Suryet ne punu Myatyet
Punu lugoosyek eng' myatosyek che yaei lugeet eng' poortang'wong'; ma otinye amu ma osoome, ak ye osoome ko osoome ne ya. Chorweetap ng'wony ko puunyoondit eng' Kwandanyo, ago koonu myeeindo ne siirtoi. Oming'injigei ineendet, ak oiste ng'uneetap tomo ko uu ye ma saboon kiy ne betyei chut.
4 1Punu eng' ano lugoosyek ak pooryosyek che mi eng' kwenung'wong'? Tos ma myatosyekwok che yaei lugeet eng' poortang'wong'? 2Omache ago ma otinye—obare. Ogase myat ago ma omuuchi onyooru—obeelgei ak oporyo. Ma otinye amu ma osoome. 3Osoome ago ma otaach, amu osoome ne ya, si oriisye eng' poiboiosyekwok. 4Okweek pichu che adulam! Tos mongen ile chorweetap ng'wony ko puunyoondit eng' Kwandanyo? Age tugul ne leweni koek chorweetap ng'wony, koegu punyondetap Kwandanyo. 5Anan tos ng'alaali siruutyet puch, kole kabuuset ne ki inde eng' echeek komachei eng' ng'etkong'? 6Ago koonu myeeindo ne siirtoi. Nooto amu kole siruutyet, “Chotei Kwandanyo che menotik ago igoochin myeeindo che iming'inegei.”
7Oming'injigei anyun Kwandanyo. Ogiru Setani, ak kochaakta eng' okweek. 8Oneegit Kwandanyo, ak koneegitwok. Otiliil eunekwok, okweek kiptengeginik; oanyiny mugulelwekwok, okweek che mindilileen. 9Oaragense, oteiye, ak oriirye. Owal ng'uneetwok koek kateiyet, ak poiboiyeng'wong' koek imenindo. 10Oming'inigei eng' taitap Kwandanyo, ak kogoeetok.
11Among'alaaljinegei, okweek che kitupche. Age tugul ne ng'alaaljini tupchennyi, anan korwookyi, ng'alaali ng'atuutyet ak korwookyi. Ago ngo irwookyin ng'atuutyet, ma isubi—ago irwookyin. 12Agenge kityo ne koonu ng'atuutyet ak korwookyi—ne imuuchi kosar anan koibany. Ii ng'oo inyee si irwookyin chiitap kokweng'ung'?
Amolaskei Agobo Mutai
13Owe nguno, okweek che le, “Rani anan mutai kiwendi nganaseet ni anan nooto, keru kenyiit agenge, keyai mung'aaret, ak kenyoor keljinet.” 14Ma oingen ne ibu mutai. Nee saboondang'wong'? Amu oegu iuteet, ne kigeere eng' sait ne ming'in, yeityo kobata. 15Ago konyool le, “Ngot komachei Kwandanyo, kesabe ak keyai niito anan nooto.” 16Ago nguno, oloskei eng' lasetapkeiyeng'wong'. Lasetap kei che uu nooto tugul ko yaityet. 17Nooto age tugul ne ngen ne myee ne yae ago ma yae, ko tengekto nenyi.