Bathainu bina Ponnu Kae Kanaanu
Kae kanaanu bing ga nani pum sung bi chwan to ongnu bathainu bing khouna hungne; banina kani makka briakpina amnu make, khatle banina kaniye kaan bi le kasianu om lang bi kaniye. Talei ram le baannu ga ani Pa ding munanu gaye, atiyeda Maanna phaangkriang ma inkuga pi thang nge. Maan khou nai hung ngo, khatle nani kum ga bakhut danga ong briakpina, inswan lang rang thang mako.
4 1Nani lak pina kraan khatle kae kanaanu tudanga hungbo? Haga nani pum sung bi chwan to ongnu nani bathainu bing khouna makkabo? 2Nanina bathaiye khatle amnu make, atibriakpina nanina mi athat nge. Nanina ra-aamme khatle lousunu ngam make, atibriakpina nanina kae kanaaluga kraan to nge. Nanina kani maak briakpina nani ding amnu make. 3Nanina kaniye khatle lousunu make; balangbe nani baraanto karo rangaa lang sin thang nwamga, nanina kasianu om lang bi kani briakpina rwe. 4Rwan basan laannu nani ga! Talei ram le baannu heiya ani Pa om munanu gaye dinu nanina thei makkabo? Tudannu talei ram om baan ding maan kanu maan ga ani Pa om munanu danlune. 5Athwa Rikrwang chongna, Maanna ani sung bi thang damnu katha heiya antiam toga ra-aamme, diga khatchale makka rinbo? 6Atiyeda Maanna phaangkriang ma inkuga pi thang nge. Atibriakpina Bathiangnu Chongdipna rinne, “Ani Pa na lian tonu nun ding maitwang nge atiyeda kasonnu nun ding phaangkriang pi thang nge.”
7Atibriakpina ani Pa khou nani baraanto thwei bi talu tawo. Seitaan ding kakhang ngo, atiye dabe maan nani khouna pak tamlune. 8Ani Pa khou nai hung ngo, atiye dabe Maan nani khou nai hunglune. Noh tonu nani ga, nani kut bing ding to bathiang swako; sung khoranu nani ga, nani sung bing ding pi bathiang sero. 9Nani sung riangre ngo, nu hwei ngo khatle chapo. Nani banuinu ding nu hweinu bi gon swako, khatle nani karonu ding sung soknu bi gon swako. 10Ani Pa meithaan bi nani baraanto kasonnu ong ngo, atiye dabe Maanna nani ding kai basaang ka thanglune.
11Unao rwan nani ga, khatna khat ting sia lang rin mako. Tudannu unao khat ding sia lang rin, athwa maan ding chong kasem ongnu maan ga chongtan ding sia lang ringa chongtan ding chong kasem ongme. Atiyeda nangna chongtan ding chong kasem nge dabe, nang chongtan zeinu make atiyeda chong kasem ongnuwe. 12Chongtan pi thangnu khatle chong kasem ongnu Pakhatchana amme; Maanna kanthangnu ngam khatle braan ta thangnu ngamme. Atiyeda nang nainnai lounai ding chong kasem ongnu nang tubo?
Inswan Lang Lian To Mako
13Ngaiyo, “Aniya athwa inswan anina hei khun athwa haba khun bi seluga, habei ga sangwan khat ong bachamga, langgon ngaakluga lan tam lousulune,” diga rinnu nani ga. 14Inswan pa-aam hunglune dinu nanina thei make. Nani ringnu kum heiya pa-aambo? Balangbe nani ga kazingnu tambu rwan ga, karangga munu ngamluga, haba nung bi braan damnu rwe. 15Haba om lang bi, “Ani Pa na baningnuwe dabe, anina ring ongga hei athwa haba ding to lune,” diga nanina rin ding gaye. 16Atun nanina nani phun liannu bi lian to nge. Hadannu lian tonu brumza sa maknu gaye. 17Atibriakpina tudannu kasanu to dingnu ding theiluga to maknu maan ga, maan om noh gaye.