Ningkachāng Eina Shokkahai Khanganang
Ngama̱ ngashaova ningli ngarākazat ningkachāngwui eina shoka; athumna ngahānmada malei, kala ngahānkakha makhamashung eina ngahāna. Okathuili ngasotnao kasā hiya ithumwui Avāli yangkashena, kha ana hakkhamei lukhamashan mi. Ali nganailu, kala mirin hi leichui maningkhala kathāda thangkhawui vang arah sāzatli thuihaolu.
4 1Nathumwui ngachaili rai kala khanganang chi kachi eina rārakhala? Nathumwui phasālungli khangararra nathumwui ningkachāng chi maningmala? 2Nathumna ningchānga kha nathumli maleimana; chiwui vang nathumna shaothata. Nathumna kahaoa kha samphang makhuimana; chiwui vang nathumna kharar kala ngarara. Nathumna makapowui vang eina nathumli maleimana. 3Nathumna kapo kha samphang makhui, khikhalajila khalattawui ringkaphāmangli phākhavai nathumna nguida poi. 4Phokaphā mibing! Okathuili ngasotnao sāmi hi ithumwui Avāwui yangshi kaji nathumna matheimala? Chiwui vang eina okathuiwui ngasotnao ngasakhangai mi china ithumwui Avāwui yangkashe ngasāra. 5Lah Kathara lairikna arema matui, ana ithumwui alungli haikahai manglāna yuikashi eina longa da hānga? 6Kha ana lukhamashan reimeida mi. Chiwui vang eina Kathara lairikna hānga, "Ithumwui Avāna langkasobingli ngakaikashi, kha khangahuiabingli lukhamashan mi."
7Chiwui vang eina ithumwui Avāli hamsanglu. Chipeeli ngasunglu, chithākha ana nathumwui eina yāmra. 8Ithumwui Avāli nganailu, chithākha ana nathumli nganaira. Morei kaphungbing, nathumwui pāng tharngasaklu; ning khani kasābing, nathumwui wuklung tharngasaklu. 9Ningchotlu, chapngachālu, kala chaplu. Nathumwui khamana̱ chi sikafa onngasaklu, kala nathumwui khamathān chi khangamili onngasaklu. 10Ithumwui Avāwui mangāli nathum khalatta ngahuiri kahai sālu, chithākha ana nathumli reingasakra.
11Ivānaobing, akha eina akha maphenphāalu. Achinā akhali kaphena, lah ali bichar kasāa mi china, ainli phena kala ainli bichar sāa. Kha nana ainli bichar sāakha, na ain chi mayonkasā maningla, bichar kasāna. 12Ain khami kala bichar kasā chi akhamānga; ana huikhavai kala sāshimān khavai kapingna. Nawui khongnainaoli bichar sāa na china khipākhala?
Akhamawui Vang Malāngsoalu
13Ara thuilu, nathum hithada kahāngbing, "Aja lah akhama ithumna hi keinung lah chi keinungli vāda, chila zingkum akha pamda, leih sāda, kala tongkazā samphangra." 14Akhama china khi khuirārakhala da nathumna matheimana. Nathumwui mirin hi khina? Kaja nathum leichui kathāna, kasha̱khawui vang theikahai, chiwui thili thuihaora. 15Chi mahutli, nathumna hithada hāng phalungra, "Ithumwui Avāna ningchāngakha, ithumna ringda hi lah chi sāra." 16Chithālala, nathumna nathumwui langkaso eina lāngsoi. Hikathā lāngkaso saikora hi makaphāna. 17Chiwui vang eina, kaphā sākhavai kaji theilaga masā mi china, chi awuili moreina.
