1 Peter 1

1 ¹Jishu Khristawui paokazata Peterna, Pontus, Galatia, Cappadocia, Asia kala Bithyniali ngapha̱ kahai kapang kahai raithā kahaibingli shālam chiphunli. ²Ithumwui Avāwui ngarānping athishurda kapang kahai, Manglā Katharana kathara sākahai, Jishu Khristawui kahāng nganai khavai kala awui ashee eina ikror khami khavai: lukhamashan kala chingri kahai chi nathumli mataisangmiranu.

Kharinga Kachihānli Pharā

³Ithumwui Avā, ithumwui Proho Jishu Khristawui Avāli soranu: awui lukhamashan tarākha eina ana ithumli Jishu Khristawui kathiwui eina ringshokhaira mangā eina kharinga kachihānli pharāluishit ngasaka, ⁴mashimān, mathā, kala ngazan mangasāmana shimlui chi nathumwui vang kazingramli haimihaira. ⁵nathum chi naomeikap atamli phongmi khavai jihaira huikhamiwui vang, shitkasang mangā eina ithumwui Avāwui pangshapna ngākmi kahaibingna. ⁶Chi eina nathumna kachungkha ringphā, kha ara atam kasha̱khawui vang chāng khayang yur kachungkha eina nathum chotchāng khami phalungra. ⁷Hibing chi raihaira, kaja nathumwui shitkasang chi tamyang tharan kakaila theikhui kahaina; chi meina langhai, chithālala shimān ngasakki sinā chili mataimeida aman sakmei. Chieina chi Jishu Khrista phongmithanghon masot, tekhamatei, kala khayākakā rāphalungra. ⁸Nathumna ali makatheihailala nathumna ali leishi; ara ali matheisālala nathumna ali shitsanga, male eina hāshok mangasāmana kala tekhamatei pemtinghai khamathān eina ringphāda, ⁹kaja nathumna nathumwui shitkasangwui ningrin, nathumwui manglā huikhami chi samphangda lei.

¹⁰Nathumwui vang jira lukhamashanwui pongli hānga marānbingna, hi huikhamiwui pongli khangathing tharan peoyang eina phākashoka, ¹¹athumwui lungli khalei Khristawui Manglāna Khristawui kachotkachāng kala chiwui thili rāra tekhamatei chi marānmida phongmi atam kala situi khisa khala da athumna phāzata. ¹²Athumli hi phongmihaira: athumwui ot chi athum khalattawui vang maningla nathumwui vangna. Kazingramwui eina chihovā Manglā Kathara mangā eina nathumli paokaphā hāshokbingna ara nathumli hāngchithei hibing chi athumna hānga. Kazingraobingnala hibingli theikhui khavai ningphutta lei.

Kathara Leikhavai Kaho

¹³Chiwui vang eina nathumwui ning otsak khavai poksāda kala katang eina ning phākhuida, Jishu Khrista phongmithanghon nathumli rārā lukhamashan chili phuta chihānlu. ¹⁴Kahāng nganai naongarābing thāda, achālakha matheithangkhama atamli nathumna shurrai phaningphāphā eina nathum khalatta masha̱ngasakalu. ¹⁵Kha nathumli kaho chi kathara thada, nathumna otsak saikorali kathara leilu;

¹⁶kaja hithada kapihaida lei: "Kathara leilu, kaja ina katharana."

¹⁷Mimai mayangla otsak kachiva̱li bichar sāki Avāli nathumna kahona leilakha, hili nathumwui raithā kahai atam chi khangachee eina okthuilu. ¹⁸Nathumwui avāngarā eina kharā arema mirin chiwui eina, nathumli huikhui kahai chi shimānkapai lupā kala sinā eina maningmana da nathumna thei, ¹⁹kha khangakhai makhalei kala chukkhara̱ maleila yaonao kathā Khristawui aman kasak ashee eina nathumli huikhuihaira. ²⁰A okathui katongana kapangkhui kahaia, kha khanaowa atambingli nathumwui vang eina phongmithanghaira. ²¹Ali kathiwui eina ringshok ngasaklaga tekhamatei mi kahai ithumwui Avāli nathumna awui mangā eina shitsanga. Chiwui vang eina nathumwui shitkasang kala kachihān ithumwui Avāli lei.

²²Khamashung tui nganāda nathumwui wuklung tharkhuihaoda, ichinā ngarāli kachangkhat leikashi khavai, kathara wuklung eina akha eina akha panglāk eina leishi ngaroklu. ²³Khikhalajila nathum shimānkapai athā eina maningla mashimānkapai athā eina pharāluishithaira; chi kharinga kala mashimānda leiching ithumwui Avāwui tui mangā einana. ²⁴Khikhalajila, "Mi saikora khawo kathāna, kala athumwui tekhamatei saikora luiwui awon kathāna; khawo thenga kala awon pitāra, ²⁵kha ithumwui Avāwui tui mashimānda leichingra." Kala nathumli hāshok kahai tui chi hina.