Pedhru Alembera Anthu Akumwazika

Kuwangisa kuna Akristau anabonera thangwi ya cikhulupiro cawo, kuakumbusa cidikhiro cawo cakukhala maso na kuti iwo ndi anthu akusankhulwa a Baba wathu.

Kapitulu 1.

Pedhru, apostolo wa Yezu Kirixtu, kuna anthu akusankhulwa, alendo adamwazika ku Ponto, Galasiya, Kapadhosiya, Aziya, na Bitiniya. Akusankhulwa mwakubverana na kudziwiratu kwa Baba wathu, acenesewa na Nzimu Wakucena, toera kubvera Yezu Kirixtu na kusansaizwa na ciropa cace: kukoma ntima na ntendere pizinjiswe kuna imwe.

Kubalwa mu Cidikhiro Camoyo

Mbasimbwe Baba wathu, Baba wa Mbuya wathu Yezu Kirixtu: thangwi ya ntsisi zace zikulu, atibala papswa toera tikhale na cidikhiro camoyo kubulukira mu kulamuka kwa Yezu Kirixtu muli akufa, toera tikhale na unakhi wakukhonda kufudzika, wakukhonda kuononeka, peno kumala, wakukoyerwa kudzulu thangwi ya imwe, imwe munatsidzikizwa na mphambvu za Baba wathu kubulukira mu cikhulupiro, toera mukhale na upulumuki wakukhunganyika kupangizwa mu n'dzidzi wakumalisa. Mu pyenepi musakomerwa kakamwe, ngakhala cincino, mu n'dzidzi ung'ono, musafunika kunentseka na mayesero akusiyana-siyana. Pyenepi pyacitika toera cikhulupiro canu—cakuyeserwa mbacioneka ndi cadidi, cakufunika kakamwe kupita ouro inayeserwa na moto mbwenye inaonongekambo—cikwanise kubweresa matamiko, mbiri, na cilemedzo n'dzidzi unadzaonekera Yezu Kirixtu. Ngakhala cipo mwamuona, musamufuna; ngakhala nkhabe kumuona cincino, musamukhulupira, mbamukomerwa na kutsandzaya kwakukhonda longeka mbakudzala na mbiri, thangwi musatambira cifuniro ca cikhulupiro canu, upulumuki wa miyoyo yanu.

Aprofeta ale adalonga pya kukoma ntima kudafunika kubwera kuna imwe, afufudza mbasaka mwadidi pya upulumuki unowu, mbasaka n'dzidzi na pinthu pidapangiza Nzimu wa Kirixtu udakhala muna iwo, pidalongeratu iye nyatwa za Kirixtu na mbiri zinadzatowera nduli mwace. Apangizwa kuti: nee akhatumikira okha, mbwenye akhatumikira imwe, mukhalonga iwo pinthu pyenepi pidamwazwa cincino kuna imwe kubulukira mu ale adakumwazirani mphangwa zadidi na mphambvu za Nzimu Wakucena udatumwa kubuluka kudzulu. Ngakhala aanju asafuna kakamwe kuona pinthu pyenepi.

Kucemerwa Toera Kukhala Akucena

Na tenepo, khunganyani manyerezero anu toera kuphata basa mbakhala akudziwa mwadidi, dikhirani mwakukwana kukoma ntima kunadzabweresewa kuna imwe n'dzidzi unadzapangizwa Yezu Kirixtu. Ninga ana akubvera, lekani kutawirisa kusandukiswa na khumbo zidatowera imwe kale mu kusowa dziwa kwanu. Mbwenye ninga ule adakucemerani ndi wakucena, khalanimbo akucena mu pyonsene pinacita imwe;

thangwi pyalembwa: “Khalani akucena, thangwi Ine ndine wakucena.”

Nakuti musacemera Baba anatonga basa ya munthu m'bodzi na m'bodzi mwakukhonda sankhula nkhope, pitisani n'dzidzi wanu wa ualendo pano mu kugopa kwakulemedza. Musadziwa kuti parata na ouro—pinthu pinaonongeka—nee pyakupulumusani ku umaso wauxamba udatambira imwe kubuluka kuna ambuya anu, mbwenye mwapulumuswa na ciropa cakufunika ca Kirixtu, ninga mwanabira wakukhonda kukhala na cilema peno cadonda. Iye akusankhulwa mbukanati kucitwa dziko, mbwenye apangizwa mu midzidzi ino yakumalisa thangwi ya imwe. Kubulukira muna Iye musakhulupira Baba wathu, adamulamusa muli akufa mbampasa mbiri, toera cikhulupiro na cidikhiro canu pikhale muna Baba wathu.

Nakuti mwacenesa miyoyo yanu mu kubvera undimomwene toera kukhala na kufuna kwa undimo kwa abale, funanani unango na ndzace kakamwe na ntima wakucena. Thangwi imwe mwabalwa papswa—tayu na mbeu inaonongeka mbwenye na mbeu yakukhonda kuonongeka—kubulukira mu fala ya Baba wathu yamoyo yakukhonda kumala. Thangwi, “Anthu onsene ali ninga tsanga, mbiri yawo yonsene iri ninga maluwa a m'munda; tsanga isauma, maluwa asagwa, mbwenye fala ya Baba wathu isakhala kwenda na kwenda.” Na iyi ndi fala idapalizirwa kuna imwe.