ያዕቆብ 4

4 ¹በመካከላችሁ ያሉት ጦርነቶችና ጠብ ከየት የመጡ ናቸው? በውስጣችሁ የሚዋጉት ምኞቶቻችሁ አይደሉምን? ²ትመኛላችሁ ነገር ግን አታገኙም፤ ትገድላላችሁ። ትናፍቃላችሁ ልታገኙትም አትችሉም፤ ትጣላላችሁ ትዋጋላችሁም። የማታገኙትም ስለማትለምኑ ነው። ³ትለምናላችሁ አታገኙምም፤ ምክንያቱም በራሳችሁ ምኞት ልታጠፉት በክፉ ስለምትለምኑ ነው። ⁴እናንተ አመንዝሮች! ከዓለም ጋራ መወዳጀት በአባታችን ላይ ጥል መሆኑን አታውቁምን? እንግዲህ የዓለም ወዳጅ ለመሆን የሚመርጥ ሁሉ የአባታችን ጠላት ይሆናል። ⁵ወይስ መጽሐፍ፣ “በውስጣችን ያኖረው መንፈስ በቅናት ይናፍቃል” ማለቱ በከንቱ የተነገረ ይመስላችኋልን? ⁶ነገር ግን እርሱ የበለጠ ጸጋ ይሰጣል። ስለዚህ መጽሐፍ፣ “አባታችን ትዕቢተኞችን ይቃወማል፤ ለትሑታን ግን ጸጋን ይሰጣል” ይላል።

⁷እንግዲህ ራሳችሁን ለአባታችን አስገዙ። ዲያብሎስን ተቃወሙ፤ ከእናንተም ይሸሻል። ⁸ወደ አባታችን ቅረቡ፤ እርሱም ወደ እናንተ ይቀርባል። እናንተ ኀጢአተኞች፣ እጆቻችሁን አንጹ፤ እናንተ ሁለት ልብ ያላችሁ፣ ልባችሁን አጥሩ። ⁹አዝኑ፤ ተከዙ፤ አልቅሱም። ሳቃችሁ ወደ ልቅሶ፣ ደስታችሁም ወደ ኀዘን ይለወጥ። ¹⁰በአባታችን ፊት ራሳችሁን አዋርዱ፤ እርሱም ከፍ ከፍ ያደርጋችኋል።

¹¹ወንድሞችና እኅቶች ሆይ፣ እርስ በርሳችሁ አትነቃቀፉ። ወንድሙን የሚነቅፍ ወይም የሚፈርድበት ሕግን ይነቅፋል፤ በሕግም ይፈርዳል። በሕግ ብትፈርዱ ግን ለሕግ አድራጊ አይደላችሁም፤ በእርሱ ፈራጆች ናችሁ እንጂ። ¹²ሕግን የሚሰጥና የሚፈርድ አንድ ብቻ ነው፤ እርሱም ሊያድን ወይም ሊያጠፋ ይችላል። ባልንጀራህን የምትፈርድበት አንተ ማን ነህ?

ስለ ነገ አትመኩ

¹³እንግዲህ፣ “ዛሬ ወይም ነገ ወደዚህ ወይም ወደዚያ ከተማ እንሄዳለን፤ በዚያ አንድ ዓመት እናሳልፋለን፤ እንነግዳለን፤ እናተርፋለንም” የምትሉ፣ ስሙ፤ ¹⁴ነገ ምን እንደሚያመጣ አታውቁም። ሕይወታችሁስ ምንድን ነው? ጥቂት ጊዜ ታይታችሁ ኋላ የምትጠፉ ጢስ ናችሁና። ¹⁵ከዚህ ይልቅ፣ “አባታችን ቢፈቅድ፣ በሕይወት እንኖራለን፤ ይህን ወይም ያን እናደርጋለን” ልትሉ ይገባችኋል። ¹⁶አሁን ግን በትዕቢታችሁ ትመካላችሁ። እንዲህ ያለው ትምክሕት ሁሉ ክፉ ነው። ¹⁷እንግዲህ መልካሙን ማድረግ እያወቀ የማያደርግ ሁሉ ኀጢአት ይሆንበታል።