Iming'ini Kwandanyo laitornatetap Ahasia ne ya
Ki laitoran Ahasia kenyiit agenge, ak ki ing'omchi kamennyi Athaliah koyai ne ya, ak ki me eng' ng'emisyetap Jehu. Yeityo kobar Athaliah koriigap laitornatet—agoi lakwet ne ming'in agenge, ne ki un kwaanetap tisiindet eng' kootap Kwandanyo kenyiisyek lo, ye laitoranei ineendet.
22 1Kiyai piigap Jerusalem weeriinnyi ne ming'in Ahasia koek laitoryat kogeer ineendet, amu kiga kobar luulik, che ki pwa kobooto Arabuuk eng' nganaseet, weeriik tugul che eecheen. Ki ek anyun laitoryat Ahasia weeriitap Jehoram laitoryatap Judah. 2Ki tinyei Ahasia kenyiisyek tiptem ak aeng' ye ki toi kolaitoran, ak ki laitoran kenyiit agenge eng' Jerusalem. Ki kamennyi Athaliah, tegetap weeriitap Omri. 3Ki isup ineendet kora ortinwegap kootap Ahab, amu ki ing'omchi kamennyi ineendet koyai ne ya. 4Ki yai ne ya eng' koonyek che po Kwandanyo, ko uu kootap Ahab, amu kingo kobek kwandanyi, ki ek icheek ing'omigyik, kot koit ng'emisyennyi. 5Ki isup kora ng'omnatennywa, ak kwo kobooto Joram weeriitap Ahab laitoryatap Israel, kobargei ak Hazael laitoryatap Aram eng' Ramot-gilead, ak ki guoten piigap Syria Joram. 6Ki week anyun kwo Jezreel si kosap eng' guotosyek che ki kinyoor eng' Ramah ye ki bargei ak Hazael laitoryatap Aram. Ki pa Ahasia weeriitap Jehoram laitoryatap Judah koba Jezreel, kogeer Joram weeriitap Ahab, amu ki guoten.
7Ki punu eng' Kwandanyo ng'emisyetap Ahasia, ye ki rutoochi Joram. Ye kingo it, komong' kobooto Jehoram kobargei ak Jehu weeriitap Nimshi, ne ki kiil Kwandanyo si kong'em kootap Ahab. 8Ye ki yai Jehu kirwooget eng' kootap Ahab, konyoor pounigap Judah ak lagogap tupchetap Ahasia che ki tononjin Ahasia, ak kobar icheek. 9Ki cheeng' Ahasia, ak ki kinam ye kingo unyegei eng' Samaria. Ki imut ineendet ole mi Jehu ak kobar, yeityo kotup, kole, “Weeriitap Jehoshaphat, ne ki cheeng' Kwandanyo eng' muguleldanyi komugul.” Ko ma mi anyun kootap Ahasia chiito ne kimnotigei ne yamei koriip laitornatet.
Lakweet ne ki kiuny eng' kootap Kwandanyo
10Kingo keer Athaliah, kametap Ahasia, kole kagome weeriinnyi, kong'eetyo kong'em iyoteetap laitornatet tugul che po kootap Judah. 11Ago ki nam Jehoshabeath tegetap laitoryat Joash weeriitap Ahasia, kochoor ineendet kong'etune kwenutap weeriigap laitoryat che kimache kebar, ak kouny ineendet kobooto cheplakwennyi eng' koot ne kirue. Ki uny anyun Jehoshabeath, tegetap Laitoryat Jehoram, osotyotap Jehoiada kitisiindet, ak tupchetap Ahasia, ineendet eng' Athaliah, si mobar ineendet. 12Ki pa kotebee kobooto icheek ko unyegei eng' kootap Kwandanyo kenyiisyek lo, ye kilaitoran Athaliah eng' emet.