Ang Natago nga Sala Nagadala sing Kapierdihan sa Ai

Gin-ulos sang Ai ang diutay nga kasoldadosan sang Israel kag nawala ang kaisog sang pungsod. Ang reklamo ni Josue nakabaton sing tuman nga sabat gikan sa aton Amay: may nagtakas sang ginhalad. Gin-ako ni Acan nga nakita, ginhingabot, gin-kuha kag gintago niya ini — kag siya kag ang tanan niya nga pagkabutang ginlaglag sa walog.

Nagahambal ang aton Amay sa mga bersikulo 10–15

Kapitulo 7.

Nagluib ang Israel may kaangtanan sa mga butang nga gintugyan sa kalaglagan: si Acan nga anak ni Carmi, nga anak ni Zabdi, nga anak ni Zera, sang tribo ni Juda, nagkuha sing pila sa sini. Gani nagsingkal ang kaakig sang aton Amay batok sa Israel. ^a Nagpadala si Josue sing mga tawo halin sa Jerico pakadto sa Ai, malapit sa Bet-aven, sa sidlangan sang Betel, nga nagasiling, “Taklad kamo kag usisaa ang duta.” Gani nagtaklad sila kag gin-usisa ang Ai.

Nagbalik sila kag nagsiling kay Josue, “Indi kinahanglan nga magtaklad ang tanan. Magpadala ka sing mga duha o tatlo ka libo ka tawo sa pagsalakay sa Ai; indi pagpakapuya ang tanan nga katawohan—diotay lang sila.” Gani nagtaklad ang mga tatlo ka libo sa katawohan, apang nagpalalagyo sila sa atubangan sang mga tawo sang Ai. Ginpamatay sang mga tawo sang Ai ang mga katloan kag anum sa ila, kag ginlagas sila halin sa gawang pakadto sa mga kuhaanan sing bato, kag ginpamatay sila sa dulhugan. Gani natunaw ang tagipusoon sang katawohan, kag nangin tubig. Gin-gisi ni Josue ang iya mga bayo kag naghapa sia sa duta sa atubangan sang kaban sang aton Amay tubtob sa kahaponan, sia kag ang mga tigulang sang Israel, kag ginpahirug nila ang yab-ok sa ila mga ulo. Nagsiling si Josue, “O, Soberano nga Amay, ngaa gintabok mo ini nga katawohan sa Jordan, agud lamang itugyan kami sa mga Amornon sa paglaglag sa amon? Kon maayo pa nga nagpabilin na lang kami sa tabok sang Jordan! Palihug, Soberano nga Amay, ano ang akon masiling, karon nga ang Israel nagtalikod kag nagpalagyo gikan sa iya mga kaaway? Mabatian sang mga Canaanhon kag sang tanan nga nagapuyo sa duta, kag palibutan nila kami, kag panason nila ang amon ngalan sa duta. Niyan ano ang imo pagahimuon para sa imo dungganon nga ngalan?”

Nagsiling ang aton Amay kay Josue, “Tindog ka! Ngaa naghapa ka?

“Nakasala ang Israel, kay ginlapas nila ang akon katipan nga akon ginsugo sa ila. Nagkuha sila sing pila ka butang nga gintugyan sa kalaglagan, kag nagpangawat, kag nagbinutig, kag ginbutang nila ini upod sa ila kaugalingon nga mga pagkabutang. Gani ang Israel indi makatindog sa atubangan sang iya mga kaaway—nagatalikod sila sa atubangan nila, kay sila karon gintugyan sa kalaglagan. Indi na ako mangin kaupod ninyo kon indi ninyo paglaglagon ang gintugyan sa kalaglagan nga yara sa tunga ninyo. Tindog ka! Patinloa ang katawohan. Isiling sa ila: Patinloi ninyo ang inyo kaugalingon para sa buas, kay ang aton Amay, ang Dios sang Israel, nagasiling: May mga butang nga gintugyan sa kalaglagan sa tunga ninyo, Israel. Indi kamo makatindog batok sa inyo mga kaaway tubtob makuha ninyo ini.

“Sa aga, magpalapit kamo suno sa tagsa ka tribo. Ang tribo nga pilion sang aton Amay magapalapit suno sa tagsa ka panimalay; ang panimalay nga iya pilion magapalapit suno sa tagsa ka pamilya; ang pamilya nga iya pilion magapalapit suno sa tagsa ka tawo. Ang bisan sin-o nga madakpan upod ang mga butang nga gintugyan sa kalaglagan pagasunugon sa kalayo—sia kag ang tanan niya nga ginapanag-iya—kay ginlapas niya ang katipan sang aton Amay kag naghimo sing makahuluya nga butang sa Israel.”

Nagbangon si Josue sing aga pa kag ginpapalapit niya ang Israel suno sa mga tribo; kag ang tribo ni Juda amo ang napilian. Ginpapalapit niya ang mga panimalay ni Juda; kag ang panimalay sang mga Zerahnon amo ang napilian. Ginpapalapit niya ang panimalay sang mga Zerahnon, suno sa tagsa ka pamilya; kag si Zabdi amo ang napilian. Ginpapalapit ni Josue ang iya panimalay, suno sa tagsa ka tawo, kag si Acan nga anak ni Carmi, nga anak ni Zabdi, nga anak ni Zera, sang tribo ni Juda, amo ang nadakpan. Nagsiling si Josue kay Acan, “Anak ko, maghatag ka sing himaya sa aton Amay, ang Dios sang Israel, kag maghatag ka sa iya sing pagdayaw. Isugid sa akon karon kon ano ang imo nahimo—indi ini pagtagoa sa akon.”

Nagsabat si Acan kay Josue, “Sa pagkamatuud, nakasala ako batok sa aton Amay, ang Dios sang Israel. Amo ini ang akon nahimo: Sa tunga sang inagaw nakita ko ang matahum nga bayo halin sa Sinar, kag mga lima ka libra nga pilak, kag isa ka bareta nga bulawan nga mga isa ka libra kag tunga ang kabug-aton. Ginhandum ko ini kag ginkuha ko; natago ini sa salog sang akon tolda, kag ang pilak yara sa idalum.”

Nagpadala si Josue sing mga mensahero; nagdalagan sila pakadto sa tolda kag nakita ini nga natago sa iya tolda, kag ang pilak yara sa idalum. Ginkuha nila ini halin sa sulod sang tolda, kag gindala nila kay Josue kag sa tanan nga mga anak sang Israel, kag ginbutang nila ini sa atubangan sang aton Amay. Ginkuha ni Josue kag sang bug-os nga Israel si Acan nga anak ni Zera, kag ang pilak, kag ang bayo, kag ang bareta nga bulawan, kag ang iya mga anak nga lalaki, kag ang iya mga anak nga babayi, kag ang iya mga baka, kag ang iya mga asno, kag ang iya mga karnero, kag ang iya tolda, kag ang tanan niya nga ginapanag-iya, kag gindala nila sila pataklad sa Nalupyakan sang Acor. Nagsiling si Josue, “Ngaa gingamo mo kami? Pagagamuhon ka sang aton Amay sa sini nga adlaw.” Kag ginbato sang bug-os nga Israel si Acan sing mga bato, dayon ginsunog sila sa kalayo, kag ginbato sila sing mga bato. Gintumpok nila ang daku nga tinumpok sang mga bato sa ibabaw niya, nga yara pa tubtob sa sini nga adlaw. Niyan nagbalik ang aton Amay gikan sa iya nagasingkal nga kaakig. Gani ang ina nga duog ginatawag nga Nalupyakan sang Acor tubtob sa sini nga adlaw. ^b