1 KaPhethro 1

1 ¹UPhethro, umphostoli kaJesu Khristu, kubo abakhethiweyo abangabahambi abahlakazekile ePontu, eGalathiya, eKhaphadokiya, e-Asiya, naseBhithiniya. ²Nakhethwa ngokwazi kwangaphambili kukaBaba wethu, nangcweliswa nguMoya oNgcwele, ukuze nilalele uJesu Khristu nifafazwe ngegazi lakhe: umusa nokuthula makwandiswe kini.

Ukuzalelwa Ethembeni Eliphilayo

³Makabongwe uBaba wethu, uYise weNkosi yethu uJesu Khristu: ngesihawu sakhe esikhulu wasizala kabusha ethembeni eliphilayo ngokuvuka kukaJesu Khristu kwabafileyo, ⁴efeni elingenakubhubha, elingenakonakala, nelingenakubuna, eligcinelwe nina ezulwini, ⁵enigcinwa ngamandla kaBaba wethu ngokholo, kube yinsindiso eselilungele ukwambulwa ngesikhathi sokugcina. ⁶Niyajabula kakhulu ngalokhu, nakuba manje, okwesikhashana, kungaba kudingeke ukuba nidabukiswe yizilingo ezahlukene. ⁷Lokhu kwenzekile ukuze ukholo lwenu—oluvivinyiweyo lwatholakala luqotho, lubaluleke ngaphezu kwegolide elicwengwe ngomlilo kodwa liyabhubha—lulethe udumo, inkazimulo, nokuhlonishwa mhla ebonakala uJesu Khristu. ⁸Nakuba ningakaze nimbone, niyamthanda; nakuba ningamboni manje, niyamethemba, nithokoza ngentokozo engenakuchazwa negcwele inkazimulo, ⁹ngokuba namukela umphumela wokholo lwenu, insindiso yemiphefumulo yenu.

¹⁰Abaprofethi abakhuluma ngomusa enawabelwe baphenya becwaninga ngokucophelela ngale nsindiso, ¹¹befuna ukwazi ukuthi yisiphi isikhathi nezimo uMoya kaKhristu owawukubo awawukhomba, mhla ebikezela ngokuhlupheka kukaKhristu nangenkazimulo eyayiyolandela. ¹²Kwambulwa kubo ukuthi babengazikhonzi bona, kodwa babekhonza nina, lapho bekhuluma ngalezi zinto esezimenyezelwe kini yilabo abanishumayeza izindaba ezinhle ngoMoya oNgcwele othunyelwe uvela ezulwini. Ngisho nezingelosi zilangazelela ukuzihlola lezi zinto.

Ukubizelwa Ukuba Ngcwele

¹³Ngakho-ke, nibophe izinkalo zezingqondo zenu, niqwashe ngokupheleleyo, nibeke ithemba lenu ngokugcwele emuseni eniyakuwulethelwa mhla ebonakaliswa uJesu Khristu. ¹⁴Njengabantwana abalalelayo, ningavumeli ukuba nibunjwe yizinkanuko enanizilandela ngaphambili ebuwuleni benu. ¹⁵Kodwa njengoba lowo owanibizayo engcwele, nani yibani ngcwele kukho konke enikwenzayo;

¹⁶ngokuba kulotshiwe ukuthi: “Yibani ngcwele, ngokuba mina ngingcwele.”

¹⁷Njengoba nibiza uBaba owahlulela umuntu ngamunye ngokwesenzo sakhe engakhethi, chithani isikhathi sokuhlala kwenu njengabahambi lapha ngokwesaba okunenhlonipho. ¹⁸Niyazi ukuthi akusilo isiliva negolide—izinto ezibhubhayo—ezanihlenga ekuphileni okuyize enakuthatheliswa okhokho benu, ¹⁹kodwa nahlengwa ngegazi likaKhristu eliyigugu, elewundlu elingenasici nelingenabala. ²⁰Owakhethwa ngaphambi kokusekelwa komhlaba, kodwa owabonakaliswa kulezi zikhathi zokugcina ngenxa yenu. ²¹Ngaye nikholwa kuBaba wethu, owamvusa kwabafileyo wamnika inkazimulo, ukuze ukholo nethemba lenu kube kuBaba wethu.

²²Njengoba nihlanzile imiphefumulo yenu ngokulalela iqiniso, kwaze kwaba nothando oluqotho ngabazalwane, thandanani ngokujulileyo ngenhliziyo ehlanzekileyo. ²³Ngokuba nizelwe kabusha—hhayi ngembewu ebolayo, kodwa ngengaboliyo—ngezwi likaBaba wethu eliphilayo nelimiyo. ²⁴Ngokuba, “Bonke abantu banjengotshani, nayo yonke inkazimulo yabo injengembali yasendle; utshani buyabuna nembali iyawohloka, ²⁵kodwa izwi likaBaba wethu limi kuze kube phakade.” Yileli izwi elashunyayelwa kini.