Yakobo 4

4 ¹Vita na mapigano kati yenu hutoka wapi? Je, si tamaa zenu zinazopigana ndani yenu? ²Mnatamani na hamna—mnaua. Mna choyo na hamwezi kupata—mnashindana na kupigana. Hamna kwa sababu hamwombi. ³Mnaomba na hampokei, kwa sababu mnaomba vibaya, ili mtumie kwa anasa zenu wenyewe. ⁴Enyi wazinzi! Je, hamjui ya kuwa urafiki na dunia ni uadui juu ya Baba yetu? Basi kila achaguaye kuwa rafiki wa dunia hujifanya adui wa Baba yetu. ⁵Au mnadhani Maandiko yanena bure, yakisema kwamba roho aliyeiweka ndani yetu hutamani kwa wivu? ⁶Lakini yeye hutoa neema iliyozidi. Ndiyo sababu Maandiko yasema, "Baba yetu huwapinga wenye kiburi, bali huwapa neema wanyenyekevu."

⁷Basi nyenyekeeni kwa Baba yetu. Mpingeni Ibilisi, naye atawakimbia. ⁸Mkaribieni Baba yetu, naye atawakaribia ninyi. Itakaseni mikono yenu, enyi wenye dhambi; na kuisafisha mioyo yenu, enyi wenye nia mbili. ⁹Huzunikeni, ombolezeni, na kulia. Kicheko chenu na kigeuke kuwa maombolezo, na furaha yenu kuwa uzuni. ¹⁰Nyenyekeeni mbele za Baba yetu, naye atawainua.

¹¹Ndugu zangu, msisemane vibaya ninyi kwa ninyi. Asemaye vibaya juu ya ndugu yake, au amhukumuye ndugu yake, husema vibaya juu ya sheria na kuihukumu sheria. Lakini kama ukiihukumu sheria, huitendi sheria, bali waihukumu. ¹²Yeye peke yake ndiye atoaye sheria na kuhukumu—awezaye kuokoa na kuangamiza. Wewe u nani unayemhukumu jirani yako?

Msijivune Kwa Ajili ya Kesho

¹³Haya basi, ninyi msemao, "Leo au kesho tutakwenda mji fulani, na kukaa huko mwaka mmoja, na kufanya biashara, na kupata faida." ¹⁴Nanyi hamjui yatakayokuwako kesho. Uzima wenu ni nini? Kwa maana ninyi ni ukungu, uonekanao kwa kitambo kidogo, kisha hutoweka. ¹⁵Badala yake, imewapasa kusema, "Baba yetu akipenda, tutakuwa hai, na kufanya hili au lile." ¹⁶Lakini sasa mnajivuna katika majivuno yenu. Kila kujivuna kwa namna hii ni uovu. ¹⁷Basi yeye ajuaye kutenda mema, asiyatende, kwake huyo ni dhambi.