1 ጴጥሮስ 1

1 ¹የኢየሱስ ክርስቶስ ሐዋርያ ጴጥሮስ፣ በጶንጦስ፣ በገላትያ፣ በቀጰዶቅያ፣ በእስያና በቢታንያ ተበትነው ለሚኖሩ ለተመረጡት መጻተኞች። ²እንደ አባታችን ቀዳሚ ዕውቀት የተመረጣችሁ፣ ኢየሱስ ክርስቶስን ለመታዘዝና በደሙ ለመርጨት በመንፈስ ቅዱስ የተቀደሳችሁ ናችሁ፤ ጸጋና ሰላም ይብዛላችሁ።

ወደ ሕያው ተስፋ መወለድ

³አባታችን፣ የጌታችን የኢየሱስ ክርስቶስም አባት የተባረከ ይሁን፤ በታላቅ ምሕረቱ በኢየሱስ ክርስቶስ ከሙታን መነሣት አማካይነት ወደ ሕያው ተስፋ ዳግመኛ ወለደን፤ ⁴የማይጠፋ፣ የማይበላሽና የማይጠወልግ ርስት እንድናገኝ አደረገን፤ ይህም በሰማይ ለእናንተ ተጠብቆአል፤ ⁵በመጨረሻው ዘመን ሊገለጥ ለተዘጋጀው ድነት፣ በእምነት በኩል በአባታችን ኀይል ተጠብቃችኋል። ⁶ምንም እንኳ አሁን ለጥቂት ጊዜ በልዩ ልዩ ፈተናዎች ማዘን ቢያስፈልጋችሁ፣ በዚህ እጅግ ደስ ይላችኋል። ⁷እነዚህም የመጡት፣ ተፈትኖ እውነተኛ ሆኖ የተገኘው እምነታችሁ፣ በእሳት ተፈትኖም ቢሆን ከሚጠፋው ወርቅ ይልቅ እጅግ የከበረ ሆኖ፣ ኢየሱስ ክርስቶስ በሚገለጥበት ጊዜ ምስጋናን፣ ክብርንና ውዳሴን እንዲያመጣ ነው። ⁸ምንም እንኳ አይታችሁት ባታውቁም ትወዱታላችሁ፤ አሁንም ባታዩትም ታምኑበታላችሁ፤ በማይነገርና ክብር በሞላበት ደስታም ሐሤት ታደርጋላችሁ፤ ⁹የእምነታችሁን ፍጻሜ፣ የነፍሳችሁን ድነት እየተቀበላችሁ ናችሁና።

¹⁰ለእናንተ ስለ ተዘጋጀው ጸጋ የተናገሩ ነቢያት፣ ስለዚህ ድነት መረመሩ፣ በጥንቃቄም ፈለጉ፤ ¹¹በእነርሱ ውስጥ የነበረው የክርስቶስ መንፈስ የክርስቶስን መከራና ከዚያም በኋላ የሚመጣውን ክብር አስቀድሞ ሲናገር፣ የጠቆመውን ጊዜና ሁኔታ ይፈልጉ ነበር። ¹²ራሳቸውን ሳይሆን እናንተን እንዳገለገሉ ተገለጠላቸው፤ ይህም ከሰማይ በተላከው መንፈስ ቅዱስ የምሥራቹን በሰበኩላችሁ ሰዎች በኩል አሁን ስለ ተነገራችሁ ነገሮች በተናገሩ ጊዜ ነበር። መላእክትም እንኳ እነዚህን ነገሮች ለማየት ይናፍቃሉ።

ቅዱሳን ለመሆን መጠራት

¹³ስለዚህ አእምሮአችሁን ለሥራ አዘጋጅታችሁ፣ ፈጽሞም በመጠንቀቅ፣ ኢየሱስ ክርስቶስ በሚገለጥበት ጊዜ በሚመጣላችሁ ጸጋ ሙሉ በሙሉ ተስፋ አድርጉ። ¹⁴እንደ ታዛዥ ልጆች፣ ባለማወቃችሁ ጊዜ ትከተሉአቸው በነበሩ ምኞቶች አትቀረጹ። ¹⁵ነገር ግን የጠራችሁ እርሱ ቅዱስ እንደ ሆነ፣ እናንተም በምታደርጉት ሁሉ ቅዱሳን ሁኑ፤

¹⁶ተብሎ ተጽፎአልና፤ “እኔ ቅዱስ ነኝና ቅዱሳን ሁኑ።”

¹⁷ያለ አድልዎ እያንዳንዱን ሥራ የሚፈርድ አባትን የምትጠሩ ከሆነ፣ በዚህ ምድር የመጻተኝነታችሁን ዘመን በፍርሃትና በአክብሮት አሳልፉ። ¹⁸ከአባቶቻችሁ ከወረሳችሁት ከንቱ ኑሮ ያዳናችሁ፣ የሚጠፋው ብርና ወርቅ እንዳልሆነ ታውቃላችሁ፤ ¹⁹ነገር ግን ነውርና እድፍ እንደሌለው በግ፣ በክቡር በክርስቶስ ደም ነው። ²⁰እርሱም ዓለም ከመፈጠሩ በፊት የተመረጠ፣ ስለ እናንተም በዚህ መጨረሻ ዘመን የተገለጠ ነው። ²¹በእርሱ በኩል፣ ከሙታን ባስነሣውና ክብርን በሰጠው በአባታችን ታምናላችሁ፤ ስለዚህ እምነታችሁና ተስፋችሁ በአባታችን ነው።

²²እውነትን በመታዘዝ ነፍሳችሁን ለወንድማማች ቅን ፍቅር አንጽታችኋልና፣ እርስ በርሳችሁ ከንጹሕ ልብ አጥብቃችሁ ተዋደዱ። ²³ዳግመኛ ተወልዳችኋልና፤ ይህም ከሚጠፋ ዘር ሳይሆን ከማይጠፋ ዘር፣ በሕያውና ለዘላለም በሚኖር በአባታችን ቃል በኩል ነው። ²⁴ተብሎአልና፤ “ሰው ሁሉ እንደ ሣር ነው፣ ክብሩም ሁሉ እንደ ሜዳ አበባ ነው፤ ሣሩ ይጠወልጋል አበባውም ይረግፋል፤ ²⁵የአባታችን ቃል ግን ለዘላለም ይኖራል።” የተሰበከላችሁም ቃል ይህ ነው።