جګړه چې د لالچ نه پېدا کيږى
جګړې له هغو غوښتنو راځي چې دننه سره جګړه کوي؛ هغوی نه لري ځکه نه غواړي، او کله چې غواړي غلط غواړي. له نړۍ سره دوستي له زموږ پلار سره دښمني ده، خو هغه لا ډېر فضل ورکوي. هغه ته نږدې شئ، او د سبا پلان داسې مه جوړوئ لکه ژوند چې لړه نه وي.
4 1ستاسو په مينځ کښې جنګونه او جګړې د کُومې نه راځى؟ آيا دا ستاسو هغه خواهشات نۀ دى چې ستاسو په بدن کښې جنګيږى؟ 2تاسو غواړئ خو نۀ لرئ، نو خلک وژنئ. لالچ کوئ خو ترلاسه کولے نۀ شئ، نو جګړه او جنګ کوئ. تاسو ځکه نۀ لرئ چې تاسو نۀ غواړئ. 3تاسو غواړئ خو نۀ مومئ، ځکه چې تاسو په غلطه توګه غواړئ، دې دپاره چې په خپلو عيشونو يې خرڅ کړئ. 4اے بېوفا خلکو! آيا تاسو ته دا نۀ دى معلوم چې د دُنيا سره دوستى زمونږ د پلار سره دُشمنى ده؟ نو څوک چې د دې دُنيا دوست کېدل خوښوى، هغه زمونږ د پلار دُشمن ګرزى. 5آيا تاسو ګومان کوئ چې کِتاب بېفائدې داسې وائى چې هغه روح چې هغۀ په مونږ کښې کېښودو، هغه په حسد سره ارمان کوى؟ 6خو هغه نور زيات فضل کوى. ځکه خو کِتاب وائى چې، ”زمونږ پلار د مغرورو مخالفت کوى خو عاجزانو ته فضل ورکوى.“
7نو تاسو زمونږ پلار ته ځان تابع کړئ. د اِبليس مقابله وکړئ، نو هغه به ستاسو نه وتښتى. 8زمونږ پلار ته نزدې شئ، نو هغه به تاسو ته نزدې شى. اے ګناهګارو، خپل لاسونه پاک کړئ؛ اے دوهزړيو، خپل زړۀ صفا کړئ. 9غمژن شئ، ماتم وکړئ او وژاړئ. خپل خندا په ماتم او خپله خوشحالى په غم بدله کړئ. 10زمونږ پلار په وړاندې عاجزى وکړئ، نو هغه به تاسو اوچت کړى.
11اے ورُوڼو، د يو بل خلاف مۀ وايئ. څوک چې د خپل ورور خلاف وائى يا په هغۀ باندې فيصله کوى، هغه د شريعت خلاف وائى او په شريعت باندې فيصله کوى. خو کۀ تۀ په شريعت باندې فيصله کوې، نو تۀ د شريعت عمل نۀ کوې بلکې قاضى يې. 12صرف يو دے چې شريعت ورکوى او فيصله کوى، هغه چې خلاصولے او تباه کولے شى. تۀ څوک يې چې د خپل ګاونډى په حقله فيصله کوې؟
د سبا په حقله فخر مۀ کوئ
13نو اوس واورئ، تاسو چې وايئ چې، ”نن يا سبا به مونږ فلانى ښار ته لاړ شُو، هلته به يو کال تېر کړو، تجارت به وکړو او نفع به وګټو.“ 14تاسو ته دا معلوم نۀ دى چې سبا به څۀ کيږى. ستاسو ژوند څۀ شے دے؟ ځکه چې تاسو هغه لوګے يئ چې لږ وخت ښکاره کيږى، بيا ورک شى. 15بلکې تاسو ته په کار دى چې ووايئ چې، ”کۀ زمونږ د پلار رضا وى، نو مونږ به ژوندى يُو او دا يا هغه کار به وکړو.“ 16خو اوس تاسو په خپل غرور کښې فخر کوئ. دا ټول داسې فخر بد دے. 17نو څوک چې د ښۀ کار کولو پوهيږى خو هغه نۀ کوى، د هغۀ دپاره دا ګناه ده.
