1 Petro 1

1 ¹Petro, mtume wa Yesu Kristo, kwa wateule wageni waliotawanyika katika Ponto, Galatia, Kapadokia, Asia, na Bithinia. ²Waliochaguliwa kwa kujua kwake tangu zamani Baba yetu, waliotakaswa na Roho Mtakatifu, ili kumtii Yesu Kristo na kunyunyiziwa damu yake: neema na amani na zizidishwe kwenu.

Kuzaliwa Katika Tumaini lenye Uzima

³Ahimidiwe Baba yetu, naye ni Baba wa Bwana wetu Yesu Kristo: kwa rehema zake kuu alituzaa mara ya pili katika tumaini lenye uzima kwa njia ya kufufuka kwa Yesu Kristo kutoka kwa wafu, ⁴hata katika urithi usioweza kuharibika, wala kutiwa unajisi, wala kunyauka, uliowekwa mbinguni kwa ajili yenu, ⁵mnaolindwa kwa nguvu za Baba yetu kwa njia ya imani, hata mpate wokovu ulio tayari kufunuliwa wakati wa mwisho. ⁶Katika jambo hilo mnashangilia sana, ijapokuwa sasa, kwa kitambo kidogo, imewapasa kuhuzunishwa na majaribu mbalimbali. ⁷Hayo yamekuja ili imani yenu—iliyojaribiwa na kuonekana kuwa ya kweli, yenye thamani kuliko dhahabu ipoteayo ijapokuwa hujaribiwa kwa moto—ilete sifa, na utukufu, na heshima wakati Yesu Kristo atakapofunuliwa. ⁸Ijapokuwa hamkumwona kamwe, mnampenda; ijapokuwa hammwoni sasa, mnamwamini, mkifurahi kwa furaha isiyoneneka na iliyojaa utukufu, ⁹kwa kuwa mnapokea lengo la imani yenu, yaani wokovu wa roho zenu.

¹⁰Manabii walionena juu ya neema iliyokusudiwa kwa ajili yenu waliuchunguza na kuutafuta kwa bidii wokovu huo, ¹¹wakitafuta wakati na hali ambavyo Roho wa Kristo aliyekuwa ndani yao aliviashiria, alipotabiri mateso ya Kristo na utukufu utakaofuata baada yake. ¹²Ilifunuliwa kwao: hawakujihudumia wenyewe, bali waliwahudumia ninyi, waliponena mambo hayo ambayo sasa yamehubiriwa kwenu kwa njia ya wale waliowahubiria habari njema kwa Roho Mtakatifu aliyetumwa kutoka mbinguni. Hata malaika wanatamani kuyachungulia mambo hayo.

Mmeitwa Kuwa Watakatifu

¹³Basi, mkiwa na nia zilizojiweka tayari kwa tendo na kuwa na kiasi kikamilifu, wekeni tumaini lenu kikamilifu juu ya neema mtakayoletewa wakati Yesu Kristo atakapofunuliwa. ¹⁴Kama watoto watiifu, msiache kufinyangwa na tamaa zile mlizozifuata zamani katika ujinga wenu. ¹⁵Bali kama vile yeye aliyewaita alivyo mtakatifu, ninyi nanyi iweni watakatifu katika mwenendo wenu wote;

¹⁶kwa maana imeandikwa: "Iweni watakatifu, kwa kuwa mimi ni mtakatifu."

¹⁷Kwa kuwa mnamwita Baba ahukumuye kila tendo pasipo upendeleo, ishini wakati wa ugeni wenu hapa kwa kicho na hofu. ¹⁸Mnajua ya kuwa fedha na dhahabu—vitu vinavyoharibika—havikuwakomboa katika mwenendo wenu usiofaa uliopokelewa kwa baba zenu, ¹⁹bali kwa damu ya thamani ya Kristo, aliye kama mwana-kondoo asiye na kilema wala doa. ²⁰Aliyechaguliwa kabla ya kuwekwa misingi ya ulimwengu, aliyefunuliwa nyakati hizi za mwisho kwa ajili yenu. ²¹Kwa njia yake mnamwamini Baba yetu, aliyemfufua kutoka kwa wafu na kumpa utukufu, hata imani yenu na tumaini lenu viwe kwa Baba yetu.

²²Kwa kuwa mmezitakasa roho zenu kwa kuitii kweli hata mpate kupendana ndugu kwa unyofu, pendaneni ninyi kwa ninyi kwa moyo wote kutoka moyo safi. ²³Kwa maana mmezaliwa upya—si kwa mbegu iharibikayo bali kwa ile isiyoharibika—kwa njia ya neno la Baba yetu lililo hai na lidumulo. ²⁴Kwa maana, "Watu wote ni kama majani, na utukufu wao wote ni kama maua ya kondeni; majani hunyauka na maua huanguka, ²⁵bali neno la Baba yetu hudumu milele." Na neno hilo ndilo lililohubiriwa kwenu.