ያዕቆብ 5

5 ¹እናንተ ባለጠጎች ሆይ፣ አሁን ኑ፤ በሚመጣባችሁ መከራ ምክንያት ዐልቅሱ፤ ዋይ ዋይ በሉ። ²ሀብታችሁ በስብሷል፤ ልብሳችሁንም ብል በልቶታል። ³ወርቃችሁና ብራችሁ ዝጎባቸዋል፤ ዝገታቸውም በእናንተ ላይ ይመሰክራል፤ ሥጋችሁንም እንደ እሳት ያቃጥላል። በመጨረሻው ዘመን ሀብት አከማችታችኋል። ⁴እነሆ፣ ዕርሻችሁን ላጨዱ ሠራተኞች ያልከፈላችሁት ዋጋ ይጮኻል፤ የአጫጆችም ጩኸት የሰማይ ሠራዊት አባት ጆሮ ደርሷል። ⁵በምድር ላይ በቅንጦትና በፈንጠዝያ ኖራችሁ፤ ለእርድ ቀን ልባችሁን አወፈራችሁ። ⁶የማይቃወማችሁን ጻድቅ ኰነናችሁት፤ ገደላችሁትም።

በትዕግሥተኛ ልብ ጠብቁ

⁷እንግዲህ ወንድሞችና እኅቶች ሆይ፣ ጌታ እስኪመጣ ድረስ ታገሡ። ገበሬውን ተመልከቱ፤ የፊተኛውንና የኋለኛውን ዝናብ እስኪያገኝ ድረስ፣ የምድርን ክቡር ፍሬ በትዕግሥት ይጠብቃል። ⁸እናንተም ደግሞ ታገሡ፤ የጌታ መምጣት ቀርቧልና ልባችሁን አጽኑ። ⁹ወንድሞችና እኅቶች ሆይ፣ እንዳይፈረድባችሁ እርስ በርሳችሁ አታጉረምርሙ። እነሆ፣ ፈራጁ በደጆች ፊት ቆሟል። ¹⁰ወንድሞችና እኅቶች ሆይ፣ በአባታችን ስም የተናገሩትን ነቢያት የመከራና የትዕግሥት ምሳሌ አድርጋችሁ ውሰዱ። ¹¹እነሆ፣ የጸኑትን ብፁዓን እንላቸዋለን። የኢዮብን መጽናት ሰምታችኋል፤ አባታችንም ያደረገውን አይታችኋል፤ አባታችን በርኅራኄና በምሕረት የበለጸገ ነውና።

¹²ወንድሞቼና እኅቶቼ ሆይ፣ ከሁሉ በፊት አትማሉ፤ በሰማይም ቢሆን፣ በምድርም ቢሆን፣ በሌላ በማንኛውም መሐላ አትማሉ። ፍርድ እንዳይደርስባችሁ፣ አዎ ያላችሁት አዎ፣ አይደለም ያላችሁት አይደለም ይሁን።

የእምነት ጸሎት ይፈውሳል

¹³ከእናንተ መካከል መከራ የሚቀበል ሰው አለ? ይጸልይ። ደስ የሚለው ሰው አለ? የምስጋና መዝሙር ይዘምር። ¹⁴ከእናንተ መካከል የታመመ ሰው አለ? የቤተ ክርስቲያንን ሽማግሌዎች ይጥራ፤ እነርሱም በጌታ ስም ዘይት እየቀቡት ይጸልዩለት። ¹⁵የእምነት ጸሎት የታመመውን ያድነዋል፤ ጌታም ያስነሣዋል። ኀጢአትም ሠርቶ እንደ ሆነ ይቅር ይባልለታል። ¹⁶እንግዲህ ትፈወሱ ዘንድ፣ ኀጢአታችሁን እርስ በርሳችሁ ተናዘዙ፤ እርስ በርሳችሁም ጸልዩ። የጻድቅ ሰው ጸሎት በሥራ ላይ ሲውል እጅግ ኀይለኛ ነው። ¹⁷ኤልያስ እንደ እኛ ሰው ነበር፤ ዝናብ እንዳይዘንብም አጥብቆ ጸለየ፤ በምድርም ላይ ሦስት ዓመት ከስድስት ወር አልዘነበም። ¹⁸ዳግመኛም ጸለየ፤ ሰማይም ዝናብ ሰጠ፤ ምድርም ፍሬዋን አፈራች።

¹⁹ወንድሞቼና እኅቶቼ ሆይ፣ ከእናንተ መካከል ማንም ከእውነት ቢስት፣ አንዱም ቢመልሰው፣ ²⁰ይህን ዕወቁ፤ ኀጢአተኛን ከተሳሳተ መንገዱ የሚመልስ ሁሉ ነፍሱን ከሞት ያድናል፤ የብዙ ኀጢአትንም ይሸፍናል።