Santiago 5

5 ¹Halina ngayon, kayong mayayaman, tumangis kayo at humagulgol dahil sa mga kapighatiang darating sa inyo. ²Ang inyong kayamanan ay nabulok na, at ang inyong mga damit ay kinain na ng tanga. ³Ang inyong ginto at pilak ay kinalawang na; ang kalawang na iyon ang magpapatotoo laban sa inyo at tutupok sa inyong laman na parang apoy. Nag-ipon kayo ng kayamanan sa mga huling araw. ⁴Tingnan ninyo: ang sahod na inyong ipinagkait sa mga manggagawang nag-ani sa inyong mga bukid ay humihiyaw, at ang mga daing ng mga tagapag-ani ay nakarating na sa mga tainga ng Ama ng mga hukbo ng langit. ⁵Namuhay kayo sa lupa sa karangyaan at kalayawan. Pinataba ninyo ang inyong mga puso sa araw ng patayan. ⁶Hinatulan ninyo at pinatay ang matuwid, na hindi lumalaban sa inyo.

Maghintay nang May Pusong Matiyaga

⁷Kaya magtiis kayo, mga kapatid, hanggang sa pagdating ng Panginoon. Isipin ninyo ang magsasaka: matiyaga niyang hinihintay ang mahalagang bunga ng lupa, hanggang sa dumating ang mga unang ulan at ang mga huling ulan. ⁸Kayo rin ay dapat magtiis. Palakasin ninyo ang inyong mga puso, sapagkat malapit na ang pagdating ng Panginoon. ⁹Huwag kayong magreklamo laban sa isa't isa, mga kapatid, upang hindi kayo mahatulan. Tingnan ninyo—ang Hukom ay nakatayo na sa mga pintuan. ¹⁰Mga kapatid, kunin ninyong halimbawa ng pagtitiis at pagtitiyaga ang mga propetang nagsalita sa pangalan ng ating Ama. ¹¹Tingnan ninyo, tinatawag nating mapalad ang mga nagtiis. Narinig na ninyo ang pagtitiis ni Job at nakita ninyo ang idinulot ng ating Ama—ang ating Ama ay masagana sa habag at awa.

¹²Higit sa lahat, mga kapatid ko, huwag kayong manumpa—maging sa langit, o sa lupa, o sa anupamang panunumpa. Ang inyong oo ay maging oo at ang inyong hindi ay hindi, upang hindi kayo mahulog sa ilalim ng hatol.

Nagpapagaling ang Panalangin ng Pananampalataya

¹³May naghihirap ba sa inyo? Manalangin siya. May masaya ba? Umawit siya ng mga papuri. ¹⁴May maysakit ba sa inyo? Ipatawag niya ang mga matatanda ng iglesya, at ipanalangin siya ng mga matatanda, na pinapahiran siya ng langis sa pangalan ng Panginoon. ¹⁵Ang panalangin ng pananampalataya ang magliligtas sa maysakit, at ibabangon siya ng Panginoon. At kung siya ay nagkasala, siya ay patatawarin. ¹⁶Kaya ipagtapat ninyo sa isa't isa ang inyong mga kasalanan at ipanalangin ninyo ang isa't isa, upang kayo ay gumaling. Ang panalangin ng taong matuwid ay makapangyarihan at mabisa. ¹⁷Si Elias ay isang taong katulad natin, at siya ay taimtim na nanalangin na huwag umulan; at hindi umulan sa lupa sa loob ng tatlong taon at anim na buwan. ¹⁸Pagkatapos ay muli siyang nanalangin, at ang langit ay nagbigay ng ulan, at ang lupa ay namunga.

¹⁹Mga kapatid ko, kung ang sinuman sa inyo ay maligaw sa katotohanan at may magpanumbalik sa kanya, ²⁰alamin ninyo ito: ang sinumang magpanumbalik ng isang makasalanan mula sa kanyang maling landas ay nagliligtas sa kaluluwa ng taong iyon mula sa kamatayan at nagtatakip ng napakaraming kasalanan.