Avāna Rekkharek Kahaiabingwui Khavao Thei
Lui vākhamebingli makhami ngalangmanna chapta, Reikhamatai Avāwui khanāli shunghaira; sāman khuiyakhuikahai kashāngabingli chaplu da hānga. Kateibingli lui khavā mi thāda khāngtheida ngaraiyalu, kakhanang tharan seihā sālu, akha eina akha morei hangphat ngaroklu, kala zatphāphā kahaia mili phāranu da hānga.
5 1Ara rālu, nathum kashāngabing, nathumwuitungli rāki kaji kachotkachāng chiwui vang sifalaga chapngachālu. 2Nathumwui kashāng shimānhaira, kala nathumwui kashankachon makungna shaikahai ngasāhaira. 3Nathumwui sinā kala lupā akaina zanghaira; chiwui akaina nathumwui yangkashe shākhi sāra, kala nathumwui phasā mei thāda riktāra. Ngachangnanai zimiksholi nathumna lan kaziphaira. 4Yanglu, nathumwui luili kahātabingli nathumna ngasām kahai ngalang chi vaowa, kala kahātabingwui khavao kazingram raimibingwui Avāwui khanāli samphanghaira. 5Nathumna okathuili kāshunglak eina kala ringphā khavai eina okpeimeira. Taithat zimiksholi nathumwui ning shimenkhuihaira. 6Nathumna khamashunga mi chili yon ngasakda shaothathaira, ana nathumli mangasungmana.
Khāngda Sāda Ngarailu
7Chiwui vang eina, ivānaobing, Proho rāki eina tangda khāngda sālu. Luikhavā mi chi phaninglu: ana khari-khanao zingrot chi samphang eina tangda ngalei chiwui aman kasak athei chi khāngda ngaraipama. 8Nathumla khāngda sālu. Nathumwui malung pingngasaklu, kaja Proho rāki kaji nganailakhaira. 9Akha eina akhali maphenphāphaalu, ivānaobing, chithākha nathumli bichar masāmara. Yanglu,bichar kasā chi khāmongli nganinga. 10Ivānaobing, ithumwui Avāwui ming eina hāngkahai marānbing chili kachotkachāng kala khāngkatheiwui acham sāda phaninglu. 11Yanglu, khāngmihaibing chili ithumna sokhami da ho. Nathumna Jobwui khāngkathei shāhaira, kala ithumwui Avāna sākahai chi theihaira, kaja ithumwui Avā lukhamashan pemting kala phaningkhami pemtinghailaka.
12Matailak eina, ivānaongarā, kazingram einala, ngalei einala, khangatei khangashit einala ngashit masaalu. Nathumwui 'mha' hi 'mha' ngasāranu, kala 'mangai' hi 'mangai' ngasāranu, chithākha nathumli bichar masāmara.
Shitkasang Seihāna Raimi
13Nathumwui ngachaili kachotkachāng samphang a akha leila? A china seihā sāranu. Kaikhava khamathān ngasāla? A china masotlaa sāranu. 14Nathumwui ngachaili kakazā akha leila? A china churchwui khararnaobing chi hokhuiranu, kala khararnaobingna Prohowui ming eina thaona ali neoda awuitungli seihā sāranu. 15Shitkasang seihāna kakazā a chili huimira, kala Prohona ali ngakarthui ngasakra. Kala ana morei sākahai leiakha, awui morei pheomira. 16Chiwui vang eina akha eina akhali nathumwui morei hāngphatlu, kala akha eina akhawui vang seihā sālu, chithākha nathum raimira. Khamashunga miwui seihā pangshap leilaka kala khamathā ot sapai. 17Elijahna ithum thāda mi akhana, kala kazing maro khavai da ana panglāk eina seihā sai; ngalei chili zingkum kathum kala kachāng tharuk kazing marohaira. 18Chieina ana seihā sāluishita, kala kazingramna zingrot rotai, kala ngaleina awui athei matheihaira.
19Ivānaongarā, nathumwui ngachaili kachikathā mi akhana khamashungwui eina pākthuihaiakha, kala kachikathāna ali thanungmiakha, 20hi theilu: morei kaphunga akhali awui makaphā shongfawui eina latungngasaka a china, mipa chiwui manglā kathiwui eina huimira, kala morei kachungkha fakhamra.
