Huan kibü shabüei Aia haitibü yeitikei
Aiei Israelbü sepai hanbü che shieian, mütshuong pendoueibü maangpon tühnyinkei. Joshua tokyobü to seneibü Bouei chongchingko jongaikei: müt cheei khümbo kubü peisilei langkei. Akhanei, ngei hapkei, wanthungkei, lekei hoba thamngua thanan phokei dogo thekukei—hoba hao hoba haoeibü pendou pholia leiluan apbei.
7 1Israelbüei khümbo kuan apbü peisileia shed shonkei: Jihuda mütli ka Zeraeibü shou Zabdi, Zabdieibü shou Karmi, Karmieibü shou Akhanei khümbo kuan apbü peisilei ka weko lekei. Khoei seneibü Bou Israel khulimbo khauangkei. a a v1 Peisilei che ‘khümbo lemailela mautilabü’ yeijinei, kho lemailela Mühghaüeibü kikei; mütei kho ka weko jembü shanga lotla athük. 2Joshuaei Jerikho ka Beth-aven napheinei, Bethel chaang aenei kibü Ai to mütshuong hautiko laukei, “Angashi hoba kaodak pheanchühashi.” Hobaje haoen angkei hoba Ai pheanchühkei.
3Hobaje haoen longeikei hoba Joshua to laukei, “Müt pendou angla akhamda. Ai to wapyola müt hajar nyi ayingsi semnyet ong hautishi; müt pendou tenge—aishanga haoen ühaiko ki.” 4Kheijinei müt ka hajar semnyet ong angkei, lausikei haoen Aibü mütshuong thedanga satkei. 5Aibü mütshuongei haoen ka müt khujinto lak thükkei, hoba koukhüm ka laang kishang sühko shijung hauan, yen haubü lama haoen haitikei. Hobaje müt pendoueibü maangpon tühnyinkei, hoba dei tegü yeikei. 6Joshuaei haoeibü neisimei jitnyinkei hoba seneibü Bou Ngühkhüm Busen thedanga chasem sühko the khüman kaoa khüpetkei, hao hoba Israelbü jaishou shuong, hoba haoeneibü khua thüka thamngu lakkei. 7Joshuaei laukei, “O Abou, nyi aila ho mütshuong Jordan danko loutikei, kün Amorbü ik to khümbo kuan kün mautila shanga ong? Künei Jordan thidang longbüa olinkei yingma! 8O Abou, Israelei haoeneibü dangbou shuong thedanga sepeinyu sattian apbü hangshong, ngei ai laulabü? 9Kananbü hoba kaodaka kibü pendouei kho ditlabü, hoba kün püetlabü, hoba küneibü nyen kaodak ka haman aplabü. Kheijinei nyi kaibü nyen yaangbü shanga ai kümlabü?”
10Seneibü Bouei Joshua to laukei, “Loenashi! No aila the khüman apda?
11“Israelei shabü shonkei, ngei haoen la sakkubü ngeibü theyolanyobü shed shonan. Haoenei khümbo kuan apbü peisilei ka weko lekei, hoba kokkei, hoba yepeikei, hoba haoeneibü peisilei yoa phokei. 12Kheijinei Israelei haoeneibü dangbou shuong thedanga lola athük; haoenei dangbou thedanga shenjang thutida, aishanga touje haoen khümbo kuan apbü yeikei. Kanei kan yoka khümbo kuan apbü peisilei amautilonga, ngei nyibou kan yoa akilabü. 13Loenashi! Mütshuong saüenashi. Haoen to lenashi, ngiet shanga kan lulu saüenashi; aishanga seneibü Bou, Israelbü Mühghaüei lauda, O Israel, khümbo kuan apbü peisilei kan yoa kia. Kanei kho sunglanga shongko, kan dangbou shuong thedanga lola athük.
14“Ngeyang enyu, kan chung chung thedanga loashi. Seneibü Bouei piena chungei chempen chempen nyangko loulabü, haoei piena chempenei chemdang chemdang nyangko loulabü, hoba haoei piena chemdangei müt müt nyangko loulabü. 15Khümbo kuan apbü peisilei yoa aoei hapoulaje, hao hoba haoeibü peisilei pendou, khonei juoklabü; aishanga haoei seneibü Bou theyolanyobü shed shonkei, hoba Israela hatlamoklabü kümbei.”
16Joshuaei ngeyang enyu pikei, hoba Israel chung chung nyangko leijung loukei; hoba Jihuda chung taketkei. 17Haoei Jihuda chempen shuong nyangko leijung loukei; hoba Zera chempen taketkei. Haoei Zera chempen chemdang chemdang nyangko leijung loukei; hoba Zabdi taketkei. 18Joshuaei haoeibü chempen müt che che leijung loukei, hoba Jihuda mütli ka Zeraeibü shi Zabdi, Zabdieibü shi Karmi, Karmieibü shou Akhan lapbei. 19Joshuaei Akhan to laukei, “Kü shou, seneibü Bou, Israel Mühghaü to soneikangbü kushi, hoba hao to nyen sang kushi. Nyi ai kümbei kho shaangla kü to lenshi—kü ka tehuma.”
20Akhanei Joshua to jongaikei, “Maimaitham, ngei seneibü Bou, Israel Mühghaü khulimbo shabü shona. Ngei kümbü kho ho ki: 21Soletbü peisilei yoa ngei Shinar ka saomaibü neisimei che, chandinam ngao atbü, hoba hon laangthao che atbü hapbei; ngei kho lambei hoba lekei, hoba kho ngeibü neichem shona huan kia, chandinam kho phangaenei.”
22Hibü Joshuaei ngühlang künbü shuong hautikei; haoen neichem to laangjung hauan, haoeibü neichema huan kibü hapbei, chandinam kho phangaenei. 23Haoenei neichem maang ka khübü kho sungenan, Joshua hoba Israel shousi shuong pendou jungto leian loukei, hoba seneibü Bou thedanga phokei. 24Hobaje Joshua hoba Israel pendouei Zeraeibü shou Akhan, chandinam, neisimei, hon laangthao, haoeibü shousi shuong, nouyangshousi shuong, masu, gadu, sanlon, neichem hoba haoei kibü pendou leian, Akhor pholi to angan loukei. 25Joshuaei laukei, “Nyi aila kün khonsaktikei? Seneibü Bouei tat no khonsaktilabü.” Hobaje Israel pendouei Akhan to laangei tetkei, hoba khübü kho wana jikei, hoba laangei tetkei. 26Haoenei hao thüka laangshaang yaangbü che shaangan phokei, hoba kho tat sühko kia. Kheijinei seneibü Bouei haoeibü hatlamoklabü khauang lotbü ka sepeikei. Khoei kho sangnyu to tat sühko Akhor pholi dogo lauda. b b v26 ‘Akhor’ dogobü kho ‘khonsak’ tetda—Akhaneibü shabüei Israel thükto louan kibü amaibü chühletla shanga pholi kho hai nyenkei.
