1 Pedro 1 FHB Father's Heart Bible™

1 ¹Si Pedro, apostol ni Jesu-Cristo, sa mga pinili nga dumuluong nga nagkalapta sa Ponto, Galacia, Capadocia, Asia, kag Bitinia. ²Ginpili kamo suno sa nahauna nga pagkahibalo sang aton Amay, ginpabalaan sang Espiritu Santo, agud magtuman kay Jesu-Cristo kag mawisikan sang iya dugo: ang bugay kag paghidait magdamu sa inyo.

Natawo sa Buhi nga Paglaum

³Bulahan ang aton Amay, kag Amay sang aton Ginoong Jesu-Cristo: sa iya daku nga kalooy ginhatagan niya kita sing bag-ong pagkatawo sa isa ka buhi nga paglaum paagi sa pagkabanhaw ni Jesu-Cristo gikan sa mga patay, ⁴sa isa ka panublion nga indi gid madula, madunot, ukon malaya, nga ginatigana sa langit para sa inyo, ⁵nga paagi sa pagtuo ginaamligan sang gahum sang aton Amay para sa kaluwasan nga handa na nga ipahayag sa katapusan nga tion. ⁶Nagakalipay kamo sing daku sa sini, bisan karon, sa malip-ot nga tion, mahimo nga kinahanglan kamo magpangasubo tungud sa nagkalainlain nga mga pagtilaw. ⁷Nag-abut ini agud ang inyo pagtuo—nga gintilawan kag nasapwan nga matuud, nga labi pa nga bilidhon sang bulawan nga ginpuro sa kalayo nga madula man—magdala sing pagdayaw, himaya, kag kadungganan sa pagpakita ni Jesu-Cristo. ⁸Bisan wala ninyo sia makita, ginahigugma ninyo sia; bisan indi ninyo sia makita karon, ginasaligan ninyo sia, kag nagakalipay kamo sing kalipay nga indi mahambal kag puno sang himaya, ⁹kay ginabaton ninyo ang tuyo sang inyo pagtuo, ang kaluwasan sang inyo mga kalag.

¹⁰Parti sa sini nga kaluwasan nag-usisa kag nagsiksik sing maayo ang mga manalagna nga naghambal sang bugay nga para sa inyo, ¹¹nga ginasiksik kon ano nga tion kag kahimtangan ang ginatudlo sang Espiritu ni Cristo nga yara sa ila, sang gintagna niya ang mga pag-antus ni Cristo kag ang mga himaya nga magasunod sa sini. ¹²Ginpahayag ini sa ila: indi ang ila kaugalingon ang ila ginaalagaran kondi kamo, sang naghambal sila sang sini nga mga butang nga ginabantala na karon sa inyo paagi sa mga nagwali sang maayong balita sa inyo sa Espiritu Santo nga ginpadala gikan sa langit. Bisan ang mga anghel nagahandum sa pagtan-aw sa sini nga mga butang.

Gintawag nga Mangin Balaan

¹³Busa, sa inyo mga hunahuna nga nakahanda sa paghimo kag sa bug-os nga pagpugong sa kaugalingon, ibutang ninyo sing bug-os ang inyo paglaum sa bugay nga ihatag sa inyo kon ipahayag na si Jesu-Cristo. ¹⁴Subong masinulundon nga mga anak, dili kamo magpahulma sa mga kailigbon nga ginsunod ninyo sang una sa inyo kawalay-ihibalo. ¹⁵Apang subong nga balaan ang nagtawag sa inyo, mangin balaan man kamo sa tanan ninyo nga ginahimo;

¹⁶kay nasulat, “Mangin balaan kamo, kay balaan ako.”

¹⁷Sanglit nagatawag kamo sa isa ka Amay nga nagahukom sa tagsa ka binuhatan nga walay pagpasulabi, gamita ninyo ang inyo tion sang pagkadumuluong diri sa matinahuron nga kahadlok. ¹⁸Nahibaloan ninyo nga wala kamo matubos sang pilak kag bulawan—mga butang nga nagakadunot—gikan sa wala sing pulus nga pagkabuhi nga ginpanubli sang inyo mga ginikanan, ¹⁹kondi sang bilidhon nga dugo ni Cristo, subong sang isa ka kordero nga wala sing kasawayan ukon mansa. ²⁰Ginpili sia antes pa natukod ang kalibutan, kag ginpahayag sa sining katapusan nga mga tion tungud sa inyo. ²¹Paagi sa iya nagatuo kamo sa aton Amay, nga nagbanhaw sa iya gikan sa mga patay kag naghimaya sa iya, gani ang inyo pagtuo kag paglaum yara sa aton Amay.

²²Sanglit ginputli na ninyo ang inyo mga kalag paagi sa pagtuman sa kamatooran para sa matinud-anon nga paghigugma sa mga kauturan, maghigugmaanay kamo sing tudo gikan sa putli nga tagipusuon. ²³Kay natawo kamo liwat—indi sa binhi nga madunot kondi sa indi madunot—paagi sa buhi kag nagapadayon nga pulong sang aton Amay. ²⁴Kay, “Ang tanan nga tawo kaangay sang hilamon, kag ang tanan nila nga himaya kaangay sang mga bulak sa latagon; nagalaya ang hilamon kag nagakalarag ang mga bulak, ²⁵apang nagapadayon sa wala sing katapusan ang pulong sang aton Amay.” Kag ini amo ang pulong nga ginwali sa inyo.