Wazodi wa Mambu ma Bilumbu 24 FHB Father's Heart Bible™

24 ¹Yowasi wákituka kyamvu bwosu kákala yi mimvu nsambwadi, amana wáyadila mimvu makumaya ku Yelusalemi. Ngudi wandi Zibiya kákala mwisi Beeli-Seba. ²Yowasi wáhanga mambu ma masonga ku mesu ma Tata wetu mu bilumbu byosu bya Yehoyada nganga Nzambi. ³Yehoyada wámusobila bakhetu bodi, amana Yowasi kábuta bana ba bayakala yi bana ba bakhetu.

⁴Kunima dya mana, Yowasi wáyidika mbundu yandi mu kutungulula nzu ya Tata wetu. ⁵Wákutikisa banganga Nzambi yi balefi, amana wubazimbwadi: «Lwendenu ku mbanza za Yuta, lutonguna mbongu kwena Kiseledi kyosu mvula muna mvula mu kuyílulula nzu ya Tata wenu. Lwahanga tswatsu.» Kaasi balefi ká bahangaku tswatsu. ⁶Kyamvu wátedisa Yehoyada mbuta wa banganga Nzambi, amana wumuzimbwadi: «Kikuma kya biki wukondi lomba kwena balefi mu kunata phaku tuka ku Yuta yi ku Yelusalemi, yina Moyize musadi wa Tata wetu yi lukutakanu báyidikila Kiseledi kikuma kya sombolu dya kimbangi?» ^a a v6 Sombolu dya kimbangi dyákala nzu ya Nzambi ya Kiseledi, yina bakala nata mu dikanga, disongidila Sombolu dya Nzambi. ⁷Bana ba Ataliya, mukhetu yina wa mbi, bábula nzu ya Tata wetu, amana basadila bima byosu bitoma bya nzu ya Tata wetu mu kusambila banzambi Baala.

⁸Mu lutumunu lwa kyamvu, báhanga kesa amana bádisidika ku phenza ya mwelu wa nzu ya Tata wetu. ⁹Básamuna mu Yuta yi mu Yelusalemi ni: lunata kwena Tata wetu phaku yina Moyize musadi wa Tata wetu kásidikila Kiseledi mu dikanga. ¹⁰Bapfumu boosu yi batu boosu bámona kyesi, bakala nata yi kulosa makabu ma bawu mu kesa, yihakana kyabasa. ¹¹Kosu tangwa balefi bákala nata kesa kwena bapfumu ba kyamvu amana bákala mona ni kyabasa mbongu, musoniki wa kyamvu yi musadi wa mbuta wa banganga Nzambi bakala katula mbongu amana bakala kivutula ku homa kyandi. Kilumbu muna kilumbu bakala tonguna mbongu za lawu. ¹²Kyamvu yi Yehoyada bákala hana mbongu kwena basadi ba kisalu kya nzu ya Tata wetu. Basadi bawu bákala bongila basadi ba matadi yi basadi ba miti mu kisalu kya kuyílulula nzu ya Tata wetu, yi basadi ba bisengu yi ba kibende mu kuyílulula yawu. ¹³Basadi bakala sala kisalu, amana muhangu wa kuyílulula wukwamini mu moku ma bawu. Básungika nzu ya Tata wetu bwosu yákala ku luyandiku amana básyamisa yawu. ¹⁴Bwosu bámanisa, bánata mbongu zina zásala kwena kyamvu yi Yehoyada. Mu zawu báhanga bilekwa bya nzu ya Tata wetu: malonga ma kisalu yi ma bimenga bya kuyoka, bilongo, malonga ma wolu yi ma manzanza. Bakala tambika bimenga bya kuyoka mu nzu ya Tata wetu kosu tangwa, mu bilumbu byosu bya luzingu lwa Yehoyada.

¹⁵Yehoyada wanúna, mimvu myandi myakala mya lawu, buna wáfwa. Mu lufwa lwandi kákala yi mimvu lukama yi makumatatu. ¹⁶Bámuzika mu Mbanza ya Tavidi hana kati dya bakyamvu, kikuma kya mambu mamboti kahánga mu Kiseledi kwena Tata wetu yi nzu yandi.

Yowasi Wusisa Tata wetu Kunima dya Lufwa lwa Yehoyada

¹⁷Kunima dya lufwa lwa Yehoyada, bapfumu ba Yuta bakwísa amana báfukamina kyamvu, buna yandi wábayuka. ¹⁸Básisa nzu ya Tata wetu, Nzambi wa bakhulu ba bawu, amana basadila miti mya Asela yi banzambi. Buna khabu yása ha thandu ya Yuta yi Yelusalemi kikuma kya ndola yayi. ¹⁹Kaasi Tata wetu wábatumina bambikudi mu kuvutula bawu kwena yandi; bawu bábalubula, kaasi ká bazólaku kuyuka.

²⁰Buna Kitembu kya Tata wetu kyisa ha thandu ya Zakadiya mwana wa Yehoyada nganga Nzambi. Wátelama ku thwala ya batu amana wuzimbudi: «Tata wetu wuzimbudi bwabu: Kikuma kya biki lwisi bula mitsiku myandi? Lwisiku nunga. Mukuma lwámusisa, buna yandi wulusisi.»

²¹Bámukasila kifwandu, amana bámutimbwala matadi mu kyanzala kya nzu ya Tata wetu mu lutumunu lwa kyamvu. ²²Kyamvu Yowasi wázimbakana kindumba kina tata wa Zakadiya, disongidila Yehoyada, kámusongila, amana wáhonda mwana wandi. Bwosu Zakadiya kákala mu kufwa, wuzimbudi: «Tata wetu kamona amana kafútisa dyawu.»

Mukanu wa Tata wetu Wubwila ha Yowasi Wukonda Kwikama

²³Muna nsukumuku wa mvula, nkangu wa mvita wa Alami wámunwanina Yowasi, bákota mu Yuta yi Yelusalemi, báhonda bapfumu boosu ba batu, amana báthumina muluta wa bawu wosu kwena kyamvu wa Tamasi. ²⁴Ata nkangu wa mvita wa Alami wakwísa yi batu ba khunda, Tata wetu wáhana nkangu wa mvita wa lawu mu moku ma bawu, mukuma Yuta wásisa Tata wetu, Nzambi wa bakhulu ba bawu. Buna mukanu wábwa ha thandu ya Yowasi.

²⁵Bwosu bisi Alami bákatuka, bámusisa yi phuta za lawu, basadi bandi bámukasila kifwandu kikuma kya menga ma mwana wa Yehoyada nganga Nzambi, amana bámuhonda hana thangi yandi. Wáfwa, amana bámuzika mu Mbanza ya Tavidi, kaasi keku mu mazyamu ma bakyamvu. ²⁶Batu bana bámukasila kifwandu bawu bawu: Zabadi mwana wa Simeyati, mukhetu mwisi Amoni, yi Yehozabadi mwana wa Similiti, mukhetu mwisi Mowaba. ²⁷Mambu ma bana bandi, mbikutulu za lawu zina zatédila kikuma kya yandi, yi kutungulula kwa nzu ya Tata wetu, moosu másonama mu mukanda wa nsamu wa bakyamvu. Amana mwana wandi Amaziya wáyadila mu homa kyandi.