Maangang ka Longbü Oyophetyo
Wapyo kho kan manga wapyobü maangangbü ka longda; kanei ahap, aishanga kanei ahi, hoba hilaje amlangbüa hida. Kaodak yoa thangbou kho seneibü Bou to dangbü ki, lausikei haoei onou morea kuda. Hao jungto nyangko louashi, hoba kaneibü langkei phekhon tegü kia dogo aangko, nangtat shanga lamnyu akümjan.
4 1Kan yoa kibü wapyo hoba oyophetyo kho lanei longda? Kaneibü manga wapyobü kaneibü maangangbü ka longbü aying lo? 2Kanei maangangda lausikei ahap, khoei kanei müt haitida. Kanei dühda lausikei haplabü athük, khoei kanei oyophetyoda hoba wapyoda. Kanei ai ahap, aishanga kanei ahida. 3Kanei hida lausikei asunglet, aishanga kanei amaiko hida, jembü olinbü shanga apsilela shanga. 4Kan jambü shuong! Kaodak yoa thangbou yeibü kho Bou to dangbü ki dogo kanei angekei lo? Khoei atei kaodakeibü thangbou yeila maangangalonga, hao Bou dangbou la yeilabü. 5Ayingsi, Haoei sen maanga phokubü Soushouei nyekto shatko dühda dogo Laishibaei amlanga lauda lo? 6Lausikei haoei onou morea kuda. Khoei Laishibaei lauda, “Bouei yonglambü shuong to dangda lausikei eaaoabü shuong to onou kuda.”
7Kheijinei, Bou phanga natenko kishi. Amaibou to sheashi, hoba haoei kan ka satlabü. 8Bou jungto nyangko louashi, hoba haoei kan jungto nyangko loulabü. Kan shabü shuong, kaneibü you saüenashi; kan maangpon penyi yembü shuong, kaneibü maangpon saüenashi. 9Maangto shatashi, mang haapashi, hoba haapashi. Kaneibü olinbü mang haapbü to sepeiashi, hoba kaneibü maanghaibü mühyaak to sepeiashi. 10Bou thedanga kan lolo phangkashi, hoba haoei kan thük to tonenlabü.
11Jaisinasi shuong, kan cheei che to tenyiku. Atei jembü na to nyikuda, ayingsi hao to matjemda, haoei Ngühkhüm to nyikuda hoba Ngühkhüm matjemda. Lausikei nyi Ngühkhüm matjemalonga, nyi kho ajungeida, nyi kho matjembou ki. 12Ngühkhüm kubou hoba matjembou kho che ong ki, aoei khümenla ayingsi mautila thükda. Lausikei kaibü lepbou matjembou nyi, nyi ao ki?
Ngiet Shanga Teyonglam
13Tou kaiya, kanei lauda, “Tat ayingsi ngiet künei hibü ayingsi habü sangnyu to haulabü, khünei po che kiteilabü, seiatakei, hoba peisilei haplabü.” 14Ngiet ai loulabü kanei angekei. Kaneibü langkei kho ai ki? Aishanga kan sangmei che ong ki, longche shanga hapbo, tokei üanglabü. 15Aeiko kanei ho lenjan, “Bouei maangangalonga, künei langlabü hoba hibü ayingsi habü kümlabü.” 16Lausikei tou kanei kaneibü yonglambü the lenenda. Kho tegü the lenenbü pendou amaibü ki. 17Khoei atei maibü kümla ngean, lausikei kho akümla, hao la shabü ki.
