1 Peteru 1

1 ¹Peteru, aposteli Jesu Kristi, sí àwọn àjèjì àyànfẹ́ tí a ti fọ́nká ká Pontu, Galatia, Kapadokia, Asia, àti Bitinia. ²Ẹni tí a yàn gẹ́gẹ́ bí ìmọ̀tẹ́lẹ̀ Baba wa, tí a sọ di mímọ́ nípa Ẹ̀mí Mímọ́, láti gbọ́rọ̀ sí Jesu Kristi àti láti fi ẹ̀jẹ̀ rẹ̀ wọ́n yín: kí oore-ọ̀fẹ́ àti àlàáfíà máa pọ̀ sí i fún yín.

A Bí wa sínú Ìrètí Ààyè

³Ìbùkún ni fún Baba wa, Baba Olúwa wa Jesu Kristi: nípa àánú rẹ̀ ńlá ló fi fún wa ní ìbí tuntun sínú ìrètí ààyè nípasẹ̀ àjíǹde Jesu Kristi kúrò nínú òkú, ⁴sínú ogún tí kì yóò díbàjẹ́, tí kì yóò bàjẹ́, tàbí kì yóò ṣá láé, tí a pa mọ́ ní ọ̀run fún yín, ⁵ẹni tí a ń pa mọ́ nípa ìgbàgbọ́ nípasẹ̀ agbára Baba wa fún ìgbàlà tí ó ti ṣetán láti fi hàn ní àkókò ìkẹyìn. ⁶Ẹ̀yin ń yọ̀ gidigidi nínú èyí, bí ó tilẹ̀ jẹ́ pé nísinsìnyí, fún ìgbà díẹ̀, ó lè ṣe pé onírúurú ìdánwò ń pọ́n yín lójú. ⁷Ìwọ̀nyí ṣẹlẹ̀ kí ìgbàgbọ́ yín—tí a dánwò tí a sì rí i pé òtítọ́ ni, tí ó níye lórí ju wúrà tí a fi iná yọ́ tí ó sì ń ṣègbé lọ—lè mú ìyìn, ògo, àti ọ̀wọ̀ wá nígbà tí Jesu Kristi bá farahàn. ⁸Bí ẹ kò tilẹ̀ tí í rí i rí, ẹ̀yin fẹ́ràn rẹ̀; bí ẹ kò tilẹ̀ rí i nísinsìnyí, ẹ̀yin gbà á gbọ́, tí ẹ̀ ń yọ̀ pẹ̀lú ayọ̀ tí ó kọjá ọ̀rọ̀ tí ó sì kún fún ògo, ⁹nítorí ẹ̀yin ń gba èrèdi ìgbàgbọ́ yín, ìgbàlà ọkàn yín.

¹⁰Àwọn wòlíì tí ó sọ̀rọ̀ nípa oore-ọ̀fẹ́ tí a pète fún yín ṣe ìwádìí wọ́n sì fi àìfọ̀kànbalẹ̀ wá ìgbàlà yìí, ¹¹tí wọ́n ń wá àkókò àti ipò tí Ẹ̀mí Kristi tí ó wà nínú wọn ń tọ́ka sí, nígbà tí ó sọ àsọtẹ́lẹ̀ ìyà Kristi àti àwọn ògo tí yóò tẹ̀lé wọn. ¹²A fi hàn fún wọn pé: kì í ṣe ara wọn ni wọ́n ń sìn bí kò ṣe ẹ̀yin, nígbà tí wọ́n sọ̀rọ̀ nípa àwọn nǹkan wọ̀nyí tí a ti kéde fún yín nísinsìnyí nípasẹ̀ àwọn tí ó wàásù ìhìnrere fún yín nípa Ẹ̀mí Mímọ́ tí a rán wá láti ọ̀run. Kódà àwọn angẹli ń ṣàfẹ́rí láti wo àwọn nǹkan wọ̀nyí.

A Pè wá láti Jẹ́ Mímọ́

¹³Nítorí náà, kí ẹ múra ọkàn yín sílẹ̀ fún iṣẹ́, kí ẹ sì wà ní àìrọ́kúnrùn pátápátá, kí ẹ gbé ìrètí yín kalẹ̀ ní kíkún lórí oore-ọ̀fẹ́ tí a ó mú wá fún yín nígbà tí a bá fi Jesu Kristi hàn. ¹⁴Gẹ́gẹ́ bí ọmọ onígbọràn, ẹ má ṣe jẹ́ kí àwọn ìfẹ́kúfẹ̀ẹ́ tí ẹ ti tẹ̀lé rí nínú àìmọ̀ yín ṣe àwòṣe yín. ¹⁵Ṣùgbọ́n gẹ́gẹ́ bí ẹni tí ó pè yín ti jẹ́ mímọ́, bẹ́ẹ̀ ni kí ẹ̀yin náà jẹ́ mímọ́ nínú gbogbo ohun tí ẹ bá ń ṣe;

¹⁶nítorí a ti kọ ọ́ pé: “Ẹ jẹ́ mímọ́, nítorí mímọ́ ni èmi.”

¹⁷Níwọ̀n bí ẹ ti ń ké pe Baba tí ó ń ṣe ìdájọ́ iṣẹ́ olúkúlùkù láìsí ojúsàájú, ẹ fi ìbẹ̀rù ọ̀wọ̀ lo àkókò àjèjì yín níhìn-ín. ¹⁸Ẹ̀yin mọ̀ pé kì í ṣe fàdákà àti wúrà—àwọn nǹkan tí ó ń díbàjẹ́—ni a fi rà yín padà kúrò nínú ìgbésí ayé asán tí a fi lélẹ̀ láti ọ̀dọ̀ àwọn baba ńlá yín, ¹⁹ṣùgbọ́n pẹ̀lú ẹ̀jẹ̀ iyebíye Kristi, ọ̀dọ́-àgùntàn tí kò ní àbùkù tàbí àbàwọ́n. ²⁰Ẹni tí a yàn ṣáájú ìpìlẹ̀ ayé, tí a fi hàn ní àwọn àkókò ìkẹyìn wọ̀nyí nítorí yín. ²¹Nípasẹ̀ rẹ̀ ni ẹ gba Baba wa gbọ́, ẹni tí ó jí i dìde kúrò nínú òkú tí ó sì fi ògo fún un, kí ìgbàgbọ́ àti ìrètí yín lè wà nínú Baba wa.

²²Níwọ̀n bí ẹ ti wẹ ọkàn yín mọ́ nípa gbígbọ́rọ̀ sí òtítọ́ fún ìfẹ́ tòótọ́ sí àwọn arákùnrin, ẹ fẹ́ràn ara yín lọ́nà jíjinlẹ̀ láti inú ọkàn mímọ́. ²³Nítorí a ti tún yín bí—kì í ṣe láti inú irúgbìn tí ń díbàjẹ́ bí kò ṣe èyí tí kì í díbàjẹ́—nípasẹ̀ ọ̀rọ̀ ààyè Baba wa tí ó dúró pẹ́títí. ²⁴Nítorí, “Gbogbo ènìyàn dàbí koríko, àti gbogbo ògo wọn dàbí ìtànná pápá; koríko a sì rọ, ìtànná a sì rẹ̀ dànù, ²⁵ṣùgbọ́n ọ̀rọ̀ Baba wa dúró títí láéláé.” Èyí sì ni ọ̀rọ̀ tí a wàásù fún yín.