Papa a Wè Rèl Moun y'ap Peze yo

Salè yo kenbe pou travayè ki fè rekòt yo ap rele, epi rive nan zòrèy Papa lame syèl yo; yo di moun rich ki te sere byen yo pou yo kriye. Tout lòt moun, yo di yo tann tankou yon kiltivatè, priye lè y ap soufri, konfese youn bay lòt, epi al chèche moun ki pèdi wout la.

Chapit 5.

Koulye a, nou menm ki rich, kriye, plenyen pou malè ki pral tonbe sou nou. Richès nou yo pouri, e se mit ki manje rad nou yo. Lò nou ak lajan nou wouye; wouy yo a va temwaye kont nou, l'a boule chè nou tankou dife. Nou anpile richès nan dènye jou yo. Gade: lajan nou pa t peye travayè ki te koupe jaden nou yo ap rele, e rèl moun ki te ranmase rekòt la rive nan zòrèy Papa lame syèl la. Nou te viv sou latè nan abondans ak plezi. Nou angrese kè nou pou jou masak la. Nou kondane, nou touye moun ki jis la, li menm ki pa kenbe tèt ak nou.

Tann ak Kè Pasyan

Se poutèt sa, frè m ak sè m yo, pran pasyans jouk Senyè a vini. Kalkile sou kiltivatè a: l'ap tann ak pasyans bon rekòt tè a va bay, jouk li resevwa premye lapli a ak dènye lapli a. Nou menm tou, se pou nou pran pasyans. Bay kè nou fòs, paske Senyè a prèt pou vini. Pa plenyen yonn kont lòt, frè m ak sè m yo, pou yo pa jije nou. Gade—Jij la kanpe devan pòt yo. Frè m ak sè m yo, pran pwofèt ki te pale nan non Papa nou yo tankou egzanp soufrans ak pasyans. Gade, nou di moun ki te kenbe fèm yo beni. Nou te tande jan Jòb te kenbe fèm, nou te wè sa Papa nou te fè—Papa nou plen pitye ak mizèrikòd.

Anvan tout bagay, frè m ak sè m yo, pa fè sèman—ni sou syèl la, ni sou latè, ni sou okenn lòt bagay. Se pou wi nou se wi, non nou se non, pou nou pa tonbe anba jijman.

Lapriyè Lafwa a Geri Moun

Èske gen yon moun nan mitan nou k'ap soufri? Se pou l priye. Èske gen yon moun ki gen kè kontan? Se pou l chante lwanj. Èske gen yon moun malad nan mitan nou? Se pou l rele chèf legliz yo, epi se pou chèf yo priye pou li, pandan y'ap vide lwil sou li nan non Senyè a. Lapriyè lafwa a va sove moun malad la, e Senyè a va fè l leve. E si li te fè peche, y'a padonnen l. Se poutèt sa, konfese peche nou yonn bay lòt, epi priye yonn pou lòt, pou nou ka geri. Lapriyè yon moun ki jis gen anpil fòs e li bay rezilta. Eli te yon moun tankou nou, li te priye avèk tout kè l pou lapli pa tonbe; lapli pa t tonbe sou peyi a pandan twazan sis mwa. Apre sa, li priye ankò, syèl la bay lapli, e latè bay rekòt li.

Frè m ak sè m yo, si gen yon moun nan mitan nou ki egare kite verite a, epi yon lòt moun fè l tounen, konnen sa: nenpòt moun ki fè yon pechè kite move chemen l lan, l'ap sove nanm moun sa a anba lanmò, e l'ap kouvri yon pakèt peche.