1 Pedro 1

1 ¹Si Pedro, apostol ni Jesu-Cristo, ngadto sa pinili nga mga langyaw nga nagkatibulaag sa tibuok Ponto, Galacia, Capadocia, Asia, ug Bitinia. ²Pinili pinaagi sa nahaunang kahibalo sa atong Amahan, gibalaan pinaagi sa Espiritu Santo, aron motuman kang Jesu-Cristo ug mawisik-wisikan sa iyang dugo: ang grasya ug ang kalinaw modaghan unta diha kaninyo.

Natawo ngadto sa Buhing Paglaom

³Dalaygon ang atong Amahan, ug Amahan sa atong Ginoong Jesu-Cristo: pinaagi sa iyang dakong kaluoy gihatagan niya kita ug bag-ong pagkatawo ngadto sa buhing paglaom pinaagi sa pagkabanhaw ni Jesu-Cristo gikan sa mga patay, ⁴ngadto sa usa ka panulondon nga dili gayod madunot, madaot, o malawos, nga gitipigan didto sa langit alang kaninyo, ⁵nga ginabantayan pinaagi sa pagtuo sa gahom sa atong Amahan alang sa kaluwasan nga andam nang ipadayag sa kataposang panahon. ⁶Nagmaya kamo pag-ayo niini, bisan pa karon, sa makadiyot, tingali kinahanglan nga masubo kamo tungod sa nagkadaiyang mga pagsulay. ⁷Kini miabot aron nga ang inyong pagtuo—nga nasulayan ug nakaplagang tinuod, nga mas bililhon pa kay sa bulawan nga gidalisay sa kalayo nga madunot ra gihapon—makahatag ug pagdayeg, himaya, ug kadungganan sa diha nga motungha si Jesu-Cristo. ⁸Bisan wala ninyo siya makita, gihigugma ninyo siya; bisan wala ninyo siya makita karon, misalig kamo kaniya, nga nagmaya uban sa kalipay nga dili matukib ug puno sa himaya, ⁹kay nadawat ninyo ang tumong sa inyong pagtuo, ang kaluwasan sa inyong mga kalag.

¹⁰Ang mga propeta nga nagsulti bahin sa grasya nga alang kaninyo nagsusi ug nangita pag-ayo mahitungod niini nga kaluwasan, ¹¹nga nangita sa panahon ug kahimtang nga gitudlo sa Espiritu ni Cristo nga anaa kanila, sa diha nga iyang gitagna ang mga pag-antos ni Cristo ug ang mga himaya nga mosunod niini. ¹²Gipadayag kini kanila: nga nag-alagad sila dili sa ilang kaugalingon kondili kaninyo, sa diha nga nagsulti sila niining mga butanga nga karon gimantala kaninyo pinaagi niadtong nagwali sa maayong balita diha kaninyo pinaagi sa Espiritu Santo nga gipadala gikan sa langit. Bisan ang mga anghel nangandoy nga makatan-aw niining mga butanga.

Gitawag aron Mahimong Balaan

¹³Busa, uban sa mga hunahuna nga andam alang sa buhat ug hingpit nga mabinantayon, lauma sa bug-os ang grasya nga igadala kaninyo sa diha nga ipadayag si Jesu-Cristo. ¹⁴Ingon nga masinugtanong mga anak, ayaw tugoti nga mahulma kamo sa mga tinguha nga kaniadto inyong gisunod sa inyong pagkawalay alamag. ¹⁵Apan maingon nga balaan ang nagtawag kaninyo, mao usab nga magbalaan kamo sa tanan ninyong buhaton;

¹⁶kay nahisulat kini: “Magbalaan kamo, kay ako balaan.”

¹⁷Sanglit nagtawag kamo sa usa ka Amahan nga nagahukom sa matag buhat nga walay pagpihig, gugola ang panahon sa inyong paglangyaw dinhi uban sa matinahurong kahadlok. ¹⁸Nasayod kamo nga ang plata ug ang bulawan—mga butang nga madunot—wala magluwas kaninyo gikan sa kawang nga kinabuhi nga napanunod gikan sa inyong mga katigulangan, ¹⁹kondili pinaagi sa bililhong dugo ni Cristo, usa ka nating karnero nga walay depekto o buling. ²⁰Pinili sa wala pa ang pagkatukod sa kalibotan, gipadayag niining kataposang mga panahon alang kaninyo. ²¹Pinaagi kaniya mituo kamo sa atong Amahan, nga nagbanhaw kaniya gikan sa mga patay ug naghimaya kaniya, aron ang inyong pagtuo ug paglaom anaa sa atong Amahan.

²²Kay gihinloan na ninyo ang inyong mga kalag pinaagi sa pagtuman sa kamatuoran alang sa matinud-anong gugma sa mga igsoon, maghigugmaay kamo sa usag usa pag-ayo gikan sa putli nga kasingkasing. ²³Kay gipakatawo kamo pag-usab—dili gikan sa binhi nga madunot kondili sa dili madunot—pinaagi sa buhi ug malungtarong pulong sa atong Amahan. ²⁴Kay, “Ang tanang tawo sama sa balili, ug ang tanan nilang himaya sama sa mga bulak sa kapatagan; ang balili malaya ug ang mga bulak mangatagak, ²⁵apan ang pulong sa atong Amahan molungtad sa walay kataposan.” Ug mao kini ang pulong nga giwali kaninyo.