1 പത്രോസ് 1 FHB Father's Heart Bible™

1 ¹യേശുക്രിസ്തുവിന്റെ അപ്പൊസ്തലനായ പത്രോസ്, പൊന്തൊസ്, ഗലാത്യ, കപ്പദൊക്യ, ആസ്യ, ബിഥുന്യ എന്നിവിടങ്ങളിൽ ചിതറിപ്പാർക്കുന്ന, തിരഞ്ഞെടുക്കപ്പെട്ട പ്രവാസികൾക്ക് എഴുതുന്നത്: ²നമ്മുടെ പിതാവിന്റെ മുന്നറിവിനാൽ തിരഞ്ഞെടുക്കപ്പെട്ട്, പരിശുദ്ധാത്മാവിനാൽ വിശുദ്ധീകരിക്കപ്പെട്ട്, യേശുക്രിസ്തുവിനെ അനുസരിക്കുവാനും അവിടുത്തെ രക്തത്താൽ തളിക്കപ്പെടുവാനുമായി വിളിക്കപ്പെട്ട നിങ്ങൾക്കു കൃപയും സമാധാനവും വർധിച്ചുവരട്ടെ.

ജീവനുള്ള പ്രത്യാശയിലേക്കു ജനിച്ചവർ

³നമ്മുടെ പിതാവ്, നമ്മുടെ കർത്താവായ യേശുക്രിസ്തുവിന്റെ പിതാവ്, വാഴ്ത്തപ്പെട്ടവൻ; യേശുക്രിസ്തുവിന്റെ മരിച്ചവരിൽനിന്നുള്ള പുനരുത്ഥാനത്തിലൂടെ, അവിടുത്തെ മഹാകരുണയാൽ അവിടുന്ന് നമുക്കു ജീവനുള്ള പ്രത്യാശയിലേക്കു പുതുജനനം നല്കി, ⁴ഒരിക്കലും നശിക്കുകയോ മലിനമാകുകയോ വാടിപ്പോകുകയോ ചെയ്യാത്ത, നിങ്ങൾക്കായി സ്വർഗത്തിൽ സൂക്ഷിച്ചുവെച്ചിരിക്കുന്ന ഒരു അവകാശത്തിലേക്കുതന്നെ. ⁵അന്ത്യകാലത്തു വെളിപ്പെടുവാൻ ഒരുങ്ങിയിരിക്കുന്ന രക്ഷയ്ക്കായി, വിശ്വാസത്തിലൂടെ നമ്മുടെ പിതാവിന്റെ ശക്തിയാൽ നിങ്ങൾ കാക്കപ്പെടുന്നു. ⁶ഇതിൽ നിങ്ങൾ ഏറ്റവും ആനന്ദിക്കുന്നു; ഇപ്പോൾ അല്പകാലത്തേക്കു വിവിധ പരീക്ഷകളാൽ നിങ്ങൾക്കു ദുഃഖം സഹിക്കേണ്ടിവന്നിരിക്കാമെങ്കിലും. ⁷തീയാൽ ശുദ്ധീകരിക്കപ്പെട്ടിട്ടും നശിച്ചുപോകുന്ന സ്വർണത്തെക്കാൾ വിലയേറിയ നിങ്ങളുടെ വിശ്വാസം, പരീക്ഷിക്കപ്പെട്ട് സത്യമായി തെളിഞ്ഞ്, യേശുക്രിസ്തു പ്രത്യക്ഷനാകുമ്പോൾ പുകഴ്ചയ്ക്കും തേജസ്സിനും മാനത്തിനും കാരണമാകേണ്ടതിനത്രേ ഇവ ഉണ്ടായത്. ⁸അവിടുത്തെ നിങ്ങൾ ഒരിക്കലും കണ്ടിട്ടില്ലെങ്കിലും സ്നേഹിക്കുന്നു; ഇപ്പോൾ അവിടുത്തെ കാണുന്നില്ലെങ്കിലും വിശ്വസിക്കുന്നു, വാക്കുകൾക്കതീതവും തേജസ്സുനിറഞ്ഞതുമായ ആനന്ദത്തോടെ ആഹ്ലാദിക്കുന്നു, ⁹നിങ്ങളുടെ വിശ്വാസത്തിന്റെ ലക്ഷ്യമായ ആത്മാക്കളുടെ രക്ഷ നിങ്ങൾ പ്രാപിക്കുന്നുവല്ലോ.

¹⁰നിങ്ങൾക്കായുള്ള കൃപയെക്കുറിച്ചു സംസാരിച്ച പ്രവാചകന്മാർ ഈ രക്ഷയെക്കുറിച്ച് ഉത്സാഹത്തോടെ അന്വേഷിച്ചു പരിശോധിച്ചു, ¹¹ക്രിസ്തുവിന്റെ കഷ്ടങ്ങളെയും അവയ്ക്കുശേഷമുള്ള തേജസ്സുകളെയും മുൻകൂട്ടി അറിയിച്ചപ്പോൾ, അവരിലുള്ള ക്രിസ്തുവിന്റെ ആത്മാവ് വിരൽചൂണ്ടിയ കാലവും സാഹചര്യവും അവർ അന്വേഷിച്ചു. ¹²അവർ തങ്ങളെയല്ല, നിങ്ങളെയത്രേ ഈ കാര്യങ്ങളാൽ ശുശ്രൂഷിച്ചത് എന്ന് അവർക്കു വെളിപ്പെട്ടു; സ്വർഗത്തിൽനിന്ന് അയയ്ക്കപ്പെട്ട പരിശുദ്ധാത്മാവിനാൽ നിങ്ങളോടു സുവിശേഷം അറിയിച്ചവരിലൂടെ ഇപ്പോൾ നിങ്ങളോടു പ്രസ്താവിക്കപ്പെട്ട ഈ കാര്യങ്ങളെക്കുറിച്ചാണ് അവർ സംസാരിച്ചത്. ഈ കാര്യങ്ങളിലേക്കു ഉറ്റുനോക്കുവാൻ ദൂതന്മാർപോലും ആഗ്രഹിക്കുന്നു.

വിശുദ്ധരാകാൻ വിളിക്കപ്പെട്ടവർ

¹³അതുകൊണ്ട്, നിങ്ങളുടെ മനസ്സു പ്രവൃത്തിക്കായി ഒരുക്കി, പൂർണമായി സുബോധമുള്ളവരായി, യേശുക്രിസ്തു വെളിപ്പെടുമ്പോൾ നിങ്ങൾക്കു കൈവരുവാനിരിക്കുന്ന കൃപയിൽ പൂർണമായി പ്രത്യാശവെപ്പിൻ. ¹⁴അനുസരണമുള്ള മക്കളായി, നിങ്ങളുടെ അജ്ഞതയിൽ മുമ്പു പിന്തുടർന്ന മോഹങ്ങൾക്കൊത്തു രൂപപ്പെടുവാൻ നിങ്ങളെത്തന്നെ അനുവദിക്കരുത്. ¹⁵എന്നാൽ നിങ്ങളെ വിളിച്ച അവിടുന്ന് വിശുദ്ധനായിരിക്കുന്നതുപോലെ, നിങ്ങളും ചെയ്യുന്നതിലെല്ലാം വിശുദ്ധരായിരിപ്പിൻ;

¹⁶“ഞാൻ വിശുദ്ധനാകയാൽ നിങ്ങളും വിശുദ്ധരായിരിപ്പിൻ” എന്ന് എഴുതിയിരിക്കുന്നുവല്ലോ.

¹⁷പക്ഷഭേദമില്ലാതെ ഓരോ പ്രവൃത്തിയെയും വിധിക്കുന്ന പിതാവിനെ നിങ്ങൾ വിളിച്ചപേക്ഷിക്കുന്നതിനാൽ, ഇവിടത്തെ നിങ്ങളുടെ പ്രവാസകാലം ഭയഭക്തിയോടെ കഴിച്ചുകൂട്ടുവിൻ. ¹⁸നിങ്ങളുടെ പൂർവികരിൽനിന്നു കൈമാറിക്കിട്ടിയ വ്യർഥമായ ജീവിതത്തിൽനിന്ന്, ക്ഷയിച്ചുപോകുന്ന വെള്ളിയും സ്വർണവുമല്ല നിങ്ങളെ വീണ്ടെടുത്തത് എന്നു നിങ്ങൾ അറിയുന്നുവല്ലോ, ¹⁹എന്നാൽ ഊനമോ കളങ്കമോ ഇല്ലാത്ത കുഞ്ഞാടിനെപ്പോലെയുള്ള ക്രിസ്തുവിന്റെ വിലയേറിയ രക്തത്താലത്രേ. ²⁰ലോകസ്ഥാപനത്തിനു മുമ്പേ തിരഞ്ഞെടുക്കപ്പെട്ട അവിടുന്ന് നിങ്ങൾക്കുവേണ്ടി ഈ അന്ത്യകാലങ്ങളിൽ വെളിപ്പെട്ടു. ²¹അവിടുത്തെ മരിച്ചവരിൽനിന്ന് ഉയിർപ്പിച്ച് തേജസ്കരിച്ച നമ്മുടെ പിതാവിൽ അവിടുത്തിലൂടെ നിങ്ങൾ വിശ്വസിക്കുന്നു; അങ്ങനെ നിങ്ങളുടെ വിശ്വാസവും പ്രത്യാശയും നമ്മുടെ പിതാവിലാകുന്നു.

²²സത്യത്തെ അനുസരിച്ച് നിങ്ങളുടെ ആത്മാക്കളെ നിർമലീകരിച്ച്, നിഷ്കപടമായ സഹോദരസ്നേഹത്തിനായി, നിർമലഹൃദയത്തോടെ അന്യോന്യം ഉറ്റുസ്നേഹിപ്പിൻ. ²³നശിച്ചുപോകുന്ന വിത്തിൽനിന്നല്ല, നശിക്കാത്ത വിത്തിൽനിന്ന്, നമ്മുടെ പിതാവിന്റെ ജീവനുള്ളതും നിലനില്ക്കുന്നതുമായ വചനത്താൽ നിങ്ങൾ പുതുതായി ജനിച്ചിരിക്കുന്നുവല്ലോ. ²⁴എന്തെന്നാൽ, “സകല മനുഷ്യരും പുല്ലുപോലെ, അവരുടെ തേജസ്സൊക്കെയും വയലിലെ പൂക്കൾപോലെയുമത്രേ; പുല്ലുണങ്ങുന്നു, പൂവു പൊഴിയുന്നു, ²⁵എന്നാൽ നമ്മുടെ പിതാവിന്റെ വചനമോ എന്നേക്കും നിലനില്ക്കുന്നു.” നിങ്ങളോടു പ്രസംഗിക്കപ്പെട്ട വചനം ഇതത്രേ.