Jakọbu 4

4 ¹Níbo ni ogun àti ìjà tí ń bẹ láàrín yín ti wá? Kì í ha ṣe ìfẹ́kúfẹ̀ẹ́ yín tí ń jà ní inú yín? ²Ẹ̀yin ń fẹ́, ẹ kò sì ní—ẹ ń pànìyàn. Ẹ ń ṣe ìfẹ́kúfẹ̀ẹ́, ẹ kò sì lè rí i gbà—ẹ ń jà, ẹ sì ń bá ara yín jà. Ẹ kò ní nítorí tí ẹ kò béèrè. ³Ẹ ń béèrè, ẹ kò sì rí gbà, nítorí tí ẹ ń béèrè lọ́nà tí kò tọ́, láti fi ná a sórí ìgbádùn ara yín. ⁴Ẹ̀yin panṣágà! Ẹ kò ha mọ̀ pé jíjẹ́ ọ̀rẹ́ ayé jẹ́ ìkórìíra sí Baba wa? Ẹnikẹ́ni tí ó bá yàn láti jẹ́ ọ̀rẹ́ ayé, ó di ọ̀tá Baba wa. ⁵Tàbí ẹ rò pé lásán ni Ìwé Mímọ́ ń sọ̀rọ̀, nígbà tí ó wí pé ẹ̀mí tí ó fi sínú wa ń hára gàgà pẹ̀lú owú? ⁶Ṣùgbọ́n ó ń fi oore-ọ̀fẹ́ tí ó pọ̀ sí i fún wa. Ìdí nìyí tí Ìwé Mímọ́ fi wí pé, “Baba wa ń tako àwọn onígbèéraga, ṣùgbọ́n ó ń fi oore-ọ̀fẹ́ fún àwọn onírẹ̀lẹ̀.”

⁷Nítorí náà, ẹ fi ara yín sábẹ́ Baba wa. Ẹ kọ ojú ìjà sí Satani, òun yóò sì sá fún yín. ⁸Ẹ súnmọ́ Baba wa, òun yóò sì súnmọ́ yín. Ẹ wẹ ọwọ́ yín mọ́, ẹ̀yin ẹlẹ́ṣẹ̀; ẹ sọ ọkàn yín di mímọ́, ẹ̀yin oníyèméjì. ⁹Ẹ banújẹ́, ẹ ṣọ̀fọ̀, kí ẹ sì sọkún. Ẹ sọ ẹ̀rín yín di ọ̀fọ̀, àti ayọ̀ yín di ìbànújẹ́. ¹⁰Ẹ rẹ ara yín sílẹ̀ níwájú Baba wa, òun yóò sì gbé yín ga.

¹¹Ẹ má ṣe sọ̀rọ̀ òdì sí ara yín, ẹ̀yin ará. Ẹnikẹ́ni tí ó bá sọ̀rọ̀ òdì sí arákùnrin rẹ̀, tàbí tí ó dá a lẹ́jọ́, ó ń sọ̀rọ̀ òdì sí òfin, ó sì ń dá òfin lẹ́jọ́. Ṣùgbọ́n bí ìwọ bá dá òfin lẹ́jọ́, ìwọ kì í ṣe olùpa òfin mọ́—olùdájọ́ rẹ̀ ni ìwọ. ¹²Ẹnìkan ṣoṣo ni ó ń fúnni ní òfin, tí ó sì ń ṣèdájọ́—ẹni tí ó lè gbà ni là tàbí kí ó pa ni run. Ta ni ìwọ tí ìwọ fi ń dá aládùúgbò rẹ lẹ́jọ́?

Má Ṣe Ṣògo Nípa Ọ̀la

¹³Ẹ wá nísinsìnyí, ẹ̀yin tí ń wí pé, “Lónìí tàbí ọ̀la, àwa yóò lọ sí ìlú yìí tàbí ìlú yẹn, kí a lo ọdún kan níbẹ̀, kí a ṣòwò, kí a sì jèrè.” ¹⁴Ẹ kò mọ ohun tí ọ̀la yóò mú wá. Kí ni ìyè yín? Nítorí ìkùukùu ni ẹ̀yin, tí ń farahàn fún ìgbà díẹ̀, tí ó sì ń parẹ́ lẹ́yìn náà. ¹⁵Dípò èyí, ó yẹ kí ẹ wí pé, “Bí Baba wa bá fẹ́, àwa yóò wà láàyè, àwa yóò sì ṣe èyí tàbí ìyẹn.” ¹⁶Ṣùgbọ́n nísinsìnyí, ẹ̀yin ń ṣògo nínú ìgbèéraga yín. Gbogbo irú ìṣògo bẹ́ẹ̀ jẹ́ búburú. ¹⁷Nítorí náà, ẹnikẹ́ni tí ó bá mọ rere láti ṣe, tí kò sì ṣe é, ẹ̀ṣẹ̀ ni fún un.