ਯਾਕੂਬ 5

5 ¹ਹੁਣ ਸੁਣੋ, ਹੇ ਧਨਵਾਨੋ, ਉਨ੍ਹਾਂ ਬਿਪਤਾਵਾਂ ਉੱਤੇ ਰੋਵੋ ਅਤੇ ਵਿਰਲਾਪ ਕਰੋ ਜੋ ਤੁਹਾਡੇ ਉੱਤੇ ਆਉਣ ਵਾਲੀਆਂ ਹਨ। ²ਤੁਹਾਡਾ ਧਨ ਸੜ ਗਿਆ ਹੈ, ਅਤੇ ਤੁਹਾਡੇ ਕੱਪੜਿਆਂ ਨੂੰ ਕੀੜੇ ਖਾ ਗਏ ਹਨ। ³ਤੁਹਾਡਾ ਸੋਨਾ ਅਤੇ ਚਾਂਦੀ ਜੰਗਾਲ ਖਾ ਗਿਆ ਹੈ; ਉਨ੍ਹਾਂ ਦਾ ਜੰਗਾਲ ਤੁਹਾਡੇ ਵਿਰੁੱਧ ਗਵਾਹੀ ਦੇਵੇਗਾ ਅਤੇ ਅੱਗ ਵਾਂਗ ਤੁਹਾਡੇ ਮਾਸ ਨੂੰ ਸਾੜੇਗਾ। ਤੁਸੀਂ ਅੰਤ ਦੇ ਦਿਨਾਂ ਵਿੱਚ ਧਨ ਦੇ ਢੇਰ ਲਾਏ ਹਨ। ⁴ਵੇਖੋ: ਜਿਹੜੀ ਮਜ਼ਦੂਰੀ ਤੁਸੀਂ ਉਨ੍ਹਾਂ ਕਾਮਿਆਂ ਤੋਂ ਰੋਕ ਰੱਖੀ ਜਿਨ੍ਹਾਂ ਨੇ ਤੁਹਾਡੇ ਖੇਤ ਵੱਢੇ, ਉਹ ਦੁਹਾਈ ਦਿੰਦੀ ਹੈ, ਅਤੇ ਵਾਢੀ ਕਰਨ ਵਾਲਿਆਂ ਦੀਆਂ ਦੁਹਾਈਆਂ ਸੁਰਗੀ ਸੈਨਾਂ ਦੇ ਪਿਤਾ ਦੇ ਕੰਨਾਂ ਤੱਕ ਪਹੁੰਚ ਗਈਆਂ ਹਨ। ⁵ਤੁਸੀਂ ਧਰਤੀ ਉੱਤੇ ਭੋਗ-ਬਿਲਾਸ ਅਤੇ ਐਸ਼ੋ-ਆਰਾਮ ਵਿੱਚ ਜੀਵਨ ਬਤੀਤ ਕੀਤਾ। ਤੁਸੀਂ ਵੱਢ ਦੇ ਦਿਨ ਲਈ ਆਪਣੇ ਦਿਲ ਮੋਟੇ ਕੀਤੇ। ⁶ਤੁਸੀਂ ਧਰਮੀ ਨੂੰ ਦੋਸ਼ੀ ਠਹਿਰਾਇਆ ਅਤੇ ਉਸ ਦਾ ਖ਼ੂਨ ਕੀਤਾ, ਜੋ ਤੁਹਾਡਾ ਸਾਹਮਣਾ ਨਹੀਂ ਕਰਦਾ।

ਧੀਰਜਵਾਨ ਦਿਲਾਂ ਨਾਲ ਉਡੀਕ ਕਰੋ

⁷ਇਸ ਲਈ, ਹੇ ਭਰਾਵੋ ਅਤੇ ਭੈਣੋ, ਪ੍ਰਭੂ ਦੇ ਆਉਣ ਤੱਕ ਧੀਰਜ ਰੱਖੋ। ਕਿਸਾਨ ਵੱਲ ਧਿਆਨ ਕਰੋ: ਉਹ ਧਰਤੀ ਦੇ ਬਹੁਮੁੱਲੇ ਫਲ ਲਈ ਧੀਰਜ ਨਾਲ ਉਡੀਕ ਕਰਦਾ ਹੈ, ਜਦ ਤੱਕ ਉਸ ਨੂੰ ਪਹਿਲਾ ਅਤੇ ਪਿਛਲਾ ਮੀਂਹ ਨਾ ਮਿਲ ਜਾਵੇ। ⁸ਤੁਸੀਂ ਵੀ ਧੀਰਜ ਰੱਖੋ। ਆਪਣੇ ਦਿਲ ਦ੍ਰਿੜ੍ਹ ਕਰੋ, ਕਿਉਂਕਿ ਪ੍ਰਭੂ ਦਾ ਆਉਣਾ ਨੇੜੇ ਹੈ। ⁹ਹੇ ਭਰਾਵੋ ਅਤੇ ਭੈਣੋ, ਇੱਕ ਦੂਜੇ ਵਿਰੁੱਧ ਬੁੜਬੁੜ ਨਾ ਕਰੋ, ਨਹੀਂ ਤਾਂ ਤੁਹਾਡਾ ਨਿਆਂ ਕੀਤਾ ਜਾਵੇਗਾ। ਵੇਖੋ—ਨਿਆਂਕਾਰ ਦਰਵਾਜ਼ਿਆਂ ਉੱਤੇ ਖੜ੍ਹਾ ਹੈ। ¹⁰ਹੇ ਭਰਾਵੋ ਅਤੇ ਭੈਣੋ, ਉਨ੍ਹਾਂ ਨਬੀਆਂ ਨੂੰ ਦੁੱਖ ਸਹਿਣ ਅਤੇ ਧੀਰਜ ਦੇ ਨਮੂਨੇ ਵਜੋਂ ਲਓ ਜਿਨ੍ਹਾਂ ਨੇ ਸਾਡੇ ਪਿਤਾ ਦੇ ਨਾਮ ਵਿੱਚ ਬਚਨ ਕੀਤਾ। ¹¹ਵੇਖੋ, ਜਿਨ੍ਹਾਂ ਨੇ ਸਹਿਣ ਕੀਤਾ ਉਨ੍ਹਾਂ ਨੂੰ ਅਸੀਂ ਧੰਨ ਆਖਦੇ ਹਾਂ। ਤੁਸੀਂ ਅੱਯੂਬ ਦੇ ਸਹਿਣ ਬਾਰੇ ਸੁਣਿਆ ਹੈ ਅਤੇ ਵੇਖਿਆ ਹੈ ਕਿ ਸਾਡੇ ਪਿਤਾ ਨੇ ਕੀ ਕੁਝ ਕੀਤਾ—ਸਾਡਾ ਪਿਤਾ ਤਰਸ ਅਤੇ ਦਯਾ ਵਿੱਚ ਧਨੀ ਹੈ।

¹²ਹੇ ਮੇਰੇ ਭਰਾਵੋ ਅਤੇ ਭੈਣੋ, ਸਭ ਤੋਂ ਵੱਧ ਇਹ ਹੈ ਕਿ ਸਹੁੰ ਨਾ ਖਾਓ—ਨਾ ਸੁਰਗ ਦੀ, ਨਾ ਧਰਤੀ ਦੀ, ਨਾ ਕਿਸੇ ਹੋਰ ਸਹੁੰ ਦੀ। ਤੁਹਾਡਾ ਹਾਂ ਹਾਂ ਹੋਵੇ ਅਤੇ ਤੁਹਾਡਾ ਨਾਂਹ ਨਾਂਹ, ਤਾਂ ਜੋ ਤੁਸੀਂ ਨਿਆਂ ਦੇ ਹੇਠ ਨਾ ਆਓ।

ਵਿਸ਼ਵਾਸ ਦੀ ਪ੍ਰਾਰਥਨਾ ਚੰਗਾ ਕਰਦੀ ਹੈ

¹³ਕੀ ਤੁਹਾਡੇ ਵਿੱਚੋਂ ਕੋਈ ਦੁੱਖ ਵਿੱਚ ਹੈ? ਉਹ ਪ੍ਰਾਰਥਨਾ ਕਰੇ। ਕੀ ਕੋਈ ਖ਼ੁਸ਼ ਹੈ? ਉਹ ਭਜਨ ਗਾਵੇ। ¹⁴ਕੀ ਤੁਹਾਡੇ ਵਿੱਚ ਕੋਈ ਬਿਮਾਰ ਹੈ? ਉਹ ਕਲੀਸਿਯਾ ਦੇ ਬਜ਼ੁਰਗਾਂ ਨੂੰ ਬੁਲਾਵੇ, ਅਤੇ ਬਜ਼ੁਰਗ ਪ੍ਰਭੂ ਦੇ ਨਾਮ ਵਿੱਚ ਉਸ ਨੂੰ ਤੇਲ ਮਲ ਕੇ ਉਸ ਲਈ ਪ੍ਰਾਰਥਨਾ ਕਰਨ। ¹⁵ਅਤੇ ਵਿਸ਼ਵਾਸ ਦੀ ਪ੍ਰਾਰਥਨਾ ਬਿਮਾਰ ਨੂੰ ਬਚਾਵੇਗੀ, ਅਤੇ ਪ੍ਰਭੂ ਉਸ ਨੂੰ ਉਠਾਵੇਗਾ। ਅਤੇ ਜੇ ਉਸ ਨੇ ਪਾਪ ਕੀਤੇ ਹੋਣ, ਤਾਂ ਉਹ ਮਾਫ਼ ਕੀਤੇ ਜਾਣਗੇ। ¹⁶ਇਸ ਲਈ ਇੱਕ ਦੂਜੇ ਅੱਗੇ ਆਪਣੇ ਪਾਪ ਮੰਨ ਲਓ ਅਤੇ ਇੱਕ ਦੂਜੇ ਲਈ ਪ੍ਰਾਰਥਨਾ ਕਰੋ, ਤਾਂ ਜੋ ਤੁਸੀਂ ਚੰਗੇ ਹੋ ਜਾਓ। ਧਰਮੀ ਦੀ ਪ੍ਰਾਰਥਨਾ ਬਲਵਾਨ ਅਤੇ ਬਹੁਤ ਅਸਰ ਕਰਨ ਵਾਲੀ ਹੈ। ¹⁷ਏਲੀਯਾਹ ਸਾਡੇ ਵਰਗਾ ਮਨੁੱਖ ਸੀ, ਅਤੇ ਉਸ ਨੇ ਬੜੀ ਬੇਨਤੀ ਨਾਲ ਪ੍ਰਾਰਥਨਾ ਕੀਤੀ ਕਿ ਮੀਂਹ ਨਾ ਪਵੇ; ਅਤੇ ਸਾਢੇ ਤਿੰਨ ਸਾਲ ਤੱਕ ਧਰਤੀ ਉੱਤੇ ਮੀਂਹ ਨਾ ਪਿਆ। ¹⁸ਫਿਰ ਉਸ ਨੇ ਦੁਬਾਰਾ ਪ੍ਰਾਰਥਨਾ ਕੀਤੀ, ਅਤੇ ਅਕਾਸ਼ ਨੇ ਮੀਂਹ ਦਿੱਤਾ, ਅਤੇ ਧਰਤੀ ਨੇ ਆਪਣਾ ਫਲ ਉਗਾਇਆ।

¹⁹ਹੇ ਮੇਰੇ ਭਰਾਵੋ ਅਤੇ ਭੈਣੋ, ਜੇ ਤੁਹਾਡੇ ਵਿੱਚੋਂ ਕੋਈ ਸਚਿਆਈ ਤੋਂ ਭਟਕ ਜਾਵੇ ਅਤੇ ਕੋਈ ਉਸ ਨੂੰ ਮੋੜ ਲਿਆਵੇ, ²⁰ਤਾਂ ਇਹ ਜਾਣ ਲਵੋ: ਜਿਹੜਾ ਕਿਸੇ ਪਾਪੀ ਨੂੰ ਉਸ ਦੇ ਭੈੜੇ ਰਾਹ ਤੋਂ ਮੋੜ ਲਿਆਉਂਦਾ ਹੈ, ਉਹ ਉਸ ਜਣੇ ਦੀ ਜਾਨ ਨੂੰ ਮੌਤ ਤੋਂ ਬਚਾਉਂਦਾ ਹੈ ਅਤੇ ਬਹੁਤ ਸਾਰੇ ਪਾਪਾਂ ਨੂੰ ਢੱਕ ਦਿੰਦਾ ਹੈ।