EkaJakobe 5

5 ¹Wozani manje, nina enicebile, khalani nibubule ngenxa yezinhlupheko ezizayo phezu kwenu. ²Ingcebo yenu ibolile, nezingubo zenu zidliwe yizinundu. ³Igolide lenu nesiliva yenu kuthombile; ukuthomba kwakho kuyakunifakazela ngokunimelene, kushise inyama yenu njengomlilo. Niqongelele ingcebo ezinsukwini zokugcina. ⁴Bhekani: iholo enaligodla kubasebenzi ababevuna amasimu enu liyakhala, nokukhala kwabavuni sekufinyelele ezindlebeni zikaBaba wamabutho asezulwini. ⁵Naphila emhlabeni ngokunethezeka nangokuzitika. Nazikhuluphalisa izinhliziyo zenu ngosuku lokuhlatshwa. ⁶Nimlahlile nambulala olungileyo, ongamelani nani.

Lindani Ngezinhliziyo Ezibekezelayo

⁷Ngakho bekezelani, bazalwane, kuze kufike iNkosi. Cabangani ngomlimi: ulindela ngokubekezela izithelo eziyigugu zomhlaba, aze athole imvula yokuqala neyokugcina. ⁸Nani bekezelani. Qinisani izinhliziyo zenu, ngoba ukufika kweNkosi sekusondele. ⁹Ningakhonondelani, bazalwane, funa nahlulelwe. Bhekani—uMahluleli umi eminyango. ¹⁰Bazalwane, thathani abaprofethi abakhuluma egameni likaBaba wethu njengezibonelo zokuhlupheka nokubekezela. ¹¹Bhekani, sithi babusisiwe labo ababekezela. Nizwile ngokubekezela kukaJobe, nabona lokho uBaba wethu akwenzayo—uBaba wethu ucebile ngesihawu nobubele.

¹²Ngaphezu kwakho konke, bazalwane bami, ningafungi—nangezulu, nangomhlaba, nangesinye isifungo. Uyebo wenu makube nguyebo, ucha wenu kube ngucha, ukuze ningaweli ekwahlulelweni.

Umkhuleko Wokholo Uyaphilisa

¹³Ukhona yini phakathi kwenu ohluphekayo? Makakhuleke. Ukhona yini ojabulayo? Makahlabelele izingoma zokudumisa. ¹⁴Ukhona yini ogulayo phakathi kwenu? Makabize abadala bebandla, bese abadala bekhuleka phezu kwakhe, bemgcoba ngamafutha egameni leNkosi. ¹⁵Umkhuleko wokholo uyakumsindisa ogulayo, iNkosi iyakumvusa. Uma eke wona, uyakuthethelelwa. ¹⁶Ngakho vumani izono zenu komunye nomunye, nikhulekelane, ukuze niphiliswe. Umkhuleko womuntu olungileyo unamandla uyasebenza. ¹⁷U-Eliya wayengumuntu onjengathi, wakhuleka ngokuzimisela ukuba lingani; alinanga emhlabeni iminyaka emithathu nezinyanga eziyisithupha. ¹⁸Wabuye wakhuleka, izulu lanika imvula, umhlaba wathela izithelo zawo.

¹⁹Bazalwane bami, uma kukhona phakathi kwenu oduka eqinisweni, omunye abuye ambuyise, ²⁰yazini lokhu: lowo obuyisa isoni endleleni yaso ephambene uyawusindisa umphefumulo waso ekufeni, asibekele izono eziningi.