ଯାକୁବ 5 FHB Father's Heart Bible™

5 ¹ହେ ଧନୀ ଲୋକମାନେ, ଏବେ ଆସ, ତୁମ୍ଭମାନଙ୍କ ଉପରକୁ ଆସୁଥିବା ଦୁର୍ଦ୍ଦଶା ହେତୁ ରୋଦନ ଓ ବିଳାପ କର। ²ତୁମ୍ଭମାନଙ୍କ ଧନ କ୍ଷୟ ପାଇଅଛି, ଆଉ ତୁମ୍ଭମାନଙ୍କ ବସ୍ତ୍ର କୀଟଭୁକ୍ତ ହୋଇଅଛି। ³ତୁମ୍ଭମାନଙ୍କ ସୁନା ଓ ରୂପା କଳଙ୍କିତ ହୋଇଅଛି; ସେହି କଳଙ୍କ ତୁମ୍ଭମାନଙ୍କ ବିରୁଦ୍ଧରେ ସାକ୍ଷ୍ୟ ଦେବ ଓ ଅଗ୍ନି ପରି ତୁମ୍ଭମାନଙ୍କ ମାଂସ ଦଗ୍ଧ କରିବ। ତୁମ୍ଭେମାନେ ଶେଷକାଳରେ ଧନ ସଞ୍ଚୟ କରିଅଛ। ⁴ଦେଖ: ଯେଉଁ ଶ୍ରମିକମାନେ ତୁମ୍ଭମାନଙ୍କ କ୍ଷେତ କାଟିଲେ, ସେମାନଙ୍କଠାରୁ ତୁମ୍ଭେମାନେ ଯେଉଁ ମଜୁରି ଅଟକାଇ ରଖିଲ, ତାହା କ୍ରନ୍ଦନ କରୁଅଛି, ଆଉ ଶସ୍ୟଛେଦକମାନଙ୍କ କ୍ରନ୍ଦନ ସ୍ଵର୍ଗୀୟ ବାହିନୀସମୂହର ପିତାଙ୍କ କର୍ଣ୍ଣରେ ପହଞ୍ଚିଅଛି। ⁵ତୁମ୍ଭେମାନେ ପୃଥିବୀରେ ବିଳାସ ଓ ସୁଖଭୋଗରେ ଜୀବନ ଅତିବାହିତ କଲ। ବଧ ଦିନରେ ତୁମ୍ଭେମାନେ ଆପଣା ଆପଣା ହୃଦୟ ହୃଷ୍ଟପୁଷ୍ଟ କଲ। ⁶ଯେ ତୁମ୍ଭମାନଙ୍କୁ ପ୍ରତିରୋଧ କରନ୍ତି ନାହିଁ, ସେହି ଧାର୍ମିକ ବ୍ୟକ୍ତିଙ୍କୁ ତୁମ୍ଭେମାନେ ଦୋଷୀ କରି ବଧ କରିଅଛ।

ଧୈର୍ଯ୍ୟଶୀଳ ହୃଦୟରେ ଅପେକ୍ଷା କର

⁷ଅତଏବ ହେ ଭାଇ ଓ ଭଉଣୀମାନେ, ପ୍ରଭୁଙ୍କ ଆଗମନ ପର୍ଯ୍ୟନ୍ତ ଧୈର୍ଯ୍ୟ ଧର। କୃଷକ କଥା ଭାବ: ଭୂମି ଯେପର୍ଯ୍ୟନ୍ତ ଆଦ୍ୟ ଓ ଶେଷ ବୃଷ୍ଟି ନ ପାଏ, ସେ ତାହାର ବହୁମୂଲ୍ୟ ଫଳ ନିମନ୍ତେ ଧୈର୍ଯ୍ୟ ସହକାରେ ଅପେକ୍ଷା କରେ। ⁸ତୁମ୍ଭେମାନେ ମଧ୍ୟ ଧୈର୍ଯ୍ୟ ଧର। ଆପଣା ଆପଣା ହୃଦୟ ଦୃଢ଼ କର, କାରଣ ପ୍ରଭୁଙ୍କ ଆଗମନ ସନ୍ନିକଟ। ⁹ହେ ଭାଇ ଓ ଭଉଣୀମାନେ, ପରସ୍ପର ବିରୁଦ୍ଧରେ ବଚସା କର ନାହିଁ, ନ ହେଲେ ତୁମ୍ଭେମାନେ ବିଚାରିତ ହେବ। ଦେଖ—ବିଚାରକର୍ତ୍ତା ଦ୍ଵାର ନିକଟରେ ଠିଆ ହୋଇଅଛନ୍ତି। ¹⁰ହେ ଭାଇ ଓ ଭଉଣୀମାନେ, ଯେଉଁ ଭାବବାଦୀମାନେ ଆମ୍ଭମାନଙ୍କ ପିତାଙ୍କ ନାମରେ କଥା କହିଲେ, ସେମାନଙ୍କୁ ଦୁଃଖଭୋଗ ଓ ଧୈର୍ଯ୍ୟର ଆଦର୍ଶ ବୋଲି ଗ୍ରହଣ କର। ¹¹ଦେଖ, ଯେଉଁମାନେ ଧୈର୍ଯ୍ୟ ଧରି ସହ୍ୟ କଲେ, ସେମାନଙ୍କୁ ଆମ୍ଭେମାନେ ଧନ୍ୟ ବୋଲି କହୁ। ଆୟୁବଙ୍କ ସହିଷ୍ଣୁତା ବିଷୟ ତୁମ୍ଭେମାନେ ଶୁଣିଅଛ ଓ ଆମ୍ଭମାନଙ୍କ ପିତା ଯାହା ସାଧନ କଲେ, ତାହା ଦେଖିଅଛ—ଆମ୍ଭମାନଙ୍କ ପିତା କୃପା ଓ ଦୟାରେ ପରିପୂର୍ଣ୍ଣ।

¹²ହେ ମୋହର ଭାଇ ଓ ଭଉଣୀମାନେ, ସର୍ବୋପରି, ଶପଥ କର ନାହିଁ—ସ୍ଵର୍ଗର କି ପୃଥିବୀର କି ଆଉ କୌଣସି ଶପଥ କର ନାହିଁ। ତୁମ୍ଭମାନଙ୍କ ହଁ ହଁ ହେଉ ଓ ନା ନା ହେଉ, ନ ହେଲେ ତୁମ୍ଭେମାନେ ବିଚାରରେ ପଡ଼ିବ।

ବିଶ୍ଵାସର ପ୍ରାର୍ଥନା ସୁସ୍ଥ କରେ

¹³ତୁମ୍ଭମାନଙ୍କ ମଧ୍ୟରେ କେହି କି ଦୁଃଖଭୋଗ କରୁଅଛି? ସେ ପ୍ରାର୍ଥନା କରୁ। କେହି କି ଆନନ୍ଦିତ ଅଛି? ସେ ପ୍ରଶଂସାଗାନ କରୁ। ¹⁴ତୁମ୍ଭମାନଙ୍କ ମଧ୍ୟରେ କେହି କି ପୀଡ଼ିତ ଅଛି? ସେ ମଣ୍ଡଳୀର ପ୍ରାଚୀନମାନଙ୍କୁ ଡାକୁ, ଆଉ ପ୍ରାଚୀନମାନେ ପ୍ରଭୁଙ୍କ ନାମରେ ତାହାକୁ ତୈଳ ଲଗାଇ ତାହା ନିମନ୍ତେ ପ୍ରାର୍ଥନା କରନ୍ତୁ। ¹⁵ବିଶ୍ଵାସର ପ୍ରାର୍ଥନା ସେହି ପୀଡ଼ିତ ବ୍ୟକ୍ତିକୁ ରକ୍ଷା କରିବ, ଆଉ ପ୍ରଭୁ ତାହାକୁ ଉଠାଇବେ। ଆଉ ଯଦି ସେ ପାପ କରିଥାଏ, ତେବେ ତାହାକୁ କ୍ଷମା କରାଯିବ। ¹⁶ଅତଏବ ତୁମ୍ଭେମାନେ ଯେପରି ସୁସ୍ଥ ହୁଅ, ଏଥିପାଇଁ ପରସ୍ପର ନିକଟରେ ଆପଣା ଆପଣା ପାପ ସ୍ଵୀକାର କର ଓ ପରସ୍ପର ନିମନ୍ତେ ପ୍ରାର୍ଥନା କର। ଧାର୍ମିକ ବ୍ୟକ୍ତିର ପ୍ରାର୍ଥନା ଶକ୍ତିଶାଳୀ ଓ ଫଳଦାୟକ। ¹⁷ଏଲୀୟ ଆମ୍ଭମାନଙ୍କ ପରି ଜଣେ ମନୁଷ୍ୟ ଥିଲେ, ଆଉ ବୃଷ୍ଟି ନ ହେଉ ବୋଲି ସେ ଏକାନ୍ତ ଭାବରେ ପ୍ରାର୍ଥନା କଲେ; ଆଉ ତିନି ବର୍ଷ ଛଅ ମାସ ପର୍ଯ୍ୟନ୍ତ ଦେଶରେ ବୃଷ୍ଟି ହେଲା ନାହିଁ। ¹⁸ତାʼପରେ ସେ ପୁନର୍ବାର ପ୍ରାର୍ଥନା କଲେ, ଆଉ ଆକାଶ ବୃଷ୍ଟି ଦେଲା, ପୁଣି ଭୂମି ଆପଣା ଫଳ ଉତ୍ପନ୍ନ କଲା।

¹⁹ହେ ମୋହର ଭାଇ ଓ ଭଉଣୀମାନେ, ଯଦି ତୁମ୍ଭମାନଙ୍କ ମଧ୍ୟରେ କେହି ସତ୍ୟରୁ ବିପଥଗାମୀ ହୁଏ, ଆଉ କେହି ଜଣେ ତାହାକୁ ଫେରାଇ ଆଣେ, ²⁰ତେବେ ଏହା ଜାଣ: ଯେ କୌଣସି ପାପୀକୁ ତାହାର କୁମାର୍ଗରୁ ଫେରାଇ ଆଣେ, ସେ ତାହାର ପ୍ରାଣକୁ ମୃତ୍ୟୁରୁ ରକ୍ଷା କରେ ଓ ବହୁ ପାପ ଆଚ୍ଛାଦନ କରେ।