اول پطروس 1 FHB Father's Heart Bible™

1 ¹پطروس، د عيسىٰ مسيح رسول، هغو غوره شوو مسافرو ته چې د پنطُس، غلطيه، کپدوکيه، آسيه او بطنيه په علاقو کښې خواره واره شوى دى. ²تاسو د زمونږ پلار د مخکښې علم مطابق غوره شوى يئ، د روحُ القُدس په وسيله پاک کړے شوى يئ، دې دپاره چې د عيسىٰ مسيح اطاعت وکړئ او د هغۀ په وينو سره پاشلى شئ: فضل او سلامتى دې په تاسو باندې زياته شى.

په يو ژوندى اُميد کښې پېدا کېدل

³زمونږ پلار مبارک دے، چې زمونږ د مالِک عيسىٰ مسيح پلار دے: هغۀ په خپل لوئ رحم سره مونږ ته د عيسىٰ مسيح د مرګ نه د بيا ژوندى کېدو په وسيله يو ژوندى اُميد ته نوے پېدايش راکړو، ⁴داسې ميراث ته چې هيڅکله نۀ خرابيږى، نۀ ورکيږى او نۀ ورژيږى، چې ستاسو دپاره په آسمان کښې ساتلے شوے دے، ⁵تاسو چې د ايمان په وسيله د زمونږ پلار په قُدرت سره ساتل کيږئ، دې دپاره چې هغه خلاصون ترلاسه کړئ چې په آخرى وخت کښې به ظاهر کړے شى. ⁶تاسو په دې کښې ډېر خوشحاليږئ، اګر چې اوس تاسو ته دا ضرورى شوے وى چې د يو څو وخت دپاره په بېلا بېلو آزمېښتونو کښې غمجن شئ. ⁷دا ځکه راغلى دى چې ستاسو ايمان — چې آزمايښتل کيږى او رښتونے موندلے شى، چې د هغو سرو زرو نه زيات قيمتى دے کوم چې په اور کښې صفا کيږى خو بيا هم خرابيږى — د عيسىٰ مسيح د ظاهرېدو په وخت کښې تعريف، لوئى او عزت راوړى. ⁸اګر چې تاسو هغه هيڅکله نۀ دے ليدلے، خو تاسو ورسره مينه کوئ؛ اګر چې تاسو هغه اوس نۀ وينئ، خو په هغۀ ايمان لرئ، او داسې خوشحالى کوئ چې نۀ بيانيږى او د جلال نه ډکه ده، ⁹ځکه چې تاسو د خپل ايمان مقصد حاصلوئ، يعنې د خپلو روحونو خلاصون.

¹⁰هغو نبيانو چې ستاسو دپاره د فضل خبره يې کوله، د دې خلاصون په حقله يې غور او په دقت سره پلټنه وکړه، ¹¹هغوئ دا پلټله چې د مسيح هغه روح چې په هغوئ کښې وو کوم وخت او حالت ته يې اشاره کوله، کله چې هغۀ د مسيح د تکليفونو او د هغو نه پس د لوئيو پېشنګوئى کوله. ¹²هغوئ ته دا ظاهر کړے شو چې هغوئ د خپل ځان خدمت نۀ کولو بلکې ستاسو، کله چې هغوئ د دغه خبرو ذکر کولو چې اوس تاسو ته د هغه کسانو په وسيله بيان کړے شوى دى چې د آسمان نه نازل شوى روحُ القُدس په ذريعه يې تاسو ته زېرے درکړو. حتىٰ فرښتې هم ارمان کوى چې په دغه خبرو کښې وګورى.

پاک کېدو ته بلل شوى

¹³نو، خپل ذهنونه د کار دپاره تيار کړئ او پوره هوښيار اوسئ، او خپل ټول اُميد په هغه فضل باندې وساتئ چې د عيسىٰ مسيح د ظاهرېدو په وخت به تاسو ته راوړلے شى. ¹⁴د فرمانبردارو بچو په شان، خپل ځان هغو خواهشاتو مطابق مۀ جوړوئ چې تاسو به يو وخت په خپل ناپوهۍ کښې د هغو پسې تلئ. ¹⁵بلکې څنګه چې هغه چا چې تاسو بللى يئ پاک دے، هم هغه شان تاسو هم په خپلو ټولو کارونو کښې پاک اوسئ؛

¹⁶ځکه چې ليکلے شوے دے، ”پاک اوسئ، ځکه چې زۀ پاک يم.“

¹⁷نو چې کله تاسو داسې پلار ته دُعا کوئ چې بې طرفدارۍ د هر چا د عمل مطابق فيصله کوى، نو دلته د خپل مسافرۍ وخت په وېره او احترام سره تېر کړئ. ¹⁸تاسو پوهيږئ چې سپين زر او سره زر — چې خرابيدونکى شيان دى — تاسو هغه بې فائدې ژوند نه خلاص نۀ کړئ چې ستاسو د پلرونو نه تاسو ته راپاتې شوے وو، ¹⁹بلکې د مسيح په قيمتى وينو سره، چې د داسې ګډ په شان دے چې هيڅ عيب او داغ نۀ لرى. ²⁰هغه د دُنيا د بنياد نه مخکښې غوره کړے شوے وو، خو ستاسو دپاره په دغه آخرى زمانه کښې ظاهر کړے شو. ²¹د هغۀ په وسيله تاسو په زمونږ پلار ايمان لرئ، چا چې هغه د مرګ نه بيا ژوندے کړو او هغۀ ته يې لوئى ورکړه، نو ستاسو ايمان او اُميد په زمونږ پلار باندې دے.

²²چونکې تاسو د حق په اطاعت سره خپل روحونه پاک کړى دى چې د وروڼو سره رښتينې مينه وکړئ، نو د پاک زړۀ نه د يو بل سره په زړۀ کښې مينه وکړئ. ²³ځکه چې تاسو بيا پېدا شوى يئ — نۀ د خرابيدونکى تخم نه بلکې د نۀ خرابيدونکى — د زمونږ پلار د ژوندى او تل پاتې کلام په وسيله. ²⁴ځکه چې، ”ټول انسانان د واښو په شان دى، او د هغوئ ټوله لوئى د پټى د ګلونو په شان ده؛ واښۀ وچيږى او ګلونه رژيږى، ²⁵خو د زمونږ پلار کلام تل دپاره پاتې کيږى.“ او دا هم هغه کلام دے چې تاسو ته تبليغ کړے شوے وو.