Ota ezilganlarning faryodini koʻradi

Oʻrimchilarning berilmay qolgan haqlari faryod qiladi va osmon qoʻshinlarining Otasi qulogʻiga yetib boradi; boylik yiqqan boylarga yigʻlanglar deyiladi. Qolganlarga esa dehqondek kutish, azob chekkanda ibodat qilish, bir-biriga gunohlarini tan olish va adashib ketganning ortidan borish buyuriladi.

5-bob.

Endi, ey boylar, quloq solinglar! Boshingizga tushayotgan kulfatlar uchun yigʻlab-siqtanglar. Boyligingiz chirib ketdi, kiyimlaringizni kuya yedi. Oltin-kumushingizni zang bosdi; ularning zangi sizlarga qarshi guvohlik beradi va tanangizni olovdek kuydiradi. Oxirgi kunlarda boylik toʻplab oldingiz. Mana, dalalaringizni oʻrgan ishchilarga bermay qolgan haqlaringiz faryod qilmoqda, oʻrim-yigʻimchilarning nolalari esa osmon qoʻshinlarining Otasi qulogʻiga yetib bordi. Siz yer yuzida hashamat va ayshu ishratda yashadingiz. Boʻgʻizlanadigan kunda yuraklaringizni semirtirdingiz. Sizlarga qarshilik qilmaydigan solih insonni mahkum etib, oʻldirdingiz.

Sabrli qalb bilan kutinglar

Shunday ekan, birodarlar, Rabbimiz kelgunicha sabr qilinglar. Dehqonni oʻylab koʻringlar: u tuproqning qimmatli mevasini, ilk va keyingi yomgʻirlar yoqqunicha sabr bilan kutadi. Sizlar ham sabr qilinglar. Yuraklaringizni mustahkamlanglar, chunki Rabbimizning kelishi yaqindir. Bir-biringizdan norozi boʻlib shikoyat qilmanglar, birodarlar, aks holda hukm qilinasizlar. Mana, Hakam eshiklar oldida turibdi. Birodarlar, Otamizning nomidan soʻzlagan paygʻambarlarni azob-uqubat va sabr-toqat namunasi deb bilinglar. Mana, biz sabr-matonat koʻrsatganlarni baxtli deymiz. Ayubning sabr-matonati haqida eshitgansizlar va Otamiz nima qilganini koʻrgansizlar — Otamiz rahm va marhamatga boydir.

Eng muhimi, birodarlarim, qasam ichmanglar — na osmon bilan, na yer bilan, na boshqa biror qasam bilan. “Ha”ngiz ha boʻlsin, “yoʻq”ingiz yoʻq boʻlsin, toki hukm ostiga tushmanglar.

Imon bilan qilingan ibodat shifo beradi

Oranggizda azob chekayotgan birov bormi? U ibodat qilsin. Birov xursandmi? U hamdu sano kuylasin. Oranggizda kasal odam bormi? U jamoat oqsoqollarini chaqirtirsin, oqsoqollar esa Rabbimizning nomidan uni moy bilan moylab, uning uchun ibodat qilsinlar. Imon bilan qilingan ibodat kasalni qutqaradi, Rabbimiz uni oyoqqa turgʻizadi. Agar u gunoh qilgan boʻlsa, gunohi kechiriladi. Shunday ekan, gunohlaringizni bir-biringizga iqror qilinglar va bir-biringiz uchun ibodat qilinglar, toki shifo topasizlar. Solih insonning ibodati qudratli va taʼsirlidir. Ilyos ham biz kabi oddiy inson edi. U yomgʻir yogʻmasligi uchun jon-dildan ibodat qildi; uch yilu olti oy yer yuziga yomgʻir yogʻmadi. Soʻngra u yana ibodat qildi, osmon yomgʻir berdi va yer oʻz mevasini hosil qildi.

Birodarlarim, oranggizda biror kishi haqiqatdan adashsa-yu, kimdir uni qaytarib olsa, shuni bilib qoʻyinglarki, gunohkorni adashgan yoʻlidan qaytargan kishi oʻsha insonning jonini oʻlimdan qutqaradi va koʻplab gunohlarni yopadi.