Santiago 5

5 ¹Dali na, kamong mga dato, panghilak ug pagminatay tungod sa mga kaalaotan nga moabot kaninyo. ²Nangadunot na ang inyong mga bahandi, ug ang inyong mga bisti gikutkot sa mga anay. ³Nataya na ang inyong bulawan ug plata; ang ilang taya magasaksi batok kaninyo ug mosunog sa inyong unod sama sa kalayo. Nagtapok kamog mga bahandi sa kataposang mga adlaw. ⁴Tan-awa: ang suhol nga inyong gipugngan gikan sa mga mamumuo nga nangalab sa inyong kaumahan nagatuaw, ug ang mga pagtuaw sa mga mangangani nakaabot sa mga dalunggan sa Amahan sa mga kasundalohan sa langit. ⁵Nagpuyo kamo sa yuta diha sa kaharuhay ug pagpatuyang. Gipatambok ninyo ang inyong mga kasingkasing sa adlaw sa ihawan. ⁶Gihukman ug gipatay ninyo ang matarong, nga wala mosukol kaninyo.

Paghulat uban sa Mapailubon nga mga Kasingkasing

⁷Busa pagmapailubon kamo, mga igsoon, hangtod sa pag-abot sa Ginoo. Hunahunaa ang mag-uuma: mapailubon siyang naghulat sa bililhong bunga sa yuta, hangtod kini makadawat sa sayo ug ulahing mga ulan. ⁸Kamo usab kinahanglang magmapailubon. Lig-ona ninyo ang inyong mga kasingkasing, kay ang pag-abot sa Ginoo haduol na. ⁹Ayaw kamo pagbagulbol batok sa usag usa, mga igsoon, aron dili kamo hukman. Tan-awa—ang Maghuhukom nagtindog na sa mga pultahan. ¹⁰Mga igsoon, isipa nga mga panig-ingnan sa pag-antos ug pagkamapailubon ang mga propeta nga misulti sa ngalan sa atong Amahan. ¹¹Tan-awa, gitawag natong bulahan kadtong nakalahutay. Nadungog ninyo ang pagkamalahutayon ni Job ug nakita ninyo kon unsa ang gibuhat sa atong Amahan—ang atong Amahan dato sa kaluoy ug pagkamaloloy-on.

¹²Labaw sa tanan, mga igsoon ko, ayaw kamo panumpa—dili pinaagi sa langit, ni sa yuta, ni sa bisan unsang panumpa. Himoa nga ang inyong oo mahimong oo ug ang inyong dili, dili, aron dili kamo mahulog sa paghukom.

Ang Pag-ampo sa Pagtuo Makaayo

¹³Aduna bay nag-antos kaninyo? Pag-ampo siya. Aduna bay malipayon? Pag-awit siya ug mga pagdayeg. ¹⁴Aduna bay masakiton kaninyo? Patawga niya ang mga ansiyano sa iglesya, ug paampoa kaniya ang mga ansiyano, nga dihogan siya ug lana sa ngalan sa Ginoo. ¹⁵Ang pag-ampo sa pagtuo magaluwas sa masakiton, ug bangonon siya sa Ginoo. Ug kon siya nakasala, pasayloon siya. ¹⁶Busa isugid ninyo ang inyong mga sala sa usag usa ug pag-ampo kamo alang sa usag usa, aron kamo mamaayo. Ang pag-ampo sa matarong gamhanan ug mabungahon. ¹⁷Si Elias tawo nga sama kanato, ug nag-ampo siya pag-ayo nga dili mag-ulan; ug wala mag-ulan sa yuta sulod sa tulo ka tuig ug unom ka bulan. ¹⁸Unya nag-ampo siya pag-usab, ug ang kalangitan mihatag ug ulan, ug ang yuta namunga.

¹⁹Mga igsoon ko, kon adunay kaninyo mahisalaag gikan sa kamatuoran ug adunay mopabalik kaniya, ²⁰hibaloi kini: si bisan kinsa nga magpabalik sa usa ka makasasala gikan sa iyang sayop nga dalan magaluwas sa kalag niadtong tawo gikan sa kamatayon ug magatabon sa daghang mga sala.