1 Peter 1 FHB Father's Heart Bible™

1 ¹Jisu Khrista laga prerit Peter pora, Pontus, Galatia, Cappadocia, Asia, aru Bithynia te chatikhai juwa, basi luwa pardeshi khan ke likhise. ²amar Pitri laga age pora jana pora basi luwa, Pobitro Atma pora pobitro kori diya, Jisu Khrista laga kotha mani bole aru Tar laga khoon chiti dibole basi loise: tumikhan logot te anugrah aru shanti bisi hobi.

Jinda Asha te Notun Jonom Howa

³amar Pitri, aru amar Prabhu Jisu Khrista laga Pitri ke Dhonyo hobi: Tar laga dangor doya pora, Jisu Khrista mora pora jee uthi juwa dwara, Tai pora amikhan ke jinda asha te notun jonom dise, ⁴kitia bhi nakhotom howa, nagola, aru naharaba ekta uttoradhikar te, juntu tumikhan nimite sorgot te rakhi ase, ⁵hekh homoi te prokahit hobole taiyar thaka poritran nimite, amar Pitri laga takot pora biswas dwara rakhi ase. ⁶Etiya olop homoi nimite, bibhinno porikha pora dukh pabole lage hoilebi, tumikhan eitu te bisi khushi kori ase. ⁷Eitu khan ahhise, titia tumikhan laga biswas tu—jui pora sapha kora hoilebi nokhotom howa suna pora bhi bisi daam thaka, porikha kori kene hosa paise—Jisu Khrista ulabole somoi te prosansa, mahima, aru sonman anibo. ⁸Tai ke kitia bhi dekha nai hoilebi, tumikhan Tai ke morom kore; etiya Tai ke nadikhe hoilebi, tumikhan Tai ke biswas kore, kobo napara khushi aru mahima pora bhorta hoi kene anondo kori ase, ⁹kilemane tumikhan laga biswas laga phol, tumikhan laga atma laga poritran pai ase.

¹⁰Tumikhan nimite thaka anugrah laga kotha kowa bhabobadi khan pora eitu poritran ke bhal kori bisarise aru bhal kori sai sa korise, ¹¹jitia tarkhan bhitor te thaka Khrista laga Atma pora Khrista uporte aha dukh khan aru tar pichete aha mahima khan age pora koise, hei Atma pora kun homoi aru ki porishthiti dikhai thakise, eitu tarkhan bisarise. ¹²Tarkhan ke eitu prokahit hoise: jitia tarkhan eitu khan laga kotha koise, tarkhan nijor nimite nohoi kintu tumikhan nimite sewa korise, juntu etiya sorgo pora pathai diya Pobitro Atma dwara tumikhan ke susamachar prochar kora khan pora tumikhan ke janai dise. Sorgoduth khan bhi eitu khan sabole mon kore.

Pobitro Hobole Daka Hoise

¹³Etiya, tumikhan laga mon ke kaam nimite taiyar kori kene, aru pura hoshiyar hoi kene, Jisu Khrista prokahit huwa somoi te tumikhan ke diya anugrah uporte pura asha rakhibi. ¹⁴Kotha mani thaka bacha khan nisena, tumikhan age te nabujhi kene mani thaka itcha khan pora tumikhan nijor ke nabonabi. ¹⁵Kintu tumikhan ke daka ekjon jineka pobitro ase, tineka tumikhan bhi tumikhan kora sob kaam te pobitro hobi;

¹⁶kilemane eneka likha ase: “Pobitro hobi, kilemane Moi pobitro ase.”

¹⁷Kun pora, mukh nasai kene, sob kaam laga bisar kore, hei Pitri ke tumikhan mate, eitu nimite yate tumikhan pardeshi hoi thaka homoi tu bhoi aru sonman pora bitai dibi. ¹⁸Tumikhan jane, khotom hoi juwa jinis—chandi aru suna—pora tumikhan ke tumikhan laga baba-apa khan pora paa khali jivon pora bachai diya nai, ¹⁹kintu eku golti aru dagi nathaka ekta mer-bacha nisena, Khrista laga daami khoon pora bachai dise. ²⁰Prithibi bona age te Tai ke basi loise, kintu tumikhan nimite eitu hekh homoi khan te Tai ke prokahit korise. ²¹Tai dwara tumikhan amar Pitri ke biswas kore, Kun pora Tai ke mora pora jinda korise aru Tai ke mahima dise, eneka tumikhan laga biswas aru asha amar Pitri te ase.

²²Hosa kotha mani kene tumikhan laga atma ke sapha kori loise, titia bhai khan ke hosa morom koribole, ekjon-ekjon ke sapha mon pora bisi kori morom koribi. ²³Kilemane tumikhan notun jonom paise—khotom hoi juwa bijon pora nohoi kintu kitia bhi nakhotom howa bijon pora—amar Pitri laga jinda aru hodai thaka kotha dwara. ²⁴Kilemane, “Sob manuh ghas nisena ase, aru tarkhan laga sob mahima kheti laga phul nisena ase; ghas tu sukhi jai aru phul khan giri jai, ²⁵kintu amar Pitri laga kotha hodai nimite thake.” Aru eitu he tumikhan ke prochar kora kotha ase.