ሕቡእ ሓጢኣት ኣብ ጋይ ስዕረት ኣምፅአ

ጋይ ንሓንቲ ንእሽተይ ሰራዊት እስራኤል ሰዓረቶ፥ ትብዓት እቲ ህዝቢ ድማ መኸኸ። ኢያሱ ምስ ጠረዐ ኣቦና ቐጥ ዝበለ መልሲ ሃቦ፦ ሓደ ሰብ ካብቲ ዝተሓረመ ሰሪቑ። ኣካን ድማ ከም ዝረኣዮን ከም ዝተመነዮን ከም ዝወሰዶን ከም ዝሓብኦን ኣመነ፤ ንሱን ኵሉ ንብረቱን ከዓ ኣብቲ ለሰ ጠፍኡ።

ምዕራፍ 7።

ደቂ እስራኤል በቲ ዝተሓረመ ነገር በደሉ፤ ኣካን ወዲ ካርሚ፥ ወዲ ዛብዲ፥ ወዲ ዛራ፥ ካብ ነገድ ይሁዳ ዝኾነ፥ ካብቲ ዝተሓረመ ወሰደ። ስለዙይ ቍጥዓ ኣቦና ኣብ ልዕሊ ደቂ እስራኤል ነደደ። ^a ኢያሱ ድማ ካብ ኢያሪኮ፥ ናብታ ኣብ ጥቓ ቤት ኣዌን፥ ብምብራቕ ቤቴል ዘላ ጋይ ሰባት ለኣኸ፤ “ደይብኩም ነታ ምድሪ ስለይዋ” ድማ በሎም። ንሳቶም ከዓ ደዪቦም ንጋይ ሰለይዋ።

ተመሊሶም ድማ ንኢያሱ ኸምዙይ ኢሎም ነገርዎ፦ “ኵሉ ህዝቢ ክድይብ ኣየድልን እዩ። ንጋይ ክዋግኡ ኣስታት ክልተ ወይ ሰለስተ ሽሕ ሰባት ስደድ፤ ንሳቶም ውሑዳት እዮም እሞ፥ ንኵሉ እቲ ህዝቢ ኣይተድክሞ።” ስለዙይ ካብቲ ህዝቢ ኣስታት ሰለስተ ሽሕ ሰባት ደየቡ፤ ግና ኣብ ቅድሚ ሰብ ጋይ ሃደሙ። ሰብ ጋይ ከዓ ኣስታት ሰላሳን ሽዱሽተን ሰባት ካብኣቶም ወቕዑ፤ ካብ ደገ ክሳዕ መፍረስ ኣእማን ሰጒጎም ኣብቲ ቍልቍለት ወቕዕዎም። ልቢ እቲ ህዝቢ ድማ መኸኸ፤ ከም ማይ ከዓ ኾነ። ኢያሱ ድማ ክዳውንቱ ቐደደ፤ ንሱን ዓበይቲ እስራኤልን ከዓ ኣብ ቅድሚ ታቦት ኣቦና ክሳዕ ምሸት ብገፆም ናብ ምድሪ ተደፍኡ፤ ኣብ ርእሶምውን ሓመድ ነስነሱ። ኢያሱ ድማ ኸምዙይ በለ፦ “ኦ ጐይታ ኣቦ! ነዝ ህዝቢ እዙይ ናብ ኢድ ኣሞራውያን ኣሕሊፍካ ኽትህበናን ከተጥፍኣናን ኢልካዶ ንዮርዳኖስ ኣሳጊርካዮ? ኣብ ስግር ዮርዳኖስ ምተረፍና እንተ ንኸውን! ኦ ጐይታ ኣቦ፥ በይዛኻ፥ እስራኤል ካብ ፀላእቱ ተመሊሱ ምስ ሃደመ፥ እንታይ ክብል እየ? ከነዓናውያንን ኣብዛ ምድሪ ዝነብሩ ዅሎምን ክሰምዑ እዮም፤ ክኸቡናን ስምና ኻብ ምድሪ ኽድምስሱን እዮም። ሽዑ ንዓብዪ ስምካ እንታይ ክትገብረሉ ኢኻ?”

ኣቦና ድማ ንኢያሱ ኸምዙይ በሎ፦ “ተንስእ! ስለ ምንታይ ብገፅካ ተደፊእካ ኣለኻ?

እስራኤል ሓጢኣት ገበረ፤ ነቲ ዝኣዘዝክዎም ኪዳነይ ጠሓሱ። ካብቲ ዝተሓረመ ወሲዶም፥ ሰሪቖም፥ ሓሲዮም፥ ኣብ ማእኸል ንብረቶም ኣእትዮምዎ። ስለዙይ እስራኤል ኣብ ቅድሚ ፀላእቱ ደው ክብል ኣይክእልን እዩ፤ ባዕልቶም ንጥፍኣት ተሓሪሞም ስለ ዘለዉ፥ ናብ ፀላእቶም ዝባኖም ይህቡ ኣለዉ። ነቲ ኣብ ማእኸልኩም ዘሎ ዝተሓረመ እንተ ዘይ ኣጥፊእኩምዎ፥ ደጊመ ምሳኻትኩም ኣይኸውንን እየ። ተንስእ! ነቲ ህዝቢ ቀድሶ፤ ከምዙይ ድማ በሎም፦ ‘ንፅባሕ ርእስኹም ቀድሱ፤ ኣቦና፥ ኣምላኽ እስራኤል፥ ከምዙይ ይብል ኣሎ እዩ እሞ፦ ኦ እስራኤል! ኣብ ማእኸልካ ዝተሓረመ ነገር ኣሎ፤ ክሳዕ ነቲ ዝተሓረመ ኻብ ማእኸልኩም እተርሕቕዎ፥ ኣብ ቅድሚ ፀላእትኹም ደው ክትብሉ ኣይትኽእሉን ኢኹም።’

ንግሆ በብነገድኩም ቕረቡ። እታ ኣቦና ዝሓረያ ነገድ በብዓሌታ ትቕረብ፤ እቲ ዝሓረዮ ዓሌት በብቤተሰቡ ይቕረብ፤ እቲ ዝሓረዮ ቤተሰብ ከዓ በብሰብኡ ይቕረብ። እቲ ምስ ዝተሓረመ ዝተረኽበ ሰብ፥ ኪዳን ኣቦና ስለ ዝጠሓሰን ኣብ እስራኤል ነውሪ ስለ ዝገበረን፥ ንሱን ዘለዎ ዅሉን ብሓዊ ይቃፀል።”

ኢያሱ ድማ ኣንጊሁ ተሲኡ ንእስራኤል በብነገዱ ኣቕረቦም፤ ነገድ ይሁዳ ኸዓ ተሓረየት። ንዓሌታት ይሁዳ ድማ ኣቕረቦም፤ ዓሌት ዛራ ኸዓ ተታሕዘ። ንዓሌት ዛራ በብቤተሰቡ ኣቕረቦ፤ ዛብዲ ኸዓ ተታሕዘ። ኢያሱ ድማ ንቤተሰቡ በብሰብኡ ኣቕረቦ፤ ኣካን ወዲ ካርሚ፥ ወዲ ዛብዲ፥ ወዲ ዛራ፥ ካብ ነገድ ይሁዳ ዝኾነ፥ ተታሕዘ። ኢያሱ ድማ ንኣካን “ወደይ! ንኣቦና፥ ንኣምላኽ እስራኤል ክብሪ ሃቦ፤ ኣመስግኖውን። ዝገበርካዮ ሕዚ ንገረኒ፤ ካባይ ኣይትሕብኣዮ” በሎ።

ኣካን ድማ ንኢያሱ ኸምዙይ ኢሉ መለሰሉ፦ “ኣነ ብሓቂ ኣብ ኣቦና፥ ኣብ ኣምላኽ እስራኤል ሓጢአ፤ ዝገበርክዎ እዙይ እዩ፦ ካብቲ ምርኮ፥ ካብ ሰናኦር ዝመፀ ፅቡቕ ባርኖስን፥ ኣስታት ሓሙሽተ ፓውንድ ብሩርን፥ ኣስታት ሓደ ነጥቢ ኽልተ ፓውንድ ዝሚዛኑ ዘንጊ ወርቅን ረአኹ። ተመኒአ ኸዓ ወሰድክዎም፤ እንሆ፥ ኣብ ምድሪ ድንኳነይ ተሓቢኦም ኣለዉ፤ ብሩር ድማ ኣብ ትሕቲኡ ኣሎ።”

ኢያሱ ድማ ልኡኻት ለኣኸ፤ ንሳቶም ከዓ ናብ ድንኳን ጐዩ፤ ኣብ ድንኳኑ ተሓቢኡ ረኸብዎ፤ ብሩር ድማ ኣብ ትሕቲኡ ነበረ። ካብ ውሽጢ እቲ ድንኳን ወሲዶምዎም፥ ናብ ኢያሱን ናብ ኵሎም ደቂ እስራኤልን ኣምፅእዎም፤ ኣብ ቅድሚ ኣቦና ድማ ኣንበርዎም። ኢያሱን ኵሎም እስራኤልን ድማ ንኣካን ወዲ ዛራን፥ ነቲ ብሩርን ነቲ ባርኖስን ነቲ ዘንጊ ወርቅን፥ ኣወዳቱን ኣዋልዱን ኣሕማሉን ኣእዱጉን ኣባጊዑን ድንኳኑን ዘለዎ ዅሉን ወሲዶም፥ ናብ ለሰ ዓኾር ኣደየብዎም። ኢያሱ ድማ “ስለ ምንታይ ኣሸገርካና? ኣቦና ሎሚ ኸሸግረካ እዩ” በለ። ኵሎም እስራኤል ድማ ንኣካን ብእምኒ ቐጥቀጥዎ፤ ብሓዊ ኣንዲዶም ድማ ብእምኒ ቐጥቀጥዎም። ዓብዪ ዅምራ ኣእማን ድማ ኣብ ልዕሊኡ ኰመሩ፤ ንሱ ኸዓ ኽሳዕ ሎሚ ኣብኡ ኣሎ። ሽዑ ኣቦና ኻብ ብርቱዕ ቍጥዓኡ ተመለሰ። ስለዙይ እታ ቦታ እቲኣ ኽሳዕ ሎሚ ለሰ ዓኾር ተብሃለት። ^b