahaziaei po che Choba la yeikei, haonyu Athaliaei hao to amai kümla songsido kuko, hoba Jehu haitibü ka haikei. Kheijinei Athaliaei Choba chempen pendou haitikei—na che ong jouan, aoyou ungshedboueibü yakei seneibü Bou chema po lita apkuko, Athalia songdakbü lita.
22 1Arabbü yoa shaishang to loubü sangshibü shuongei jaishou shou shuong pendou haitibü shanga, Jerusalembü mütshuongei hao napeibou shou Ahazia hao jeiko Choba la yeitikei. Hibü Jihuda Choba Jehorameibü shou Ahaziaei songdakla khangkei. 2Ahazia songdakla khangjinei po saoto nyi kikei, hoba haoei Jerusalema po che songdakkei. Haonyu Omrieibü shi nouyangnyu Athalia nyenbü kikei. 3Haoeikei Ahab chemdangbü lamnyua paikei, aishanga haonyuei hao to ai amai kümla songsido kukei. 4Haoei Ahab chemdang tegü seneibü Bou thedanga ai amai kho kümbei; aishanga haobou haibü phaia haoen hao songsidobou shuong kikei, hoba khoei hao mautikei. 5Haoeikei haoeneibü songsido phai sembei, hoba Israel Choba Ahabeibü shou Joram yoa, Siria Choba Hazael khulimbo Ramoth Gilead to wapyola haukei; khonei Siriabüei Joram leilutikei. 6Hibü haoei Siria Choba Hazael khulimbo Ramaa wapyojinei haplabü leilubü ka maian apla shanga Jezreel to ngaikei. Jihuda Choba Jehorameibü shou Ahaziaei Ahabeibü shou Joram leilutikei shanga, hao hapla Jezreel to yankei.
7Ahazia mautibü kho Joram jungto onou hauan seneibü Bou ka loukei. Ladang haoei loukei, seneibü Bouei Ahab chemdang mautila shanga naangenbü Nimshieibü shou Jehu khulimbo haoei Jehoram yoa apyokei. 8Jehuei Ahab chemdang to matjemjinei, haoei Jihuda yaangenbü shuong hoba Ahazia to khangenbü Ahazia na shousi shuong hapan haitikei. 9Haoei Ahazia lambei, hoba Ahazia Samariaa hao lolo huan kijinei langsenan lapbei. Haoenei hao Jehu jungto leibakei hoba haitikei, kheijinei hao khünkei, laukei, “Hao kho Jehoshafateibü shou, aoei hao lulu maangponei seneibü Bou lambei.” Hibü Ahazia chemdanga sangle himlepla kaangbü müt akitei.
seneibü Bou chema huan kibü nashou che
10Ladang Ahazia haonyu Athaliaei hao shou haia dogo hapan, haoei Jihuda chemdangbü Choba thensilen pendou mautila khangkei. 11Lausikei Choba nouyangnyu Jehoshabeathei Ahaziaeibü shou Joash leian louan, haitila khangbü Choba shousi shuong kanglang ka hao huonei satenkei, hoba hao thuinyu yoa yepshang thükto huan phokei. Hibü Choba Jehoram nouyangnyu, ungshedbou Jehoiadaeibü yak hoba Ahaziaeibü na Jehoshabeathei, Athalia ka hao huan phojinei, saoei hao ahaitikei. 12Athaliaei kaodak thüka songdakjinei, Joash haoen yoa seneibü Bou chema po lak huan kikei.
