ራእይ 21

21 ¹ከዚያም አዲስ ሰማይና አዲስ ምድር አየሁ፤ የቀደመው ሰማይና የቀደመችው ምድር ዐልፈዋልና፤ ባሕርም ከእንግዲህ የለም። ²ቅድስቲቱን ከተማ፣ አዲሲቱን ኢየሩሳሌም ከሰማይ ከአባታችን ዘንድ ስትወርድ አየሁ፤ ለባልዋ አጊጣ እንደ ተዘጋጀች ሙሽራ ተዘጋጅታ ነበር።

³ከዙፋኑም የመጣ ታላቅ ድምፅ እንዲህ ሲል ሰማሁ፤ “እነሆ፣ የአባታችን ማደሪያ ከሰዎች ጋር ነው። ከእነርሱ ጋር ይኖራል፤ እነርሱም ሕዝቡ ይሆናሉ፤ እርሱ ራሱም አባታቸው ከእነርሱ ጋር ይሆናል።

⁴አባታችን እንባን ሁሉ ከዐይኖቻቸው ያብሳል፤ ሞትም ከእንግዲህ የለም፤ ልቅሶም ቢሆን ዋይታም ሥቃይም ከእንግዲህ አይኖርም፤ የቀደሙት ነገሮች ዐልፈዋልና።”

⁵በዙፋኑም ላይ የተቀመጠው እንዲህ አለ፤ “እነሆ፣ ሁሉን ነገር አዲስ አደርጋለሁ።” ደግሞም፣ “ይህን ጻፍ፤ እነዚህ ቃላት የታመኑና እውነተኛ ናቸው” አለ። ⁶እንዲህም አለኝ፤ “ተፈጸመ። አልፋና ዖሜጋ፣ መጀመሪያውና መጨረሻው እኔ ነኝ። ለተጠማ ሰው ከሕይወት ውሃ ምንጭ በነጻ እሰጣለሁ። ⁷ድል የሚነሣ ሁሉ እነዚህን ይወርሳል፤ እኔም አባቱ እሆናለሁ፤ እርሱም ልጄ ይሆናል። ⁸ፈሪዎች ግን፣ የማያምኑ፣ የሚያስጸይፉ፣ ነፍሰ ገዳዮች፣ ዝሙተኞች፣ ጠንቋዮች፣ ጣዖት አምላኪዎችና ውሸታሞች ሁሉ ዕድላቸው በእሳትና በዲን በሚቃጠለው ባሕር ውስጥ ነው፤ ይህም ሁለተኛው ሞት ነው።”

⁹ሰባቱን የመጨረሻ መቅሰፍቶች የሞሉባቸውን ሰባት ጽዋዎች ከያዙት ከሰባቱ መላእክት አንዱ መጥቶ፣ “ና፤ ሙሽራዪቱን፣ የበጉን የኢየሱስን ሚስት አሳይሃለሁ” አለኝ። ¹⁰በመንፈስም ወደ ታላቅና ረጅም ተራራ ወሰደኝ፤ ቅድስቲቱንም ከተማ ኢየሩሳሌምን ከሰማይ ከአባታችን ዘንድ ስትወርድ አሳየኝ፤ ¹¹የአባታችንንም ክብር ትገልጥ ነበር፤ ብርሃንዋም እጅግ እንደ ከበረ ዕንቍ፣ እንደ ብርሌ የጠራ እንደ ኢያሰጲድ ድንጋይ ነበር። ¹²ታላቅና ረጅም ቅጥር ነበራት፤ ዐሥራ ሁለት በሮችም ነበሯት፤ በበሮቹም ዐሥራ ሁለት መላእክት ቆመው ነበር፤ የእስራኤልም ልጆች የዐሥራ ሁለቱ ነገዶች ስሞች በእነርሱ ላይ ተጽፈው ነበር፤ ¹³በምሥራቅ ሦስት በሮች፣ በሰሜን ሦስት በሮች፣ በደቡብ ሦስት በሮች፣ በምዕራብ ሦስት በሮች ነበሩ። ¹⁴የከተማዪቱም ቅጥር ዐሥራ ሁለት መሠረቶች ነበሩት፤ በእነርሱም ላይ የበጉ የኢየሱስ የዐሥራ ሁለቱ ሐዋርያት ዐሥራ ሁለት ስሞች ነበሩ።

¹⁵ከእኔም ጋር የሚነጋገረው ከተማዪቱን፣ በሮችዋንና ቅጥሮችዋን ይለካ ዘንድ የወርቅ መለኪያ ዘንግ ይዞ ነበር። ¹⁶ከተማዪቱም አራት ማዕዘን ነበረች፤ ርዝመትዋም ከስፋትዋ ጋር እኩል ነበር። በዘንጉም ለካት፤ 1,400 ማይል ያህል ነበረች፤ ርዝመትዋ፣ ስፋትዋና ከፍታዋ እኩል ነበሩ። ¹⁷ቅጥርዋንም ለካ፤ በሰው መለኪያ 216 ጫማ ያህል ነበር፤ ይህም የመልአኩ መለኪያ ደግሞ ነው። ¹⁸ቅጥሩም ከኢያሰጲድ ተሠርቶ ነበር፤ ከተማዪቱም እንደ ጥሩ መስተዋት የጠራ ጥሩ ወርቅ ነበረች። ¹⁹የከተማዪቱ ቅጥር መሠረቶች በልዩ ልዩ ዕንቍ ሁሉ ተጌጠው ነበር፤ የመጀመሪያው መሠረት ኢያሰጲድ፣ ሁለተኛው ሰንፔር፣ ሦስተኛው ኬልቄዶን፣ አራተኛው መረግድ፣ ²⁰አምስተኛው ሶርዶንክስ፣ ስድስተኛው ሰርድዮን፣ ሰባተኛው ክሪሶላይት፣ ስምንተኛው ቤርሎስ፣ ዘጠነኛው ቶጳዝዮን፣ ዐሥረኛው ክሪሶጵራስዮን፣ ዐሥራ አንደኛው ያክንት፣ ዐሥራ ሁለተኛው አሜቴስጥስ ነበር። ²¹ዐሥራ ሁለቱም በሮች ዐሥራ ሁለት ዕንቍዎች ነበሩ፤ እያንዳንዱ በር ከአንድ ዕንቍ የተሠራ ነበር። የከተማዪቱም መንገድ እንደ ጥሩ መስተዋት የጠራ ጥሩ ወርቅ ነበር።

²²በእርሷም ውስጥ መቅደስ አላየሁም፤ ሁሉን ቻይ ጌታ አባትና በጉ ኢየሱስ መቅደስዋ ናቸውና። ²³ከተማዪቱም ሊያበሩላት ፀሐይና ጨረቃ አያስፈልጓትም፤ የአባታችን ክብር ያበራላታልና፤ መብራትዋም በጉ ኢየሱስ ነው። ²⁴አሕዛብም በብርሃንዋ ይመላለሳሉ፤ የምድርም ነገሥታት ክብራቸውን ወደ እርሷ ያመጣሉ። ²⁵በሮችዋም በቀን ከቶ አይዘጉም፤ በዚያም ሌሊት የለም። ²⁶የአሕዛብንም ክብርና ሞገስ ወደ እርሷ ያመጣሉ። ²⁷ርኩስ የሆነ ነገር ከቶ ወደ እርሷ አይገባም፤ የሚያስጸይፍ ወይም ሐሰተኛ የሆነ ነገር የሚያደርግም ማንም አይገባም፤ በበጉ በኢየሱስ የሕይወት መጽሐፍ ተጽፈው የሚገኙት ብቻ ይገባሉ እንጂ።