يعقوب 5 FHB Father's Heart Bible™

5 ¹اي دولتمندؤ، هاڻي ٻڌو، جيڪي مصيبتون اوهان تي اچڻ واريون آهن، تن جي ڪري روئو ۽ ماتم ڪريو. ²اوهان جي دولت سڙي وئي آهي، اوهان جي ڪپڙن کي ڪيڙا لڳي ويا آهن. ³اوهان جي سون ۽ چاندي کي ڪٽ لڳي ويو آهي، اهو ڪٽ اوهان جي خلاف شاهدي ڏيندو ۽ باهہ وانگر اوهان جي گوشت کي کائيندو. اوهان آخري ڏينهن ۾ دولت ڍير ڪئي. ⁴ڏسو، جن مزورن اوهان جي ٻنين جو فصل لڻيو، تن جي اها مزوري، جيڪا اوهان روڪي رکي، دانهون ڪري رهي آهي، ۽ لڻندڙن جون دانهون آسمان جي لشڪرن جي پيءُ جي ڪنن تائين پهتيون آهن. ⁵اوهان ڌرتيءَ تي عيش ۽ عشرت ۾ زندگي گذاري. ذبح جي ڏينهن ۾ اوهان پنهنجيون دليون ٿلهيون ڪيون. ⁶اوهان سچار ماڻهوءَ کي ڏوهاري ٺهرائي قتل ڪيو آهي، جيتوڻيڪ هو اوهان جي مخالفت نہ ٿو ڪري.

صبر واري دل سان انتظار ڪريو

⁷تنهنڪري اي ڀائرو ۽ ڀينرو، خداوند جي اچڻ تائين صبر ڪريو. هاريءَ کي ڏسو، هو زمين جي قيمتي ميوي لاءِ صبر سان انتظار ڪري ٿو، جيستائين اڳيون ۽ پوئيون مينهن وسي. ⁸اوهان کي بہ صبر ڪرڻو آهي. پنهنجين دلين کي مضبوط ڪريو، ڇاڪاڻ تہ خداوند جو اچڻ ويجهو آهي. ⁹اي ڀائرو ۽ ڀينرو، هڪ ٻئي جي خلاف شڪايتون نہ ڪريو، نہ تہ اوهان تي فيصلو ڪيو ويندو. ڏسو، منصف دروازن تي بيٺو آهي. ¹⁰اي ڀائرو ۽ ڀينرو، جن نبين اسان جي پيءُ جي نالي ۾ ڳالهايو، تن کي ڏک سهڻ ۽ صبر جو نمونو بڻايو. ¹¹ڏسو، اسين صبر ڪندڙن کي برڪت وارو سڏيون ٿا. اوهان ايوب جي صبر بابت ٻڌو آهي، ۽ اسان جي پيءُ جيڪو ڪم ڪيو سو بہ ڏٺو اٿو، ڇالاءِ جو اسان جو پيءُ رحم ۽ مهربانيءَ ۾ مالامال آهي.

¹²سڀ کان وڌيڪ، اي منهنجا ڀائرو ۽ ڀينرو، قسم نہ کائو، نہ آسمان جو، نہ زمين جو، نہ وري ڪنهن ٻئي شيءِ جو. اوهان جو ها، ها هجي ۽ اوهان جو نہ، نہ هجي، تہ جيئن اوهان فيصلي هيٺ نہ اچو.

ايمان جي دعا شفا ڏئي ٿي

¹³ڇا اوهان مان ڪنهن تي ڏک آيو آهي؟ تہ هو دعا ڪري. ڇا ڪو خوش آهي؟ تہ هو ساراهه جا گيت ڳائي. ¹⁴ڇا اوهان مان ڪو بيمار آهي؟ تہ هو ڪليسيا جي بزرگن کي سڏائي، ۽ بزرگ خداوند جي نالي ۾ مٿس تيل مَلي دعا ڪن. ¹⁵ايمان جي دعا بيمار کي بچائيندي، ۽ خداوند کيس اٿاريندو. جيڪڏهن هن گناهه ڪيا هجن تہ کيس معاف ڪيو ويندو. ¹⁶تنهنڪري هڪ ٻئي اڳيان پنهنجا گناهه مڃو ۽ هڪ ٻئي لاءِ دعا ڪريو، تہ جيئن اوهان شفا ماڻيو. سچار ماڻهوءَ جي دعا ۾ وڏي طاقت آهي ۽ اها اثرائتي آهي. ¹⁷ايليا اسان جهڙو ماڻهو هو، ۽ هن دل سان دعا گهري تہ مينهن نہ وسي. تنهنڪري ٽن سالن ۽ ڇهن مهينن تائين زمين تي مينهن نہ وسيو. ¹⁸پوءِ هن وري دعا گهري، تہ آسمان مينهن ڏنو ۽ زمين پنهنجو ميوو ڏنو.

¹⁹اي منهنجا ڀائرو ۽ ڀينرو، جيڪڏهن اوهان مان ڪو سچائيءَ کان ڀٽڪي وڃي ۽ ڪو کيس موٽائي آڻي، ²⁰تہ هي ڄاڻو تہ جيڪو ڪنهن گنهگار کي سندس غلط واٽ کان موٽائي ٿو، سو ان جي جان کي موت کان بچائي ٿو ۽ گهڻن گناهن کي ڍڪي ٿو.