Yakobo 5

5 ¹Njoni sasa, ninyi mlio matajiri, lieni na kuomboleza kwa ajili ya taabu zinazowajia. ²Utajiri wenu umeoza, na mavazi yenu yameliwa na nondo. ³Dhahabu yenu na fedha yenu vimeingia kutu; na kutu yao itashuhudia dhidi yenu na kuunguza mwili wenu kama moto. Mmejilundikia utajiri katika siku za mwisho. ⁴Tazameni: ujira mliowanyima wafanyakazi walioyavuna mashamba yenu unalia, na vilio vya wavunaji vimefika masikioni mwa Baba wa majeshi ya mbinguni. ⁵Mliishi duniani katika anasa na starehe. Mmeinenepesha mioyo yenu katika siku ya kuchinjwa. ⁶Mmemhukumu na kumuua yule mwenye haki, ambaye hawapingi.

Ngojeni kwa Mioyo yenye Saburi

⁷Basi kuweni na saburi, ndugu zangu, hata kuja kwake Bwana. Mfikirieni mkulima: hulingoja kwa saburi tunda la thamani la nchi, hata litakapopata mvua za mwanzo na za mwisho. ⁸Ninyi nanyi kuweni na saburi. Itieni nguvu mioyo yenu, kwa maana kuja kwake Bwana kumekaribia. ⁹Msinung'unikiane ninyi kwa ninyi, ndugu zangu, msije mkahukumiwa. Tazameni—Mhukumu amesimama mlangoni. ¹⁰Ndugu zangu, watwaeni manabii walionena kwa jina la Baba yetu kuwa mfano wa mateso na saburi. ¹¹Angalieni, twawaita wenye heri wale waliovumilia. Mmesikia habari ya uvumilivu wa Ayubu na mmeona jinsi Baba yetu alivyotenda—Baba yetu ni mwingi wa huruma na rehema.

¹²Zaidi ya yote, ndugu zangu, msiape—wala kwa mbingu, wala kwa nchi, wala kwa kiapo kinginecho chote. Ndiyo yenu na iwe ndiyo, na siyo yenu iwe siyo, msije mkaangukia hukumuni.

Sala ya Imani Huponya

¹³Je, kuna mtu yeyote miongoni mwenu anayeteseka? Na aombe. Je, kuna aliye na furaha? Na aimbe sifa. ¹⁴Je, kuna mgonjwa miongoni mwenu? Na awaite wazee wa kanisa, na wazee wamwombee, wakimpaka mafuta kwa jina la Bwana. ¹⁵Na sala ya imani itamwokoa mgonjwa, na Bwana atamwinua. Naye kama amefanya dhambi, atasamehewa. ¹⁶Basi ungameni dhambi zenu ninyi kwa ninyi, na kuombeana ninyi kwa ninyi, mpate kuponywa. Sala ya mwenye haki ina nguvu nyingi na hutenda kazi. ¹⁷Eliya alikuwa mtu kama sisi, naye aliomba kwa bidii isinyeshe mvua; na haikunyesha mvua juu ya nchi kwa muda wa miaka mitatu na miezi sita. ¹⁸Kisha akaomba tena, na mbingu zikatoa mvua, na nchi ikazaa matunda yake.

¹⁹Ndugu zangu, mtu yeyote miongoni mwenu akipotoka na kuiacha kweli, na mtu mwingine akamrudisha, ²⁰na ajue hivi: yeye amrudishaye mwenye dhambi kutoka njia yake ya upotovu ataiokoa nafsi yake na mauti, na kufunika wingi wa dhambi.