Petero Aandĩkĩra Arĩa Maahurunjirwo

Ũmĩrĩrio kũrĩ Akristiano arĩa marathĩĩnĩka nĩ ũndũ wa wĩtĩkio wao, ũkĩmaririkania kĩĩrĩgĩrĩro kĩao kĩrĩ muoyo na ũrĩa matariĩ tawa andũ arĩa athuure a Ithe witũ.

Gĩcunjĩ 1.

Petero, mũtũmwo wa Jesũ Kristũ, kũrĩ arĩa aathuure, ageni arĩa maahurunjirwo bũrũriinĩ wa Ponto, na Galatia, na Kapadokia, na Asia, na Bithinia. Aathurirwo kũringana na ũmenyi wa mbere wa Ithe witũ, magĩtherio nĩ Roho Mũtheru, nĩguo maathĩkĩre Jesũ Kristũ na maminjĩrĩrwo thakame yake: wega na thaayũ irooingĩhĩra harĩ inyuĩ.

Gũciarĩrwo Mwĩhokoinĩ ũrĩ Muoyo

Arogoocwo Ithe witũ, o we Ithe wa Mwathani witũ Jesũ Kristũ: nĩ ũndũ wa tha ciake nene nĩatũciarire rĩngĩ tũgĩe na mwĩhoko ũrĩ muoyo nĩ ũndũ wa kũriũka kwa Jesũ Kristũ kuuma kũrĩ arĩa akuũ, tũgĩe na igai rĩrĩa rĩtangĩthira, kana rĩthũkĩre, kana rĩhoohe, rĩrĩa mũigĩirwo kũu igũrũ, inyuĩ arĩa mũgitĩirwo nĩ hinya wa Ithe witũ nĩ ũndũ wa wĩtĩkio, mweterere ũhonokio ũrĩa wĩhaarĩirie kũguũrio ihinda rĩa mũthia. Nĩmũkenaga mũno nĩ ũndũ ũcio, o na gũtuĩka rĩu, kwa ihinda inini, no mũkorwo nĩmũthĩĩnĩkĩte nĩ magerio ma mĩthemba mĩingĩ. Maũndũ macio mokĩte nĩgeetha wĩtĩkio wanyu—ũrĩa wageririo ũkĩoneka nĩ wa ma, ũrĩ bata gũkĩra thahabu ĩrĩa ĩtheragio na mwaki ĩrĩa o na kũrĩ ũguo nĩĩthũkaga—ũtwaare ngaatho, na riiri, na gĩtĩĩo rĩrĩa Jesũ Kristũ akoonekana. O na gũtuĩka mũtirĩ mwamuona, nĩmũmwendete; o na gũtuĩka mũtiramuona rĩu, nĩmũmwĩhokete, mũgĩkenaga na gĩkeno kĩrĩa gĩtangĩgweteka na kĩiyũrĩte riiri, tondũ nĩmũkũamũkĩra kĩrĩa wĩtĩkio wanyu ũrorete, nĩkĩo ũhonokio wa mĩoyo yanyu.

Anabii arĩa maaririe ũhoro wa wega ũrĩa mwathĩrĩirwo nĩmatuĩririe na magĩcaria wega ũhoro wa ũhonokio ũcio, magĩcaria menye ihinda na mũikarĩre ũrĩa Roho wa Kristũ ũrĩa warĩ thĩinĩ wao wonanagia, hĩndĩ ĩrĩa waarathaga ũhoro wa mĩnyamaro ya Kristũ na riiri ũrĩa warĩ kũrũmĩrĩra. Nĩmaaguũrĩirio atĩ: matiateithagia o ene no nĩinyuĩ maateithagia, rĩrĩa maaririe ũhoro wa maũndũ macio rĩu mamũmenyithĩtio nĩ arĩa maamũhunjĩirie Ũhoro Mwega na hinya wa Roho Mũtheru ũrĩa watũmirwo kuuma igũrũ. O na araika nĩmeriragĩria mũno kũrora maũndũ macio.

Gwĩtwo Mũtuĩke Atheru

Nĩ ũndũ ũcio, mwĩohe meciiria manyu mwĩhaarĩrie gwĩka wĩra, na mwĩgirĩrĩrie biũ, mwĩhoke biũ wega ũrĩa mũkaareeherwo rĩrĩa Jesũ Kristũ akaaguũrio. O ta ciana iria ciathĩkaga, mũtikareke mũthondekwo kũringana na merirĩria marĩa mwarũmagĩrĩra tene rĩrĩa mwarĩ ũrimũ. No o ta ũrĩa ũrĩa wamwĩtire arĩ mũtheru, ũguo noguo mwagĩrĩirwo gũtuĩka atheru maũndũinĩ manyu moothe;

tondũ nĩkwandĩkĩtwo atĩrĩ: “Tuĩkai atheru, tondũ niĩ ndĩ mũtheru.”

Na tondũ mũkayagĩra Ithe ũrĩa ũtuĩraga o mũndũ ciira kũringana na ciĩko ciake atekũrora mothiũ, ikarai hĩndĩ ĩyo yanyu ya ũgeni gũkũ mũrĩ na gwĩtigĩra. Nĩmũũĩ atĩ mũtihonokirio kuuma mũtũũrĩreinĩ wa tũhũ ũrĩa mwagaĩirwo nĩ maithe manyu ma tene na betha kana thahabu—indo iria ithũkaga— no nĩ thakame ya goro ya Kristũ, ũrĩa atariĩ ta kagondu gatarĩ na kaũũgũ kana handũ hatarĩ hatheru. Aathuurĩtwo thĩ ĩtanagĩa, no akĩguũrio mahindainĩ maya ma mũthia nĩ ũndũ wanyu. Nĩ ũndũ wake nĩmwĩtĩkĩtie Ithe witũ, ũrĩa wamũriũkirie kuuma kũrĩ arĩa akuũ na akĩmũhe riiri, nĩgeetha wĩtĩkio wanyu na mwĩhoko wanyu ikorwo irĩ harĩ Ithe witũ.

Na tondũ nĩmwĩtheririe mĩoyo yanyu na kũathĩkĩra ũhoro wa ma nĩgeetha mwendane na ariũ a ithe witũ na wendo ũtarĩ na ũhinga, endanai mũno kuuma ngoro theru. Nĩgũkorwo nĩmũciarĩtwo rĩngĩ—ti na mbeũ ĩrĩa ĩbuthaga no nĩ ĩrĩa ĩtabuthaga—nĩ ũndũ wa kiugo kĩa Ithe witũ kĩrĩa kĩrĩ muoyo na gĩtũũraga. Nĩgũkorwo, “Andũ oothe mahaana ta nyeki, na riiri wao wothe ũhaana ta mahũa ma gĩthaka; nyeki nĩĩhoohaga na mahũa makagũa, no kiugo kĩa Ithe witũ gĩtũũraga nginya tene na tene.” Na gĩkĩ nĩkĩo kiugo kĩrĩa mwahunjĩirio.