An Naɗa Yowash Sarki, Wanda Ubanmu Ya Yi Alkawarinsa

Yehoyada ya shirya masu gadi, ya fito da yaron da aka ɓoye, ya naɗa shi sarki, aka yi sowa, ran sarki ya daɗe. Aka fitar da Ataliya waje da haikali aka kashe ta, aka rushe haikalin Ba'al, firist da jama'a da sarki kuma suka yi alkawari tare cewa za su zama jama'ar Ubanmu.

Babi na 23.

A shekara ta bakwai Yehoyada ya ƙarfafa zuciyarsa, ya kuma yi alkawari da shugabannin sojoji ɗari-ɗari, wato Azariya ɗan Yeroham, da Isma'ila ɗan Yehohanan, da Azariya ɗan Obed, da Ma'aseya ɗan Adaya, da Elishafat ɗan Zikri. Suka zazzaga ƙasar Yahuda, suka tattara Lawiyawa daga dukan garuruwanta da shugabannin iyalan Isra'ila, suka kuma zo Urushalima. Dukan taron suka yi alkawari da sarki a gidan Ubanmu. Yehoyada ya ce musu, “Ga shi, ɗan sarki zai yi sarauta, kamar yadda Ubanmu ya yi alkawari game da 'ya'yan Dawuda. Ga abin da za ku yi, kashi ɗaya bisa uku naku, wato firistoci da Lawiyawan da suke shigowa aiki ranar Asabar, su zama masu tsaron ƙofofi. Kashi ɗaya bisa uku kuma a gidan sarki, kashi ɗaya bisa uku a Ƙofar Harsashi, dukan mutane kuwa a filayen gidan Ubanmu. Kada kowa ya shiga gidan Ubanmu sai dai firistoci da Lawiyawan da suke yin hidima; su ne za su iya shiga, gama su masu tsarki ne. Sauran jama'a duka kuwa su kiyaye aikin tsaron Ubanmu. Dole Lawiyawa su kewaye sarki, kowa da makaminsa a hannunsa; duk wanda ya shiga gidan, dole a kashe shi. Ku kasance tare da sarki duk inda ya je ko ya zo.”

Lawiyawa da dukan Yahuda suka yi daidai yadda Yehoyada firist ya umarta. Kowanne ya ɗauki mutanensa, waɗanda suke shigowa aiki ranar Asabar tare da waɗanda suke fita, domin Yehoyada firist bai sallami kowace ƙungiya ba. Yehoyada firist ya ba shugabannin sojoji ɗari-ɗari māsu da manyan garkuwoyi da ƙanana na Sarki Dawuda, waɗanda ake ajiyewa a gidan Ubanmu. Ya kuma tsai da dukan mutane, kowa da makaminsa a hannunsa, daga gefen kudu na haikalin har zuwa gefen arewa, suna kewaye da bagadin da haikalin da kuma sarki. Sai suka fito da ɗan sarki, suka naɗa masa rawani, suka ba shi dokar alkawari, suka kuma naɗa shi sarki. Yehoyada da 'ya'yansa suka shafe shi da mai, suka ɗaga murya suka ce, “Ran sarki yă daɗe!” ^a

Gidan Ubanmu Ya Kori Sarauniyar da Ta Ƙwace Sarauta

Da Ataliya ta ji karar mutane suna gudu suna yabon sarki, sai ta zo wurinsu a gidan Ubanmu. Ta duba, sai ga sarki tsaye kusa da ginshiƙinsa a mashigin, shugabanni da masu busa ƙaho suna gefensa, dukan mutanen ƙasar suna farin ciki suna busa ƙahoni, mawaƙa da kayan kiɗa suna jagorancin yabo. Sai Ataliya ta yage tufafinta ta ɗaga murya ta ce, “Cin amana! Cin amana!”

Yehoyada firist ya kirawo shugabannin sojoji ɗari-ɗari waɗanda suke kan rundunar ya ce, “Ku fitar da ita ta cikin sahu; duk wanda ya bi ta, a kashe shi da takobi.” Gama firist ɗin ya riga ya ce, “Kada a kashe ta a gidan Ubanmu.” Sai suka kama ta; da ta kai mashigin Ƙofar Dawakai kusa da gidan sarki, sai suka kashe ta a can.

Yehoyada Ya Maido da Alkawari da Gidan Ubanmu

Sa'an nan Yehoyada ya yi alkawari tsakaninsa da dukan mutane da kuma sarki, cewa za su zama mutanen Ubanmu. Dukan mutane suka tafi haikalin Ba'al suka rushe shi, suka farfasa bagadansa da gumakansa, suka kuma kashe Mattan, firist na Ba'al, a gaban bagadan. Yehoyada ya sa firistoci Lawiyawa su lura da gidan Ubanmu, waɗanda Dawuda ya naɗa a can, domin su miƙa hadayun ƙonawa ga Ubanmu, kamar yadda aka rubuta a dokar Musa, da farin ciki da waƙa yadda Dawuda ya umarta. Ya kuma tsai da masu tsaron ƙofofi a ƙofofin gidan Ubanmu domin kada wani marar tsarki a kowace hanya ya shiga. Ya ɗauki shugabannin sojoji ɗari-ɗari, da manyan mutane, da masu mulkin jama'a, da dukan mutanen ƙasar, suka gangarar da sarki daga gidan Ubanmu, suka bi ta Ƙofar Bisa suka shiga gidan sarki, suka zaunar da shi a kan kujerar sarauta. Dukan mutanen ƙasar suka yi farin ciki, birnin kuma ya natsu, gama an kashe Ataliya da takobi.